• Daily Hukamnama
  • Shop
  • Quiz
Punjabi Stories
  • All Kahaniyan
    • General
    • Religious
    • Motivational
    • Sad Stories
    • Funny Punjabi Stories
    • Kids Stories
    • Long Stories
    • Love Stories
    • Punjabi Virsa
    • Mix
  • Punjabi Status
    • Attitude Status in Punjabi
    • Motivational Status Punjabi
    • Wallpapers – Image Status
    • Punjabi Love status
    • Punjabi Love Shayari
    • Punjabi Whatsapp Status
    • Punjabi Status for Boys
    • Punjabi Status for Girls
    • Punjabi Status Yaari
    • Ajj Da Vichar
    • Sad Status Punjabi
    • Punjabi Song Status
    • Sachian Gallan
    • Punjabi Dharmik Status
    • Shayari
    • Punjabi Status Sardari
    • Funny punjabi status
  • Blog
  • Punjabi Boliyan
    • Bhangra Boliyan
    • Desi Boliyan
    • Dadka Mail
    • Nanka Mail
    • Munde Vallo Boliyan
    • Bari Barsi Boliyan
    • Kudi Vallo Boliyan
    • Jeeja Saali
    • Jeth Bhabhi
    • Maa Dhee
    • Nanaan Bharjayi
    • Nooh Sass
    • Punjabi Tappe
    • Deor Bharjayii
    • Funny Punjabi Boliyan
    • Giddha Boliyan
    • Munde Vallo Boliyan
  • Wishes
    • Birthday Wishes
      • Birthday Wishes for Brother
      • Birthday Wishes for Sister
      • Birthday Wishes for Friend
      • Birthday Wishes for Father
      • Birthday Wishes for Mother
      • Birthday Wishes for Wife
      • Birthday Wishes for Husband
      • Birthday Wishes for Son
      • Birthday Wishes for Daughter
    • Festival Wishes
      • Baisakhi Wishes
  • Wallpapers
    • Sad Status Images
    • Love Status Images
    • Motivational Status Images
    • Gurbani Status Images
    • Sachian Gallan Status
    • Funny Status Images
    • Ajj Da Vichar
    • Image Status
  • Punjabi Shayari
  • 0




motivational stories

ਫੋਨ ਦੇ ਗੁਲਾਮ

by Manpreet Singh January 14, 2019

ਅਪ੍ਰੈਲ ਦੇ ਮਹੀਨੇ ਕਿਸੇ ਨੂੰ ਲੈਣ ਵਿੰਨੀਪੈਗ ਏਅਰਪੋਰਟ ਗਿਆ..
ਫਲਾਈਟ ਘੰਟਾ ਲੇਟ ਸੀ…ਏਧਰ ਓਧਰ ਘੁੰਮਦੇ ਦੀ ਨਜਰ “ਕੇਨ” ਨਾਮ ਦੇ ਇਸ ਗੋਰੇ ਤੇ ਜਾ ਪਈ..ਵਿਚਕਾਰ ਜਿਹੇ ਟੇਬਲ ਤੇ ਕੁਝ ਫਲ ਫਰੂਟ ਰੱਖ ਕਿਸੇ ਕਮੇਡੀ ਸ਼ੋ ਦੀ ਪ੍ਰਮੋਸ਼ਨ ਕਰਨ ਬੈਠਾ ਸੀ..!
ਨਜਰਾਂ ਮਿਲੀਆਂ ਤਾਂ ਅੱਗੋਂ ਹੱਸ ਪਿਆ ਆਖਣ ਲੱਗਾ ਕੇ ਖਾ ਪੀ ਲੈ ਮਿੱਤਰਾ ਕੁਝ..ਸਾਰਾ ਕੁਝ ਮੁਫ਼ਤ ਏ..!
ਮੈਂ ਧੰਨਵਾਦ ਆਖਦਿਆਂ ਦੱਸ ਦਿੱਤਾ ਕੇ ਨਾਸ਼ਤਾ ਕਰ ਕੇ ਆਇਆ ਹਾਂ…
ਆਖਣ ਲੱਗਾ ਕੇ ਅੱਜ ਜਿੰਨਿਆਂ ਨੂੰ ਵੀ ਸੁਲਾ ਮਾਰੀ..ਸਾਰਿਆਂ ਦਾ ਬੱਸ ਏਹੀ ਜੁਆਬ ਸੀ..ਕਹਿੰਦਾ ਲੋਕੀ ਫੋਨਾਂ ਦੇ ਗੁਲਾਮ ਹੋ ਬਣ ਕੇ ਰਹਿ ਗਏ ਨੇ…ਇੱਕ ਮਿੰਟ ਵੀ ਹੈਨੀ ਕਿਸੇ ਕੋਲ ਇੱਕ ਦੂਜੇ ਨਾਲ ਗੱਲ ਕਰਨ ਦਾ..ਗੂੰਗੇ-ਬੋਲਿਆਂ ਦਾ ਪਲੈਨੇਟ ਬਣ ਗਈ ਏ ਇਹ ਸਾਰੀ ਦੁਨੀਆ..!

ਮੈਂ ਕੋਲ ਖਾਲੀ ਪਈ ਕੁਰਸੀ ਤੇ ਬੈਠਦਿਆਂ ਪੁੱਛ ਲਿਆ ਕੇ ਮਿੱਤਰਾ ਦੱਸ ਤਾਂ ਸਹੀ ਕਿੱਦਾਂ ਦੀ ਹੁੰਦੀ ਸੀ ਤੇਰੇ ਵੇਲੇ ਦੀ ਦੁਨੀਆ?
ਗੱਲਾਂ ਗੱਲਾਂ ਵਿਚ ਹੀ ਮੈਨੂੰ ਆਪਣੇ ਸੱਠ ਕਿਲੋਮੀਟਰ ਦੂਰ ਪਿੰਡ ਦੇ ਸੋਹਣੇ ਜਿਹੇ ਫਾਰਮ ਹਾਊਸ ਤੇ ਲੈ ਗਿਆ ਤੇ ਆਖਣ ਲੱਗਾ ਕੇ ਇੱਕ ਟਾਈਮ ਹੁੰਦਾ ਸੀ ਲੋਕੀ ਇੱਕ ਦੂਜੇ ਦੇ ਸਾਹਾਂ ਨਾਲ ਸਾਹ ਲਿਆ ਕਰਦੇ ਸਨ…ਕੁਦਰਤੀ ਪੇਂਡੂ ਮਾਹੌਲ ਵਿਚ ਆਪਸੀ ਪਿਆਰ ਮੁਹੱਬਤ ਦੇ ਦਰਿਆ ਵਗਿਆ ਕਰਦੇ ਸਨ..ਇੱਕ ਬਿਮਾਰ ਹੁੰਦਾ ਤੇ ਸਾਰਾ ਪਿੰਡ ਖਬਰ ਲੈਣ ਆ ਜਾਇਆ ਕਰਦਾ…ਬਾਹਰੀ ਵਿਖਾਵਾ,ਸ਼ੋਸ਼ੇ-ਬਾਜੀਆਂ ਤੇ ਘਟੀਆ ਬਨਾਉਟੀ ਪਣ ਕੀ ਸ਼ੈਵਾਂ ਹੁੰਦੀਆਂ ਨੇ..ਕਿਸੇ ਨੂੰ ਕੁਝ ਨਹੀਂ ਸੀ ਪਤਾ ਹੁੰਦਾ!

ਲੰਮਾ ਸਾਹ ਭਰ ਆਖਣ ਲੱਗਾ ਕੇ ਅੱਜ ਕੱਲ ਖੁਸ਼ ਹੋ ਕੇ ਬਾਕੀ ਦੁਨੀਆਂ ਨੂੰ ਦਿਖਾਉਣਾ ਇਨਸਾਨ ਦੀ ਮਜਬੂਰੀ ਬਣਾ ਦਿੱਤੀ ਗਈ ਹੈ..ਪਹਿਲਾਂ ਪੁੱਠੇ ਸਿਧੇ ਤਰੀਕਿਆਂ ਨਾਲ ਪੈਸੇ ਕਮਾਉਂਦੇ ਨੇ ਤੇ ਫੇਰ ਇਸਦੀ ਭੱਦੀ ਨੁਮਾਇਸ਼ ਲੱਗਦੀ ਹੈ ਤੇ ਫੇਰ ਇਹ ਭਰਮ ਪਾਲ ਲਿਆ ਜਾਂਦਾ ਏ ਕੇ ਹੁਣ ਬਾਕੀ ਦੀ ਦੁਨੀਆ ਇਸ ਬੇਹੂਦਾ ਨੁਮਾਇਸ਼ ਦਾ ਰੋਹਬ ਝੱਲੂਗੀ..ਜਦੋਂ ਰੋਹਬ ਨਹੀਂ ਝੱਲਦੀ ਤਾਂ ਇਹ ਜੈਨਰੇਸ਼ਨ ਡਿਪ੍ਰੈਸ਼ਨ ਦਾ ਸ਼ਿਕਾਰ ਹੋ ਜਾਂਦੀ…ਬੱਸ ਏਹੀ ਜੜ ਏ ਸਾਰੇ ਪੁਆੜਿਆਂ ਦੀ..!

ਕੁਝ ਦਿਨ ਪਹਿਲਾਂ ਵਾਪਰੀ ਇੱਕ ਘਟਨਾ ਬਾਰੇ ਦੱਸਣ ਲੱਗਾ….
ਸ਼ਹਿਰੋਂ ਗਈਆਂ ਦੋਵੇਂ ਪੋਤਰੀਆਂ ਡਿਨਰ ਟੇਬਲ ਤੇ ਕੋਲ ਕੋਲ ਬੈਠੀਆਂ ਇੱਕ ਦੂਜੇ ਨਾਲ ਟੈਕਸਟਿੰਗ ਕਰ ਰਹੀਆਂ ਸਨ…ਮੈਨੂੰ ਇਹ ਦੇਖ ਗੁੱਸਾ ਚੜ ਗਿਆ ਕੇ ਏਨੀ ਨਜਦੀਕੀ ਹੈ ਤਾਂ ਵੀ ਟੈਕਸਟਿੰਗ..ਦੋਹਾ ਦੇ ਫੋਨ ਖੋਹ ਲਏ ਤੇ ਵਾਈ-ਫਾਈ ਕਨੈਕਸ਼ਨ ਆਫ ਕਰ ਦਿੱਤਾ…ਗੁੱਸੇ ਹੋ ਗਈਆਂ..ਅਗਲੇ ਦਿਨ ਤੜਕੇ ਹੀ ਵਾਪਿਸ ਸ਼ਹਿਰ ਮੁੜ ਗਈਆਂ…
ਕਹਿੰਦਾ ਉਹ ਟਾਈਮ ਦੂਰ ਨਹੀਂ ਜਦੋਂ ਮੂੰਹ ਵਿਚ ਬੁਰਕੀ ਪਾਉਣ ਲਈ ਵੀ ਲੋਕਾਂ ਮਸ਼ੀਨ ਲੱਭਿਆ ਕਰਨੀ ਏ…ਉਸਦੀ ਗੱਲ ਸੁਣ ਮੈਨੂੰ ਪੁਰਖਿਆਂ ਦੀ ਆਖੀ ਚੇਤੇ ਆ ਗਈ ਕੇ ਉਹ ਦਿਨ ਦੂਰ ਨਹੀਂ ਜਦੋਂ ਬੈਗਨ ਤੇ ਤਰਾਂ ਵੀ ਪੌੜੀ ਲਾ ਕੇ ਤੋੜੀਆਂ ਜਾਇਆ ਕਰਨਗੀਆਂ.!
ਉਹ ਗੱਲਾਂ ਕਰੀ ਜਾ ਰਿਹਾ ਸੀ ਤੇ ਮੈਂ ਸੁਣੀ ਜਾ ਰਿਹਾ ਸੀ..ਅਚਾਨਕ ਕੀ ਦੇਖਿਆ ਕੇ ਦੋ ਦਾਹੜੀ ਵਾਲੇ ਮਨੁੱਖਾਂ ਨੂੰ ਇੰਝ ਗੱਲਾਂ ਕਰਦਿਆਂ ਦੇਖ ਆਸੇ ਪਾਸੇ ਲੋਕ ਜੁੜਨ ਲੱਗ ਪਏ…ਸ਼ਾਇਦ ਹੈਰਾਨ ਹੋ ਰਹੇ ਸਨ ਕੇ ਪਤਾ ਨਹੀਂ ਕਿਹੜੇ ਪਲੇਨੇਟ ਚੋਂ ਆਏ ਨੇ..ਇਸ ਆਪੋ-ਧਾਪੀ ਵਾਲੇ ਜਮਾਨੇ ਵਿਚ ਵੀ ਲਗਾਤਾਰ ਗੱਲਬਾਤ ਕਰੀ ਜਾ ਰਹੇ ਨੇ!

ਏਨੇ ਨੂੰ ਕੀ ਦੇਖਿਆ ਕੇ ਸਵਾਰੀਆਂ ਉਤਰਨੀਆਂ ਸ਼ੁਰੂ ਹੋ ਗਈਆਂ ਤੇ ਸਮਾਨ ਵਾਲੀ ਬੈਲਟ ਵੀ ਘੁੰਮਣੀ ਸ਼ੁਰੂ ਹੋ ਗਈ..ਅਤੇ ਫੇਰ ਭਰਿਆ ਮੇਲਾ ਉੱਜੜਨ ਤੇ ਆ ਗਿਆ…

ਪਰ ਫੇਰ ਵੀ ਜਾਂਦਿਆਂ ਜਾਂਦਿਆਂ “Ken” ਮੇਰੇ ਉਸ ਸੈੱਲ ਫੋਨ ਦੀ ਮੈਮੋਰੀ ਵਿਚ ਕੈਦ ਹੋ ਗਿਆ ਜਿਸ ਨੂੰ ਅਸੀਂ ਦੋਵੇਂ ਕਿੰਨੀ ਦੇਰ ਤੋਂ ਭੰਡਦੇ ਆ ਰਹੇ ਸਾਂ…ਫੇਰ ਗਹੁ ਨਾਲ ਤੱਕਿਆ ਤਾਂ ਸੈੱਲ ਫੋਨ ਮੈਨੂੰ ਇਹ ਆਖਦਾ ਪ੍ਰਤੀਤ ਹੋਇਆ ਕੇ ਮਿਤਰੋ ਜੇ ਸਹੀ ਵਰਤੋਂ ਕੀਤੀ ਜਾਵੇ ਤਾਂ ਮੈਂ ਏਡਾ ਬੁਰਾ ਵੀ ਨਹੀਂ ਜਿੰਨਾ ਤੁਸੀ ਸਮਝ ਬੈਠੇ ਓ..!

ਮੇਹਨਤ

by Manpreet Singh January 12, 2019

ਉਹ ਪੰਜ ਜਮਾਤਾਂ ਹੀ ਪਾਸ ਸੀ…ਸ਼ਾਇਦ ਇਸੇ ਲਈ ਹੀ ਕਨੇਡਾ ਆ ਕੇ ਬੜੀ ਮੇਹਨਤ ਕਰਨੀ ਪਈ…ਹਮਾਤੜ ਕੋਲ ਹੋਰ ਕੋਈ ਚਾਰਾ ਵੀ ਤਾਂ ਨਹੀਂ ਸੀ…ਕਦੀ ਕਲੀਨਿੰਗ,ਕਦੀ ਗਰਾਜ ਕਦੀ ਮਸ਼ਰੂਮਾਂ ਦੀ ਫੈਕਟਰੀ ਤੇ ਕਦੀ ਪੀਜਾ ਡਿਲੀਵਰੀ!
ਪਰ ਕੰਮ ਕੱਲੇ ਨੇ ਹੀ ਕੀਤਾ ਤੇ ਨਾਲਦੀ ਨੂੰ ਆਖ ਦਿੱਤਾ ਬੀ ਭਾਗਵਾਨੇ ਘੱਟ ਖਾ ਲਵਾਂਗੇ ਤੂੰ ਬੱਸ ਬੱਚੇ ਸੰਭਾਲ…
ਇਹੋ ਨੇ ਸਾਡਾ ਅਸਲੀ ਸਰਮਾਇਆ..ਬਾਕੀ ਜੋ ਹੋਊ ਆਪੇ ਦੇਖੀ ਜਾਊ…ਕਿਸੇ ਨਾਲ ਵੀ ਨਿੱਕੇ ਪੈਸੇ ਦੀ ਹੇਰਾ ਫੇਰੀ ਨੀ..ਇਥੋਂ ਤੱਕ ਕੇ ਗੌਰਮਿੰਟ ਨੂੰ ਟੈਕਸ ਵੀ ਪੂਰਾ ਭਰਿਆ!

ਮਗਰੋਂ ਥੋੜੀ-ਬਹੁਤ ਹਿੱਸੇ ਆਉਂਦੀ ਵੀ ਸ਼ਰੀਕਾਂ ਨੇ ਦੱਬ ਲਈ..ਅਖੇ ਕਨੇਡਾ ਦੇ ਡਾਲਰ ਕਮਾਉਂਦੇ ਓ ਥੋਨੂ ਕਾਹਦੀ ਲੋੜ ਜਮੀਨ ਦੀ..ਪਰ ਫੇਰ ਵੀ ਮਾਸਾ ਝੋਰਾ ਨੀ ਕੀਤਾ!
ਵਿਆਹਾਂ ਸ਼ਾਦੀਆਂ ਤੇ ਪਾਰਟੀਆਂ ਤੇ ਲੋਕ ਅਕਸਰ ਹੀ ਨਹੁੰਆਂ ਵਿਚ ਫਸੀ ਗ੍ਰੀਸ ਵਾਕਈ ਮੈਲ ਦੇਖ ਮਖੌਲ ਕਰਿਆ ਕਰਦੇ…
ਕੁਝ ਆਖਿਆ ਕਰਦੇ ਕੇ ਮਗਰੋਂ ਆਇਆਂ ਨੇ ਵੱਡੇ ਵੱਡੇ ਘਰ ਲੈ ਲਏ ਪਰ ਤੁਸੀਂ ਅਜੇ ਵੀ ਕਿਰਾਏ ਦੀਆਂ ਬੇਸਮੈਂਟਾਂ ਵਿਚ ਧੱਕੇ ਖਾ ਰਹੇ ਹੋ !
ਇਸੇ ਗੱਲੋਂ ਪਾਰਟੀਆਂ ਤੇ ਵੀ ਜਾਣਾ ਥੋੜਾ ਘੱਟ ਕਰ ਦਿੱਤਾ..ਓਸੇ ਨਾਲ ਥੋੜਾ ਬਹੁਤ ਮੇਲ ਜੋਲ ਰਖਿਆ ਜਿਸਦੇ ਨਾਲ ਸੋਚ ਮਿਲਦੀ ਸੀ ਤੇ ਫੇਰ ਇੱਕ ਦਿਨ ਬਾਬੇ ਨੇ ਮੇਹਰ ਕਰ ਹੀ ਦਿੱਤੀ…

ਜਿਸ ਦਿਨ ਵੱਡਾ ਕਾਕਾ ਸਰਕਾਰੀ ਵਜੀਫੇ ਤੇ ਡਾਕਟਰ ਬਣਿਆ ਤਾਂ ਦੁਨੀਆਂ ਹੈਰਾਨ ਪ੍ਰੇਸ਼ਾਨ ਰਹਿ ਗਈ ਕੇ ਇਹ ਮੁੰਡਾ ਨਾ ਕਦੀ ਕਿਸੇ ਪਾਰਟੀ ਵਿਚ ਦਿਸਿਆ ਤੇ ਨਾ ਹੀ ਕਿਸੇ ਫ਼ੰਕਸ਼ਨ ਚ…ਫੇਰ ਡਾਕਟਰ ਕਦੋਂ ਬਣ ਗਿਆ!
ਵੱਡੇ ਦੀ ਪਾਏ ਪੂਰਨਿਆਂ ਤੇ ਤੁਰਦਾ ਨਿੱਕਾ ਵੀ ਵੈਟਰਨਰੀ ਡਾਕਟਰ ਬਣਨ ਹੀ ਵਾਲਾ ਹੈ..ਨਹੁੰਆਂ ਵਿਚ ਫਸੀ ਮੈਲ ਅਤੇ ਪਾਟੀਆਂ ਜੈਕਟਾਂ ਨੇ ਅਖੀਰ ਨੂੰ ਮੁੱਲ ਮੋੜ ਹੀ ਦਿੱਤਾ ਤੇ ਪੈਰ ਪੈਰ ਤੇ ਕੀਤੇ ਸਰਫ਼ਿਆਂ ਤੇ ਕਿਰਸਾਂ ਨੇ ਵੀ ਰੰਗ ਲਿਆ ਹੀ ਦਿੱਤਾ!

ਜਿਹੜੇ ਲੋਕ ਅਕਸਰ ਹੀ ਠੱਠਾ ਮਖੌਲ ਕਰ ਗੱਲ ਗੱਲ ਤੇ ਨੀਵਾਂ ਦਿਖਾਉਂਦੇ ਹੁੰਦੇ ਸੀ ਹੁਣ ਅਕਸਰ ਹੀ ਫੋਨ ਕਰ ਨਿਆਣਿਆਂ ਦੇ ਰਿਸ਼ਤਿਆਂ ਦੀ ਗੱਲ ਤੋਰ ਲਿਆ ਕਰਦੇ ਨੇ…ਪਰ ਨਿਆਣਿਆਂ ਨੂੰ ਸਾਫ ਸਾਫ ਆਖ ਦਿੱਤਾ ਕੇ ਭਾਈ ਤੁਸੀਂ ਸਾਰੀ ਉਮਰ ਸਾਡੇ ਨਾਲ ਤੰਗੀਆਂ-ਤੁਰਸ਼ੀਆਂ ਕੱਟਦੇ ਹੋਏ ਕਦੀ ਮੱਥੇ ਵੱਟ ਨੀ ਪਾਇਆ..ਸੋ ਹੁਣ ਥੋਨੂੰ ਪੂਰੀ ਖੁੱਲ ਏ ਜਿੰਦਗੀ ਦਾ ਹਰ ਫੈਸਲਾ ਲੈਣ ਦੀ…ਪਰ ਫੈਸਲਾ ਲੈਣ ਲੱਗਿਆਂ ਆਪਣੇ ਵੱਡੇ ਵਡੇਰੇ ਜਰੂਰ ਯਾਦ ਕਰ ਲਿਆ ਜੇ

ਅਨੇਕਾਂ ਵਾਰ ਕਈ ਐਸੇ ਮੋੜ ਵੀ ਆਏ ਕੇ ਬੰਦ ਕਮਰੇ ਵਿਚ ਬੱਤੀ ਬੰਦ ਕਰ ਕਲਿਆਂ ਅਥਰੂ ਵੀ ਵਗਾਉਣੇ ਪਏ ਪਰ ਨਿਆਣਿਆਂ ਸਾਹਵੇਂ ਹਮੇਸ਼ਾਂ ਹੀ ਖਿੜੇ ਮੱਥੇ ਹੀ ਆਇਆ…ਕਦੀ ਵੀ ਵਿੱਤੋਂ ਬਾਹਰ ਜਾ ਕੇ ਕਿਸੇ ਦੀ ਰੀਸ ਨੀ ਕੀਤੀ ਤੇ ਨਾ ਹੀ ਬੇਲੋੜੀਆਂ ਖਾਹਸ਼ਾਂ ਨੂੰ ਦਿਮਾਗ ਤੇ ਹਾਵੀ ਹੋਣ ਦਿੱਤਾ!

ਮੈਨੂੰ ਉਸਦੀ ਵਿਥਿਆ ਸੁਣ ਕਿਸੇ ਦੀ ਕਹੀ ਪੁਰਾਣੀ ਗੱਲ ਯਾਦ ਆ ਗਈ ਕੇ..

“ਸੁਵੇਰ ਦੀਆਂ ਖਾਹਸ਼ਾਂ ਸ਼ਾਮਾਂ ਤੀਕ ਟਾਲਦੇ ਗਏ..ਤੇ ਬੱਸ ਏਦਾਂ ਹੀ ਖਿੱਲਰਦੀ ਹੋਈ ਜਿੰਦਗੀ ਸੰਭਾਲਦੇ ਗਏ

ਬੰਦੇ ਦਾ ਸਿਰ

by Manpreet Singh January 9, 2019

ਅਸੀਂ ਤੀਜੀ ਜਾਂ ਚੌਥੀ ਚ ਪੜ੍ਹਦੇ ਸੀ ਸ਼ਾਇਦ ਉਦੋਂ ! ਮੇਰੇ ਨਾਲ ਸਾਡੇ ਪਿੰਡ ਦਾ ਤਰਖਾਣਾਂ ਦਾ ਮੁੰਡਾ ਸੀ ਤੇ ਅਸੀਂ ਦੁਪਹਿਰ ਨੂੰ ਦੋਨੋ ਜਣੇ ਬਾਹਰ ਛੱਪੜ ਦੇ ਉੱਪਰ ਪਿੱਪਲ਼ ਨਾਲ ਪਾਈ ਪੀਂਘ ਝੂਟਣ ਚਲੇ ਗਏ ! ਪਿੱਪਲ਼ ਦੇ ਦੁਆਲੇ ਇਕ ਚੌਂਤੜਾ ਬਣਾਇਆਂ ਹੋਇਆ ਸੀ ਤੇ ਅਸੀਂ ਉਹਦੇ ਉੱਪਰ ਖੇਡਣ ਲੱਗ ਪਏ ! ਕੁਦਰਤੀ ਸਾਡੀ ਨਿਗਾਹ ਉੱਪਰ ਨੂੰ ਪਈ ਤੇ ਉੱਥੇ ਇਕ ਬੰਦੇ ਦਾ ਸਿਰ ਲਟਕਿਆ ਹੋਇਆ ਲੱਗਿਆ ! ਮੈ ਜਦੋਂ ਉਹਨੂੰ ਉਂਗਲ ਕਰਕੇ ਉਪਰ ਨੂੰ ਦਿਖਾਇਆ ਤੇ ਪੁਛਿਆ ਔਹ ਕੀ ਹੈ ? ਉਹਨੇ ਵੀ ਉਹੀ ਕਿਹਾ ਕਿ ਬੰਦੇ ਦਾ ਸਿਰ ਹੈ ! ਅਸੀਂ ਦੋਨੋ ਜਣੇ ਚੀਕਾਂ ਮਾਰਦੇ ਪਿੰਡ ਨੂੰ ਭੱਜ ਲਏ ! ਛੱਪੜ ਦੇ ਦੂਜੇ ਪਾਸੇ ਪਿੰਡ ਦੇ ਸਿਵੇ ਸੀ ! ਪਿੰਡ ਜਾ ਕੇ ਦੁਹਾਈ ਚੱਕਤੀ ਕਿ ਪਿੱਪਲ਼ ਨਾਲ ਬੰਦੇ ਦਾ ਸਿਰ ਲਟਕਦਾ ! ਇਕ ਤੋਂ ਦੂਜੇ ਨੂੰ ਸਾਰਾ ਪਿੰਡ ਦੱਸਣ ਲੱਗ ਪਿਆ ਤੇ ਸਾਰੇ ਪਿੰਡ ਦੀਆਂ ਜ਼ਨਾਨੀਆਂ ਬੰਦੇ ਪਿੱਪਲ਼ ਥੱਲੇ ਜਾ ਕੇ ਬੰਦੇ ਦਾ ਸਿਰ ਲੱਭਣ ! ਉੱਥੇ ਕੋਈ ਕਹਿ ਦੇਵੇ ਹੈਗਾ ਕੋਈ ਕਹੇ ਐਵੇਂ ਭਕਾਈ ਮਾਰਦੇ ! ਦੋ ਦਿਨ ਪਿੰਡ ਚ ਏਹੀ ਸ਼ੋਰ ਸ਼ਰਾਬਾ ਚੱਲਦਾ ਰਿਹਾ ! ਦੂਜੇ ਦਿਨ ਮੇਰੀ ਮਾਂ ਨੇ ਮੈਨੂੰ ਬਾਹੋਂ ਫੜਿਆ ਤੇ ਨਾਲ ਲੈ ਕੇ ਤੁਰ ਪਈ ! ਪਿੱਪਲ਼ ਥੱਲੇ ਲਿਜਾ ਕੇ ਖੜਾ ਕਰਤਾ ਕਹਿੰਦੀ ਦਿਖਾ ਕਿੱਥੇ ਹੈ ? ਪਹਿਲਾਂ ਤਾਂ ਮੈਨੂੰ ਚੇਤੇ ਨ ਆਵੇ ਕਿ ਕਿਹੜੇ ਡਾਲੇ ਨਾਲ ਸੀ ਪਰ ਫੇਰ ਪਤਿਆਂ ਵਿਚੀਂ ਲੱਭ ਲੱਭ ਕੇ ਇਕ ਜੋੜ ਵੱਲ ਉੰਗਲ ਕੀਤੀ ਕਿ ਔਹ ਦੇਖ ! ਮਾਂ ਨੇ ਇਕ ਮਾਰੀ ਕਹਿੰਦੀ ਸਾਰੇ ਪਿੰਡ ਨੂੰ ਵਖਤ ਪਾ ਤਾ ਤੂੰ ਤੇ ਤਖਾਣਾਂ ਦੇ ਮੁੰਡੇ ਨੇ ! ਉਹ ਤਾਂ ਡਾਹਣੇ ਦਾ ਜੋੜ ਹੈ ! ਮੈਨੂੰ ਵੀ ਫੇਰ ਉਹ ਸਾਫ਼ ਸਾਫ਼ ਦਿਸਣ ਲੱਗ ਪਿਆ ਕਿ ਇਹ ਤਾਂ ਪਿੱਪਲ਼ ਦੇ ਡਾਹਣੇ ਦੀ ਗੰਢ ਜਹੀ ਹੈ !
ਇਹੋ ਜਹੀਆਂ ਗੱਲਾਂ ਉਦੋਂ ਆਮ ਸੁਣੀਦੀਆਂ ਸੀ ! ਕਦੀ ਧਰਤੀ ਚੋ ਖੂਹ ਪਟਦਿਆਂ ਨੂੰ ਇਕ ਗਿਠਮੁਠੀਆ ਬੰਦਾ ਮਿਲਿਆ ਜੋ ਧਰਤੀ ਦੇ ਥੱਲੇ ਰਹਿੰਦਾ ਹੈ ! ਕਦੀ ਕਿਸੇ ਨੇ ਸ਼ਲੇਡਾ ਦੇਖਿਆ ਤੇ ਉਹ ਕਦੀ ਬੰਦਾ ਬਣ ਜਾਂਦਾ ਸੀ ਕਦੀ ਸੱਪ ਤੇ ਕਦੀ ਸ਼ੇਰ !
ਕਿਸੇ ਨੂੰ ਸਿਵਿਆਂ ਚ ਭੂਤ ਨੱਚਦੇ ਦਿਸ ਪੈਣੇ ਤੇ ਕਦੀ ਕਿਸੇ ਨੂੰ ਅੱਗ ਭੱਜੀ ਜਾਂਦੀ ਦਿਸ ਪੈੰਦੀ ਸੀ !
ਇਹੋ ਜਹੀਆਂ ਗੱਲਾਂ ਗਪੌੜ ਜਾਂ ਝੂਠੀਆਂ ਗੱਲਾਂ ਕਦੀ ਕਦੀ ਪਿੰਡਾਂ ਚ ਆਮ ਸੁਣਦੀਆਂ ਸੀ ! ਜਿਹਦਾ ਨ ਕੋਈ ਧੁਰਾ ਨ ਕੋਈ ਥਾਂ ਤੇ ਨ ਕੋਈ ਪਤਾ ਕਿਹਨੇ ਗੱਲ ਬਣਾ ਕੇ ਅੱਗੇ ਤੋਰ ਦਿੱਤੀ ਹੈ ! ਲੋਕ ਯਕੀਨ ਕਰਕੇ ਡਰਦੇ ਤ੍ਰਾਹ ਤ੍ਰਾਹ ਕਰਨ ਲੱਗ ਪੈਂਦੇ ਸੀ !
ਅੱਜ ਉਹੀ ਲੋਕ ਇਹੋ ਜਹੀਆਂ ਮਨ-ਘੜਤ ਗੱਲਾਂ ਜਾਂ ਖ਼ਬਰਾਂ ਫੇਸਬੁਕ ਤੇ ਇਕ ਦੂਜੇ ਨੂੰ ਦੱਸਣ ਲੱਗੇ ਮਿੰਟ ਨੀ ਲਾਉਂਦੇ ਨ ਪਤਾ ਲਗਦਾ ਕਿ ਕਿਹਨੇ ਗੱਲ ਬਣਾਈ ਹੈ ਤੇ ਇਹਦਾ ਫ਼ਾਇਦਾ ਨੁਕਸਾਨ ਕਿਹਨੂੰ ਹੋ ਰਿਹਾ !
ਫੇਸਬੁਕ ਤੇ ਪਿੱਪਲ਼ ਦੇ ਡਾਹਣੇ ਤੋਂ ਰੋਜ਼ ਬੰਦੇ ਦਾ ਸਿਰ ਵੱਡਿਆ ਦਿਖਾਈ ਦਿੰਦਾ ਹੈ ! ਜੇ ਨਹੀਂ ਯਕੀਨ ਤਾਂ ਤੁਸੀਂ ਕੋਈ ਝੂਠੀ ਖ਼ਬਰ ਦੀ ਪੋਸਟ ਪਾ ਦਿਉ ਤੇ ਉਹ ਅੱਗੇ ਤੋਂ ਅੱਗੇ ਅੱਗ ਲੱਗੀ ਵਾਂਗ ਫੈਲਦੀ ਚਲੀ ਜਾਂਦੀ ਹੈ ! ਫੇਰ ਨ ਕਿਸੇ ਨੂੰ ਪਤਾ ਲਗਦਾ ਕਿ ਕਿਹਨੇ ਇਹ ਸ਼ਰਾਰਤ ਕੀਤੀ ਹੈ ਤੇ ਨ ਹੀ ਕੋਈ ਇਹਨੂੰ ਰੋਕ ਸਕਦਾ ! ਫੇਰ ਫੇਸਬੁਕ ਦਾ ਸਾਰਾ ਪਿੰਡ ਪਿੱਪਲ਼ ਤੇ ਟੰਗੇ ਹੋਏ ਸਿਰ ਨੂੰ ਮੂਰਖਾਂ ਵਾੰਗ ਨਿਆਣਿਆਂ ਤੇ ਯਕੀਨ ਕਰਕੇ ਦੇਖਣ ਲਈ ਇਕ ਦੂਜੇ ਤੋਂ ਮੋਹਰੇ ਹੋ ਤੁਰਦਾ !
ਜੇ ਕੋਈ ਰੋਕਣ ਦੀ ਗੱਲ ਕਰੇ ਜਾਂ ਕੋਈ ਸੱਚ ਦੱਸੇ ਫੇਰ ਉਹਦੀ ਹਾਲਤ ਇਸ ਤਰਾਂ ਦੀ ਹੁੰਦੀ ਹੈ ਜਿਵੇਂ ਖਰਸ ਪਏ ਕੁੱਤੇ ਨੂੰ ਕੋਈ ਲਾਗੇ ਨ ਲੱਗਣ ਦੇਵੇ !
ਹਰ ਗੱਲ ਸੱਚ ਵੀ ਨਹੀਂ ਹੁੰਦੀ ਤੇ ਹਰ ਗੱਲ ਝੂਠ ਵੀ ਨਹੀਂ ਹੁੰਦੀ !

ਇਹ ਸਾਨੂੰ ਖ਼ੁਦ ਨੂੰ ਸੋਚਣਾ ਪੈਣਾ ਕਿ ਅਸੀਂ ਆਪਦੀ ਜਾਂ ਕਿਸੇ ਦੀ ਜ਼ਿੰਦਗੀ ਨ ਤਬਾਹ ਕਰ ਦੇਈਏ ਸਿਰਫ ਆਪਦੇ ਦੋ ਮਿੰਟ ਦੇ ਸ਼ੁਗ਼ਲ ਖਾਤਿਰ !

ਦੁੱਖ ਸੁਖ

by Manpreet Singh January 4, 2019

ਮੇਰੀ ਸਮਝ ਮੁਤਾਬਿਕ ਹਵਾਈ ਜਹਾਜ ਦੇ ਸਫ਼ਰ ਦੌਰਾਨ ਪਿੱਛੇ ਬੈਠਾ ਡੈਡ ਅਚਾਨਕ ਕੀ ਦੇਖਦਾ ਏ ਕੇ ਅਗਲੀ ਸੀਟ ਤੇ ਬੈਠੀ ਧੀ ਨੂੰ ਨੀਂਦ ਦੇ ਝੋਕੇ ਆ ਰਹੇ ਨੇ..ਓਸੇ ਵੇਲੇ ਆਪਣਾ ਹੱਥ ਉਸਦੇ ਸਿਰ ਹੇਠ ਰੱਖ ਦਿੰਦਾ ਏ ਤਾਂ ਕੇ ਸੀਟ ਦੀ ਬਾਹੀ ਨਾ ਚੁਭੇ…ਸ਼ਾਇਦ ਏਹੀ ਹੁੰਦੀ ਏ ਇਕ ਬਾਪ ਦਾ ਪਰਿਭਾਸ਼ਾ…

ਕਾਫੀ ਚਿਰ ਪਹਿਲਾਂ ਪੰਜਾਬ ਸਿਵਿਲ ਸਰਵਿਸਜ਼ ਦੇ ਪੇਪਰ ਵੇਲੇ ਦਾ ਟਾਈਮ ਚੇਤੇ ਆ ਗਿਆ..ਮਈ ਮਹੀਨੇ ਦੀ ਗਰਮੀ ਵਿਚ ਪਟਿਆਲੇ ਫਾਰਮ ਲੈਣ ਲਈ ਲੱਗੀ ਲੰਮੀ ਲੈਣ ਵਿਚ ਮੇਰੇ ਤੋਂ ਅੱਗੇ ਇੱਕ ਕੁੜੀ ਸੀ..ਸ਼ਾਇਦ ਤੇਜ ਬੁਖਾਰ ਵੀ ਸੀ ਉਸਨੂੰ…!

ਦੋ ਘੰਟੇ ਲਾਈਨ ਵਿਚ ਖਲੋਤੀ ਰਹੀ ਦੇ ਬਾਪ ਨੇ ਓਨੀ ਦੇਰ ਤੱਕ ਉਸਦੇ ਸਿਰ ਤੇ ਛੱਤਰੀ ਤਾਣੀ ਰੱਖੀ ਜਿੰਨੀ ਦੇਰ ਉਸਦੀ ਵਾਰੀ ਨਾ ਆ ਗਈ ਅਤੇ ਨਾਲ ਨਾਲ ਉਸਨੂੰ ਪਾਣੀ ਪਿਲਾਉਣਾ ਵੀ ਜਾਰੀ ਰਖਿਆ…
ਕਿੰਨਾ ਔਖਾ ਹੁੰਦਾ ਇੱਕ ਮੱਧਵਰਗੀ ਬਾਪ ਦੀ ਮਨੋਸਤਿਥੀ ਦਾ ਭੇਦ ਪਾਉਣਾ ਜਦੋਂ ਉਹ ਜੁਆਨ ਧੀ ਦੀ ਰਾਖੀ ਲਈ ਤਿਆਰ ਭਰ ਤਿਆਰ ਖਲੋਤਾ ਹੁੰਦਾ ਏ

ਮੈਂ ਲਾਈਨ ਵਿਚ ਉਸਦੇ ਮਗਰ ਲੱਗਾ ਉਸ ਬਾਪ ਦੀ ਮਾਨਸਿਕਤਾ ਪਹਿਚਾਣ ਗਿਆ..ਸ਼ਾਇਦ ਸੋਚ ਰਿਹਾ ਸੀ ਕੇ ਕੋਈ ਅਗਿਓਂ ਜਾਂ ਫੇਰ ਪਿੱਛੋਂ ਛੇੜਖਾਨੀ ਨਾ ਕਰੇ…
ਮੇਰੀ ਬੋਧਿਕਤਾ ਏਨੀ ਵਿਕਸਿਤ ਨਹੀਂ ਸੀ ਹੋਈ ਕੇ ਆਖ ਸਕਦਾ ਕੇ ਅੰਕਲ ਜੀ ਪਿੱਛੇ ਦਾ ਫਿਕਰ ਨਾ ਕਰੋ…ਏਨਾ ਗਿਰਿਆ ਹੋਇਆ ਨਹੀਂ ਹਾਂ..ਘਰੇ ਮੇਰੀ ਵੀ ਇੱਕ ਭੈਣ ਏ!

ਅਮ੍ਰਿਤਸਰ ਮੱਸਿਆ ਸੰਕਰਾਂਦ ਨੂੰ ਦਰਬਾਰ ਸਾਬ ਗਿਆ ਕਈ ਵਾਰ ਮਹਿਸੂਸ ਹੁੰਦਾ ਕੇ ਇਨਸਾਨੀ ਮਾਨਸਿਕਤਾ ਕਿੰਨੀ ਗਰਕ ਹੋਈ ਜਾਂਦੀ ਏ..ਦਰਸ਼ਨਾਂ ਨੂੰ ਆਈਆਂ ਕਈ ਬੀਬੀਆਂ ਦਾ ਦਰਸ਼ਨੀ ਡਿਓਢੀ ਤੋਂ ਹਰਿਮੰਦਰ ਸਾਹਿਬ ਤੱਕ ਦਾ ਸਫ਼ਰ ਵੀ ਕਿੰਨਾ ਔਖਾ ਤਹਿ ਹੁੰਦਾ…ਪਿੱਛੋਂ ਜਾਣ ਬੁਝਕੇ ਵੱਜਦੇ ਧੱਕੇ ਅਤੇ ਹੁੰਦੀਆਂ ਛੇੜਖਾਨੀਆਂ..ਕੋਈ ਆਖੇ ਤੇ ਕੀ ਆਖੇ!

ਬਟਾਲੇ ਤੋਂ ਸੁਵੇਰੇ ਸਾਡੇ ਸੱਤ ਵਜੇ ਤੁਰਦੀ ਸੁਵਾਰੀ ਗੱਡੀ ਜਦੋਂ ਅੱਠ ਕੂ ਵਜੇ ਵੇਰਕੇ ਟੇਸ਼ਨ ਤੇ ਪੁੱਜਦੀ ਤਾਂ ਇੱਕ ਖਾਸ ਡੱਬੇ ਵਿਚ ਦਾਖਿਲ ਹੁੰਦੀਆਂ ਅਮ੍ਰਿਤਸਰ ਸਕੂਲ ਕਾਲਜ ਪੜਨ ਜਾਂਦੀਆਂ ਨੂੰ ਦੇਖ ਬਾਕੀ ਡੱਬਿਆਂ ਦੀ ਮੰਡੀਰ ਵੀ ਧੂ ਕੇ ਏਧਰ ਨੂੰ ਹੋ ਤੁਰਦੀ…ਵਿਚਾਰੀਆਂ ਦੀ ਗਰੀਬੀ ਅਤੇ ਲਾਚਾਰੀ ਜੁਬਾਨ ਨੂੰ ਜਿੰਦਰੇ ਲਾ ਦਿੰਦੀ ਅਤੇ ਬੇਬਸੀ ਨਜਰਾਂ ਰਾਹੀ ਪ੍ਰਕਟ ਹੁੰਦੀ..

ਮੈਨੂੰ ਯਾਦ ਏ ਸ਼ਾਇਦ ਅਠਨਵੇਂ ਦੀ ਗੱਲ ਸੀ..ਇੱਕ ਨਵੇਂ ਵਿਆਹੇ ਜੋੜੇ ਨੇ ਹੋਟਲ ਕਮਰਾ ਬੁਕ ਕਰਵਾਇਆ…ਦੋ ਦਿਨ ਮਗਰੋਂ ਜਦੋਂ ਤੁਰ ਗਏ ਤਾਂ ਹਜਾਰ ਕੂ ਦਾ ਬਿੱਲ ਅਜੇ ਬਕਾਇਆ ਸੀ..ਕੁੜੀ ਦਾ ਚੂੜਾ ਬਾਥਰੂਮ ਦੇ ਡਸਟਬਿਨ ਵਿਚ ਪਿਆ ਮਿਲਿਆ
ਕੱਪੜੇ ਤੇ ਹੋਰ ਨਿੱਕ ਸੁੱਕ ਵੀ ਓਥੇ ਖਿੱਲਰਿਆ ਪਿਆ ਸੀ…
ਮਿਲੇ ਹੋਏ ਨੰਬਰ ਤੇ ਫੋਨ ਕੀਤਾ ਤਾਂ ਅੱਗੋਂ ਕਿਸੇ ਨੇ ਫਗਵਾੜੇ ਤੋਂ ਫੋਨ ਚੁੱਕਿਆ..
ਸਾਰੀ ਗੱਲ ਦੱਸੀ ਤਾਂ ਅਗਲੇ ਦਿਨ ਹੀ ਹਮਾਤੜ ਆਣ ਪਹੁੰਚਿਆ…
ਆਖਣ ਲੱਗਾ ਕੇ ਮਾਪਿਆਂ ਦੀ ਮਰਜੀ ਖਿਲਾਫ ਵਿਆਹ ਕਰਵਾਇਆ ਸੀ ਦੋਵਾਂ ਨੇ ਤੇ ਮੁੜ ਹਫਤੇ ਮਗਰੋਂ ਹੀ ਦੋਹਾਂ ਗੱਡੀ ਹੇਠ ਸਿਰ ਦੇ ਦਿੱਤਾ…!

ਮੈਂ ਇੰਨੀ ਗੱਲ ਸੁਣ ਸੁੰਨ ਹੋ ਗਿਆ ਅਤੇ ਉਹ ਜਾਂਦਿਆਂ ਹੋਇਆ ਪੁੱਛਣ ਲੱਗਾ ਕੇ ਵਿਆਹ ਹੋ ਗਿਆ ਤੇਰਾ? ਆਖਿਆ ਨਹੀਂ..
ਆਖਣ ਲੱਗਾ ਕੇ ਜਦੋਂ ਕਦੇ ਘਰੇ ਧੀ ਹੋਈ ਤਾਂ ਉਸ ਨਾਲ ਗੱਲ ਜਰੂਰ ਕਰਿਆ ਕਰੀ..ਨਹੀਂ ਤਾਂ ਇਹ ਪਿਓ ਦਾ ਪਿਆਰ ਬਾਹਰੋਂ ਭਾਲਣ ਲੱਗ ਜਾਂਦੀਆਂ..ਮੈਥੋਂ ਬੱਸ ਇਹੋ ਭੁੱਲ ਹੋ ਗਈ..

ਮੈਨੂੰ ਉਸ ਵੇਲੇ ਤਾਂ ਇਸ ਗੱਲ ਦੀ ਕੋਈ ਖਾਸ ਸਮਝ ਨਹੀਂ ਲਗੀ ਪਰ ਹੁਣ ਸਮੇ ਨੇ ਸ਼ੀਸ਼ੇ ਤੇ ਪਈ ਗਰਦ ਐਨ ਸਾਫ ਕਰ ਦਿੱਤੀ!
ਆਥਣ ਵੇਲੇ ਘੱਟੋ ਘੱਟ ਘੰਟਾ ਭਰ ਬੈਠ ਸਾਰੇ ਪਰਵਾਰ ਨਾਲ ਦੁੱਖ ਸੁਖ ਫਰੋਲ ਹੀ ਲਈਦਾ ਏ..ਮਨ ਹੌਲਾ ਜਿਹਾ ਹੋ ਜਾਂਦਾ ਏ

ਜ਼ਿੰਦਗੀ ਇੱਕ ਕਿਤਾਬ

by Manpreet Singh January 3, 2019

ਜ਼ਿੰਦਗੀ ਕੋਈ ਫਿਲਮ ਤਾਂ ਨਹੀਂ ਜਿਸਨੂੰ ਤੁਸੀਂ ਮਨ ਚਾਹੇ ਢੰਗ ਨਾਲ ਪੇਸ਼ ਕਰ ਲਉਗੇ ਪਰ ਜ਼ਿੰਦਗੀ ਇੱਕ ਕਿਤਾਬ ਜ਼ਰੂਰ ਹੋ ਸਕਦੀ ਏ ਜਿਸਨੂੰ ਤੁਸੀਂ ਆਪਣੇ ਢੰਗ ਨਾਲ ਲਿਖ ਸਕਦੇ ਉ। ਹਰ ਇੱਕ ਪੰਨਾ ਹਰ ਆਮ ਦਿਨ ਵਾਂਗੂੰ, ਜੋ ਗਲਤੀ ਪਿਛਲੇ ਪੰਨੇ ਤੇ ਕੀਤੀ ਸੀ ਕੋਸ਼ਿਸ਼ ਕਰੋ ਕਿ ਉਹ ਦੁਬਾਰਾ ਨਾ ਦੁਹਰਾਉ। ਕੱਟ ਕਟਾ ਕਿ ਹੀ ਕਵਿਤਾਵਾਂ ਗੀਤ ਪੂਰੇ ਹੁੰਦੇ ਨੇ। ਗਲਤੀਆਂ ਤੋਂ ਭੱਜੋ ਨਾ, ਹੱਸ ਕੇ ਕਬੂਲ ਕਰੋ। ਜ਼ਿੰਦਗੀ ਨੂੰ ਜਿਉਣ ਤੇ ਕੱਟਣ ਵਿਚਲਾ ਫਰਕ ਜਿੰਨੀ ਛੇਤੀ ਜਾਣ ਲਉਗੇ, ਇਸ ਸਫਰ ਨਾਲ ਉਨੀ ਛੇਤੀ ਮੋਹ ਵਧ ਜਾਵੇਗਾ। ਕਦੇ ਵੀ ਕਿਸੇ ਦੀ ਨਿੱਜੀ ਜ਼ਿੰਦਗੀ ਤੇ ਟਿੱਪਣੀ ਨਾ ਕਰੋ, ਚਾਹੇ ਨੈੱਟ ਤੇ ਚਾਹੇ ਅਸਲੀਅਤ ‘ਚ, ਹਮੇਸ਼ਾਂ ਆਪਣੇ ਤੇ ਆਪਣੇ ਪਰਿਵਾਰ ਤੱਕ ਸੀਮਤ ਰਹੋ। ਟੀਚੇ ਮਿੱਥੋ ਤੇ ਉਹਨਾਂ ਲਈ ਕੰਮ ਕਰੋ, ਸ਼ੋਸ਼ਲ ਮੀਡੀਆ ਇਸ ਖੂਬਸੂਰਤ ਤੇ ਮੌਕਿਆਂ ਭਰੀ ਦੁਨੀਆਂ ਦਾ ਇੱਕ ਰੰਗਲਾ ਪੜਾਅ ਏ ਪਰ ਅੰਤ ਨੀ। ਚੁਗਲੀ, ਖਹਿਬਾਜੀ, ਗਰੁੱਪਾਂ, ਈਰਖਾ ਨੇ ਤੁਹਾਡਾ ਅੰਦਰ ਸਾੜ ਦੇਣਾ ਤੇ ਆਪਾਂ ਇਹ ਕਰਨ ਨੀ ਆਏ ਐਥੇ ਕਿ ਨਹੀਂ..!

ਮੈਂ ਅਕਸਰ ਪੜਿਆ ਤੇ ਸੁਣਿਆ ਸੀ ਕਿ ਜੇ ਸੱਚ ਬੋਲੋਗੇ, ਛਿੱਤਰ ਖਾਉਗੇ। ਇਹ ਤਜਰਬਾ ਹੋਇਆ ਵੀ ਆ ਪਰ ਮੈਂ ਝੂਠ ਤੋਂ ਹਲੇ ਵੀ ਦੂਰ ਹੀ ਰਹਿਣ ਦੀ ਕੋਸ਼ਿਸ਼ ਕਰਦਾ। ਸੱਚ ਜਾਣ ਲਉ ਬਹੁਤ ਕੁੱਝ ਆਸਾਨ ਹੋ ਜਾਵੇਗਾ ਪਰ ਇਹ ਆਸ ਕਦੇ ਨਾ ਕਰਨਾ ਕਿ ਤੁਹਾਡਾ ਆਲਾ-ਦੁਆਲਾ ਵੀ ਉਸ ਸੱਚ ਨੂੰ ਉਵੇਂ ਹੀ ਕਬੂਲੇਗਾ ਜਿਸ ਤਰ੍ਹਾਂ ਤੁਸੀਂ ਕਬੂਲਿਆ ਹੈ। ਜ਼ਿੰਦਗੀ ਇੱਕ ਜੰਗ ਹੈ ਤੇ ਇਸਨੂੰ ਤੁਸੀਂ ਖੁਦ ਹੀ ਲੜ ਕੇ ਜਿੱਤ ਸਕਦੇ ਹੋ। ਦੂਜੇ ਤੁਹਾਡੇ ਲਈ ਪ੍ਰੇਰਣਾ ਸਰੋਤ ਹੋ ਸਕਦੇ ਨੇ ਪਰ ਉਹ ਕਦੇ ਵੀ ਤੁਹਾਡੀ ਲੜਾਈ ਨਹੀਂ ਲੜਨਗੇ। ਇਸ ਲਈ ਕਦੇ ਵੀ ਆਪਣੇ ਆਪ ਤੋਂ ਨਾ ਭੱਜੋ, ਜੇ ਤੁਹਾਨੂੰ ਪਤਾ ਹੈ ਕਿ ਸਵੇਰੇ ਸਾਜਰੇ ਉੱਠ ਕੇ ਤੁਸੀਂ ਕੋਈ ਕੰਮ ਨੇਪਰੇ ਚਾੜ੍ਹ ਸਕਦੇ ਹੋ ਤਾਂ ਅੱਖਾਂ ਨਾ ਮੀਚੋ। ਇਹ ਸਾਰੀ ਦੁਨੀਆਂ ਤੁਹਾਨੂੰ ਧੋਖਾ ਦਿੰਦੀ ਫਿਰਦੀ ਆ ਪਰ ਤੁਸੀਂ ਆਪਣੇ ਆਪ ਨਾਲ ਧੋਖਾ ਨਾ ਕਰੋ। ਕਦੇ ਵੀ ਆਪਣੇ ਆਪ ਨੂੰ ਝੂਠ ਨਾ ਬੋਲੋ। ਕਦੇ ਵੀ ਆਪਣੇ ਲਏ ਫੈਸਲੇ ਤੇ ਸ਼ੱਕ ਨਾ ਕਰੋ, ਜੇ ਦੋ ਚਿੱਤਾ ਚਿੱਤ ਹੋਵੇ ਤਾਂ ਦੂਜੀ ਵਾਰ ਵਿਚਾਰ ਕਰ ਲਉ ਪਰ ਮੰਜ਼ਿਲ ਕਿਸੇ ਇੱਕ ਰਾਹ ਤੇ ਹੀ ਮਿਲੇਗੀ ਦੋਵਾਂ ਤੇ ਨਹੀਂ। ਅੰਗ੍ਰੇਜ਼ੀ ਦੇ ਸ਼ਬਦਾਂ ਅਨੁਸਾਰ ਸਥਿਤੀ ਨੂੰ ਹਮੇਸ਼ਾ accept ਕਰੋ ਨਾ ਕਿ expect ਕਿ ਕਾਸ਼ ਇਸ ਤਰ੍ਹਾਂ ਹੋ ਜਾਂਦਾ। ਕਾਸ਼ ਤੇ ਹਕੀਕਤ ਵਿੱਚ ਫਰਕ ਹੁੰਦਾ ਏ ਤੇ ਜਦੋਂ ਤੁਸੀਂ ਇਹ ਮੰਨ ਲੈਂਦੇ ਹੋ ਤਾਂ ਅੱਗੇ ਵਧਣਾ ਬਹੁਤ ਆਸਾਨ ਹੋ ਜਾਂਦਾ ਏ।

ਮੈਂ ਜ਼ਿੰਦਗੀ ‘ਚ ਬਹੁਤ ਗਲਤੀਆਂ ਵੀ ਕੀਤੀਆਂ, ਬਹੁਤ ਕੁੱਝ ਸਿੱਖਿਆ ਵੀ, ਬਹੁਤ ਗਲਤ ਫੈਸਲੇ ਵੀ ਲਏ ਪਰ ਅੱਜ ਜ਼ਿੰਦਗੀ ਦੇ ਜਿਸ ਮੋੜ ਤੇ ਹਾਂ, ਬੜਾ ਸ਼ੰਤੁਸ਼ਟ ਹਾਂ। ਫੇਸਬੁਕ ਨੇ ਬਹੁਤ ਸਾਰੇ ਪਿਆਰ ਕਰਨ ਵਾਲੇ ਦਿੱਤੇ ਨੇ, ਸਭ ਦਾ ਬੜਾ ਰਿਣੀ ਹਾਂ। ਸਾਰਿਆਂ ਦਾ ਧੰਨਵਾਦ, ਸਾਰਿਆਂ ਨੂੰ ਪਿਆਰ ਅਤੇ ਸਤਿਕਾਰ। ਆਉ ਪਿਆਰ ਤੇ ਹਾਸੇ ਵੰਡੀਏ। ਜ਼ਿੰਦਗੀ ਜ਼ਿੰਦਾਬਾਦ ~

 

ਹੱਦੋਂ ਵੱਧ

by Manpreet Singh January 3, 2019

ਮੈ ਜਦੋਂ ਵੀ ਵਰਜਿਸ਼ ਕਰਨੀ ਉਦੋਂ ਹੀ ਮੇਰੇ ਸਿਰ ਵਿੱਚ ਚੀਸ ਪੈਣੀ ਸ਼ੁਰੂ ਹੋ ਜਾਣੀ । ਮੈ ਆਖਿਰ ਡਾਕਟਰ ਕੋਲ ਜਾ ਵੜਿਆ ਤੇ ਉਹ ਕਹਿੰਦਾ Don’t overdo it . ਕਿ ਹੱਦੋਂ ਵੱਧ ਨ ਕਰਿਆ ਕਰ । ਮੈ ਕਿਹਾ ਮੈ ਤਾਂ ਇੰਨੀ ਕੁ ਕਰਦਾਂ ਉਹਨੇ ਸੁਲਾਹ ਦਿੱਤੀ ਕਿ ਇਸ ਤੋਂ ਵੀ ਅੱਧੀ ਕਰਦੇ । ਹੌਲੀ ਹੌਲੀ ਵਧਾ ਦਈਂ । ਮੈ ਉਹਦੀ ਮੰਨੀ ਨਹੀਂ ਤੇ ਦੋ ਤਿੰਨ ਵਾਰੀ ਸੱਟ ਖਾ ਕੇ ਅਖੀਰ ਉਹਦੀ ਮੰਨਣੀ ਪਈ । ਸਬਕ ਤਾਂ ਸਿੱਖਿਆ ਪਰ ਦੁੱਖ ਪਾ ਕੇ ।
ਅਸੀਂ ਜ਼ਿੰਦਗੀ ਚ ਸਿਰਫ ਵਰਜਿਸ਼ ਹੀ ਵਧਾ ਕੇ ਨਹੀਂ ਕਰਦੇ ਸਗੋਂ ਹੋਰ ਬਹੁਤ ਸਾਰੀਆਂ ਗੱਲਾਂ ਹਨ ਜੋ ਬਿਨਾ ਵਜਾ ਤੋਂ Overdo ਕਰਦੇ ਹਾਂ । ਮੇਰੇ ਖ਼ਾਸ ਦੋਸਤ ਅੰਗਰੇਜ ਦਾ ਭਰ ਜੁਆਨ ਮੁੰਡਾ ਮਰ ਗਿਆ ਤੇ ਅਸੀਂ ਉਹਦਾ ਅਫ਼ਸੋਸ ਕਰਨ ਗਏ । ਉਹ ਦੋਨੋ ਮੀਆਂ ਬੀਵੀ ਘਰੇ ਸੀ । ਉਨਾਂ ਨੇ ਅੱਖ ਚੋ ਹੰਝੂ ਨੀ ਡਿਗਣ ਦਿੱਤਾ ਭਾਂਵੇ ਉਨਾਂ ਦੀਆਂ ਅੱਖਾਂ ਭਰੀਆਂ ਪਈਆਂ ਸਨ । ਮੇਰੇ ਦੋਸਤ ਦੀ 80 ਸਾਲ ਦੀ ਮਾਂ ਮਰ ਗਈ ਤੇ ਉਹਦੇ ਦਾਗਾਂ ਵੇਲੇ ਉਹਦੀਆਂ ਦੋ ਭੈਣਾਂ ਨੇ ( ਮਾਂ ਦੀਆਂ ਧੀਆਂ ) ਨੇ ਉਹ ਪਿੱਟ ਸਿਆਪਾ ਕੀਤਾ ਕਿ ਲੋਕ ਅੰਦਰੋਂ ਭਰੇ ਪੀਤੇ ਬੈਠੇ ਸੀ ਕਿ ਕਿਵੇ ਪਖੰਡ ਕਰ ਰਹੀਆਂ । ਅਖੀਰ ਨੂੰ ਉਨਾਂ ਦੇ ਵੱਡੇ ਭਰਾ ਨੇ ਦੋਨਾਂ ਦੇ ਜ਼ੋਰ ਦੀ ਇਕ ਇਕ ਥੱਪੜ ਮਾਰਿਆ ਕਿ ਜੀਉਦੀ ਵੇਲੇ ਤਾਂ ਮਿਲ਼ਣ ਨੀ ਆਈਆਂ ਹੁਣ ਐਵੇਂ ਸੁੱਕਾ ਸੰਘ ਪਾੜ ਰਹੀਆਂ । ਉੱਥੇ ਉਸ ਮਾਈ ਦਾ ਮਰਨ ਵੀ ਇਕ ਤਮਾਸ਼ਾ ਬਣ ਕੇ ਰਹਿ ਗਿਆ । ਮੈਨੂੰ ਯਾਦ ਹੈ ਕਿਵੇ ਪਿੰਡਾਂ ਵਿੱਚ ਔਰਤਾਂ ਮਕਾਣਾਂ ਲੈ ਕੇ ਆਉੰਦੀਆ ਸੀ ਤੇ ਮਹੀਨਾ ਮਹੀਨਾ ਭਰ ਇਹ ਚੱਲਦਾ ਰਹਿੰਦਾ ।
ਜਿੰਨਾ ਚਿਰ ਪੰਜਾਬੀ ਨਹੀਂ ਸੀ ਆਏ ਗੋਰੇ ਛੋਟੇ ਛੋਟੇ ਘਰਾਂ ਵਿੱਚ ਰਹਿੰਦੇ ਸੀ ਤੇ ਜਦੋਂ ਧੀ ਪੁੱਤ ਵੱਡਾ ਹੋ ਜਾਣਾ ਉਨਾਂ ਨੇ ਬਾਹਰ ਆਪਣਾ ਪਾ ਲੈਣਾ । ਫੇਰ ਪੰਜਾਬੀ ਆਏ ਤੇ ਆਉਂਦਿਆਂ ਸਾਰ ਵੱਡੇ ਵੱਡੇ ਘਰ ਮਹਿਲਾਂ ਵਰਗੇ ਪਾ ਲਏ ਫੇਰ ਕਰਜ਼ੇ ਲਾਹੁਣ ਲਈ ਪਹਿਲਾਂ ਇਕ ਇਕ ਫੇਰ ਦੋ ਦੋ ਕਿਤੇ ਤਿੰਨ ਤਿੰਨ ਘਰ ਚ ਕਿਰਾਏਦਾਰ ਰੱਖ ਲਏ । ਘਰਾਂ ਵਿੱਚ ਜੋ ਕਿਰਾਏ ਪਿੱਛੇ ਪਿੱਟ ਸਿਆਪਾ ਉਹ ਵੱਖਰਾ ਤੇ ਘਰਾਂ ਚ ਨ ਕੋਈ ਪਰਾਈਵੇਸੀ ਨ ਕੋਈ ਸ਼ਾਂਤ ਵਾਤਾਵਰਣ
ਕਾਰਾਂ ਚ ਵੀ ਅਸੀਂ ਇਕ ਦੂਜੇ ਤੇ ਅੱਗੇ ਤੋਂ ਅੱਗੇ ਹੋ ਕੇ ਮਹਿੰਗੀ ਤੋਂ ਮਹਿੰਗੀ ਖਰੀਦਣ ਲਈ ਭੱਜਦੇ ਹਾਂ । ਸਾਡੇ ਆਪਣੇ ਪਿੰਡ ਦਸ ਕਾਰਾਂ ਖੜੀਆਂ ਤੇ ਜਾਣਾ ਕਿਸੇ ਨੇ ਕਿਤੇ ਵੀ ਨਹੀਂ । ਨਾ ਲੋੜ ਸੀ ਤੇ ਨਾ ਹੀ ਕੋਲ ਪੈਸੇ । ਬਹੁਤਿਆਂ ਨੇ ਕਰਜ਼ੇ ਤੇ ਲਈਆਂ ਹੋਈਆਂ ।
ਹੁਣ ਕੋਠੀਆ ਪਾਉਣ ਦਾ ਰਿਵਾਜ ਚੱਲ ਪਿਆ । ਲੋਕ ਕੱਚੇ ਘਰਾਂ ਚ ਰਹਿ ਕੇ ਗੁਜ਼ਾਰਾ ਕਰ ਲੈਂਦੇ ਸੀ । ਭਗਤ ਨਾਮਦੇਵ ਜੀ ਲਿਖਦੇ ਹਨ ਕਿ ਮਾਰਕੰਡੇ ਰਿਖੀ ਜਿੰਨੀ ਕਿਹਦੀ ਉਮਰ ਹੋ ਸਕਦੀ ਹੈ ? ਉਹਨੇ ਕੱਖਾਂ ਦੀ ਕੁਲੀ ਵਿੱਚ ਹੀ ਗੁਜ਼ਾਰਾ ਕਰ ਲਿਆ । ਪਰ ਹੁਣ ਸ਼ਹਿਰਾਂ ਨੂੰ ਛੱਡੋ ਪਿੰਡਾਂ ਚ ਜਾ ਕੇ ਦੇਖੋ ਲੋਕੀਂ ਕੋਠੀਆਂ ਦੇ ਉੱਪਰ ਜਹਾਜ਼ ਟੰਗੀ ਬੈਠੇ ਹਨ । ਇੱਥੋਂ ਸਾਡੀ ਮਾਨਸਿਕਤਾ ਦਾ ਪਤਾ ਲਗਦਾ ਕਿ ਅਸੀਂ ਹਰ ਗੱਲ ਵਿੱਚ ਕਿਵੇ ਵਧਦੇ ਜਾ ਰਹੇ ਹਾਂ ਤੇ ਇਹ ਨਹੀਂ ਕਿ ਇਹਦੇ ਚ ਸੁਖੀ ਹਾਂ ।
ਵਿਆਹਾਂ ਵਿੱਚ ਜਾ ਕੇ ਦੇਖੋ ਤਾਂ ਪਤਾ ਲੱਗੇਗਾ ਅਸੀਂ ਕਿੰਨਾ Overdo ਕਰਦੇ ਹਾਂ ਚਾਹੇ ਉਹ ਖਾਣੇ ਵਿੱਚ ਹੋਵੇ ਚਾਹੇ ਉਹ ਦੇਣ ਲੈਣ ਵਿੱਚ ਹੋਵੇ । ਮੈ ਇੱਥੇ ਕੇਟਰਿੰਗ ਵਾਲ਼ਿਆਂ ਨੂੰ ਪੁਛਿਆ ਕਿ ਬਚਿਆ ਖਾਣੇ ਦਾ ਕੀ ਕਰਦੇ ਹੋ ? ਉਹ ਕਹਿੰਦੇ ਸਾਰਾ ਕੂੜੇ ਚ ਜਾਂਦਾ
ਘਰੇ ਖਾਣਾ ਖਾਣਾ ਹੋਵੇ ਜਾਂ ਬਾਹਰ ਅਸੀਂ ਹਮੇਸ਼ਾ ਲੋੜ ਤੋਂ ਵੱਧ ਮੰਗਾਉਂਦੇ ਹਾਂ ਜਾਂ ਘਰੇ ਬਣਾਉਂਦੇ ਹਾਂ ਤੇ ਫੇਰ ਖਾਣ ਵੇਲੇ ਵੀ ਵੱਧ ਖਾਧਾ ਜਾਂਦਾ । ਇਹ ਨਿੱਤ ਦਾ ਸੁਭਾਅ ਬਣ ਗਿਆ ।
ਖਰਚ ਕਰਨਾ ਹੋਵੇ ਤਾਂ ਸਾਡੇ ਵਰਗਾ ਖੁਲਾ ਖ਼ਰਚਾ ਹੋਰ ਕੋਈ ਕੌਮ ਨੀ ਕਰਦੀ । ਕੋਈ ਚੀਜ ਲੈਣੀ ਹੋਵੇ ਸਾਡਾ ਬੱਜਟ ਨਹੀਂ ਹੁੰਦਾ । ਘਰੋਂ 2000 ਦਾ ਸੂਟ ਲੈਣ ਗਏ 5000 ਖਰਚ ਕੇ ਘਰੇ ਵੜਦੇ ਹਾਂ
ਦੁਨੀਆਂ ਸਾਰੀ ਕੰਮ ਕਰਦੀ ਹੈ ਤੇ ਬਹੁਤੇ ਲੋਕ 8 ਘੰਟੇ ਕੰਮ ਕਰਦੇ ਹਨ ਤੇ ਉਹ ਵੀ ਹਫ਼ਤੇ ਵਿੱਚ ਪੰਜ ਦਿਨ । ਜੇ ਕਿਤੇ ਜ਼ਰੂਰਤ ਹੋਵੇ ਤਾਂ ਅੰਗਰੇਜ ਲੋਕ ਓਵਰਟੈਮ ਲਾ ਲੈਣਗੇ । ਸਾਡੇ ਪੰਜਾਬੀ ਕਦੀ ਓਵਰਟੈਮ ਨੀ ਛੱਡਦੇ । ਅਸੀਂ ਸਰੀਰ ਦੀ ਪ੍ਰਵਾਹ ਵੀ ਨਹੀਂ ਕਰਦੇ । ਚੱਲ ਸੋ ਚੱਲ । ਸੱਭ ਤੋਂ ਵੱਧ ਧੱਕਾ ਆਪਣੇ ਸਰੀਰ ਨਾਲ ਪੰਜਾਬੀ ਕਰਦੇ ਹਨ । ਭਾਵੇਂ ਕਿਸੇ ਵੀ ਦੇਸ਼ ਚ ਹੋਣ ਤੇ ਕਿਸੇ ਵੀ ਕੰਮ ਤੇ । ਸਾਨੂੰ ਉਨਾਂ ਚਿਰ ਚੈਨ ਹੈ ਨੀ ਜਿਨਾ ਚਿਰ ਨਾਲ ਦੇ ਰਿਸ਼ਤੇਦਾਰ ਜਾਂ ਗੁਆਢੀ ਤੋਂ ਵੱਡਾ ਘਰ ਤੇ ਮਹਿੰਗੀ ਕਾਰ ਨਹੀਂ ਲੈ ਲੈਂਦੇ । ਉਹਦੇ ਲਈ ਸਰੀਰ Overdo ਕੰਮ ਕਰਦਾ ਹੈ ।
ਗੋਰੇ ਲੋਕ ਜੇ ਕਿਸੇ ਨਾਲ ਲੜਨਗੇ ਤਾਂ ਵੀ ਫੈਸਲਾ ਉੱਥੇ ਹੀ ਹੋ ਜਾਂਦਾ । ਇਹ ਲੋਕ ਵੈਰ ਨੀ ਰੱਖਦੇ । ਸਾਡੀ ਦੁਸ਼ਮਣੀ ਪੀੜੀ ਦਰ ਪੀੜੀ ਚਲਦੀ ਰਹਿੰਦੀ ਹੈ । ਸਾਡੇ ਅੰਦਰ ਗ਼ੁੱਸਾ ਤੇ ਨਫ਼ਰਤ ਵੀ ਅੱਤ ਦੀ ਹੈ
ਅਸੀਂ ਵੈਰ ਕਰਨ ਵੇਲੇ ਵੀ Overdo ਕਰਦੇ ਹਾਂ । ਹਾਲਾਕਿ ਇਹਦੀ ਜ਼ਰੂਰਤ ਵੀ ਨਹੀਂ ਹੈ । ਅਸੀਂ ਆਪ ਦੀ ਜੀਣ ਆਏ ਹਾਂ ਤੇ ਜੀਅ ਕੇ ਤੁਰ ਜਾਣਾ ਪਰ ਅਸੀਂ ਦੂਜਿਆਂ ਨਾਲ ਵੈਰ ਵਿਰੋਧ ਇੰਨਾ ਵਧਾ ਲਿਆ ਹੈ ਕਿ ਸਾਨੂੰ ਆਪਣਾ ਜੀਣ ਹੀ ਭੁੱਲ ਗਿਆ ਹੈ ।
ਹੋਰ ਤਾਂ ਹੋਰ ਸ਼ੋਸ਼ਿਲ਼ ਮੀਡੀਏ ਤੇ ਉਨਾਂ ਲੋਕਾ ਨਾਲ ਵੈਰ ਪੈ ਗਏ ਹਨ ਜਿਨਾ ਨੂੰ ਨਾ ਕਦੀ ਮਿਲੇ ਤੇ ਨਾ ਕਦੀ ਮਿਲਣਾ
ਦੂਜੇ ਧਰਮਾਂ ਦੀ ਗੱਲ ਛੱਡੋ ਸਾਡੇ ਆਪਣੇ ਧਰਮ ਵਿੱਚ ਕਿੰਨੇ ਧੜੇ ਬਣ ਗਏ ਹਨ । ਤੇ ਉਹ ਸਾਰੇ ਇਕ ਦੂਜੇ ਨੂੰ ਦੇਖ ਕੇ ਰਾਜ਼ੀ ਨਹੀਂ । ਇਹ ਸਾਰਾ Overdo ਕਰਕੇ ਹੈ ।
ਆਉ ਪਿਆਰ ਦੀ ਗੱਲ ਕਰੀਏ । ਸਾਰੀ ਦੁਨੀਆ ਵਿੱਚ ਪਿਆਰ ਦੇ ਰਿਸ਼ਤੇ ਹਨ ਤੇ ਜੇ ਕਦੀ ਕੋਈ ਰਿਸ਼ਤਾ ਟੁੱਟ ਜਾਵੇ ਤਾਂ ਬਾਹਰਲੇ ਲੋਕ ਦੁੱਖ ਜ਼ਰੂਰ ਮੰਨਾਉਦੇ ਹਨ ਇਹ ਕੁਦਰਤੀ ਹੈ ਪਰ ਸਾਡੇ ਵਿੱਚ ਮਰਨ ਤੱਕ ਜਾਂਦੇ ਹਨ ਜਿਵੇਂ ਹੋਰ ਦੁਨੀਆਂ ਮੁੱਕ ਹੀ ਗਈ ਹੋਵੇ । ਕੁੜੀ ਮੁੰਡੇ ਬਾਹਰ ਵੀ ਪਿਆਰ ਕਰਦੇ ਹਨ ਪਰ ਆਪਣੇ ਮਾਂ ਬਾਪ ਨੂੰ ਨਹੀਂ ਭੁੱਲਦੇ ਪਰ ਸਾਡੇ ਵਿੱਚ ਹੋਰ ਕਿਸੇ ਦੀ ਸੁੱਧ ਹੀ ਨਹੀਂ ਰਹਿੰਦੀ ਨ ਲੱਗਣ ਵੇਲੇ ਨਾ ਟੁੱਟਣ ਵੇਲੇ । ਜਿੰਨੇ ਸਾਡੇ ਸਮਾਜ ਵਿੱਚ ਲੋਕ ਦੁਖੀ ਹਨ ਹੋਰ ਸਮਾਜ ਵਿੱਚ ਨਹੀਂ ਕਿਉਂਕਿ ਅਸੀਂ ਪਿਆਰ ਨੂੰ ਵੀ ਕੰਟਰੋਲ ਤੋਂ ਬਾਹਰ ਕਰ ਲਿਆ ਹੈ ਤੇ ਕਿਸੇ ਵੀ ਕੰਮ ਨੂੰ ਹੱਦੋਂ ਵੱਧ ਕਰਨਾ ਕਦੀ ਵੀ ਸੁਖਾਵਾਂ ਨਹੀਂ ਹੁੰਦਾ । ਮੇਰੇ ਡਾਕਟਰ ਦੇ ਕਹਿਣ ਮੁਤਾਬਕ Don’t overdo it .
ਗੁਰਬਾਣੀ ਵਿੱਚ ਇਸੇ ਗੱਲ ਨੂੰ ਇਉ ਕਿਹਾ ਹੈ
ਜੈਸਾ ਬਿਤੁ ਤੈਸਾ ਹੋਇ ਵਰਤੈ ਅਪੁਨਾ ਬਲੁ ਨਹੀ ਹਾਰੈ ।
ਮਨੁੱਖ ਨੂੰ ਹਰ ਗੱਲ ਹੱਦ ਵਿੱਚ ਰਹਿ ਕੇ ਕਰਨੀ ਚਾਹੀਦੀ ਹੈ ਇਹਦੇ ਵਿੱਚ ਹੀ ਸੁਖ ਹੈ ਇਹਦੇ ਵਿੱਚ ਹੀ ਸਹਿਜ ਹੈ

ਡਰ

by Manpreet Singh January 2, 2019

ਨਿੱਕੇ ਹੁੰਦਿਆਂ ਵਾਪਰੀਆਂ ਕੁਝ ਡਰਾਉਣੀਆਂ ਘਟਨਾਵਾਂ ਕਰਕੇ ਹਨੇਰੇ ਦਾ ਡਰ ਉਸਦੇ ਅੰਦਰ ਪੱਕੀ ਤਰਾਂ ਘਰ ਕਰ ਗਿਆ ਸੀ…ਰਾਤ ਸੁੱਤੀ ਪਈ ਨੂੰ ਅਕਸਰ ਆਉਂਦਾ ਇੱਕ ਅਜੀਬ ਜਿਹਾ ਸੁਫਨਾ ਉਸਦੀ ਜਾਨ ਹੀ ਕੱਢ ਕੇ ਲੈ ਜਾਂਦਾ..ਹਨੇਰੀ ਜਿਹੀ ਜਗਾ ਵਿਚ ਉਹ ਕੱਲੀ ਤੁਰੀ ਜਾ ਰਹੀ ਹੁੰਦੀ..ਅਚਾਨਕ ਕੋਈ ਅਣਜਾਣ ਜਿਹਾ ਹੱਥ ਉਸਨੂੰ ਆਪਣੇ ਵਜੂਦ ਨੂੰ ਸਪਰਸ਼ ਕਰਦਾ ਪ੍ਰਤੀਤ ਹੁੰਦਾ ਤੇ ਪਸੀਨੇ ਵਿਚ ਤਰ ਹੋਈ ਦੀ ਇੱਕਦਮ ਜਾਗ ਖੁੱਲ ਜਾਂਦੀ..ਫੇਰ ਉਹ ਕੋਲ ਹੀ ਸੁੱਤੀ ਪਈ ਮਾਂ ਨੂੰ ਚੰਬੜ ਜਾਂਦੀ..ਮਗਰੋਂ ਉਸਨੂੰ ਕਿੰਨਾ-ਕਿੰਨਾ ਚਿਰ ਨੀਂਦ ਨਾ ਆਉਂਦੀ..!

ਹੁਣ ਏਨੇ ਸਾਲਾਂ ਬਾਅਦ ਬੈੰਕ ਦੀ ਨੌਕਰੀ ਲੱਗ ਗਈ…
ਇੱਕ ਵਾਰ ਓਵਰ ਟਾਈਮ ਦੇ ਚੱਕਰ ਵਿਚ ਲੇਟ ਹੋ ਗਈ…ਰਿਕਸ਼ੇ ਵਾਲਾ ਵੀ ਘਰ ਤੋਂ ਕਾਫੀ ਵਾਟ ਤੇ ਲਾਹ ਕੇ ਚਲਾ ਗਿਆ..ਰਾਤ ਦੇ ਸੰਨਾਟੇ ਨੂੰ ਤੋੜਦੀ ਹੋਈ ਅਵਾਰਾ ਕੁੱਤਿਆਂ ਦੇ ਭੌਂਕਣ ਦੀ ਖੌਫਨਾਕ ਅਵਾਜ…ਅਜੀਬ ਤਰਾਂ ਦਾ ਡਰਾਉਣਾ ਜਿਹਾ ਮਾਹੌਲ ਸੀ ਉਸ ਰਾਤ ਸੁਨਸਾਨ ਸੜਕ ਤੇ…
ਉਹ ਆਪਣੇ ਭਾਰੀ ਜਿਹੇ ਪਰਸ ਨੂੰ ਸੀਨੇ ਨਾਲ ਲਾਈ ਏਧਰ ਓਧਰ ਦੇਖਦੀ ਕਾਹਲੇ ਕਦਮੀਂ ਘਰ ਨੂੰ ਤੁਰੀ ਜਾ ਰਹੀ ਸੀ…..ਡਰੀ ਹੋਈ ਨੂੰ ਕੁਝ ਵਰੇ ਪਹਿਲਾਂ ਤੁਰ ਗਈ ਮਾਂ ਬੜੀ ਹੀ ਚੇਤੇ ਆਈ…ਅਚਾਨਕ ਹੀ ਪਿੱਛੋਂ ਆਉਂਦੇ ਮੋਟਰ ਸਾਈਕਲ ਨੇ ਕੋਲ ਆ ਬ੍ਰੇਕ ਮਾਰ ਲਈ..ਉਹ ਡਰ ਕੇ ਸੜਕ ਦੇ ਦੂਜੇ ਪਾਸੇ ਨੂੰ ਹੋ ਗਈ…ਦੋਹਾਂ ਚੋ ਇੱਕ ਆਖਣ ਲੱਗਾ…ਕਿਥੇ ਜਾਣਾ ਕੁੜੀਏ ਆ ਅਸੀ ਛੱਡ ਦਿੰਨੇ ਆ…”ਨਹੀਂ ਮੈਂ ਚਲੀ ਜਾਵਾਂਗੀ”…ਉਹ ਮੁਸ਼ਕਿਲ ਨਾਲ ਬੱਸ ਏਨਾ ਹੀ ਆਖ ਸਕੀ…
ਇੱਕ ਮੋਟਰ ਸਾਈਕਲ ਤੋਂ ਹੇਠਾਂ ਉੱਤਰ ਉਸ ਵੱਲ ਨੂੰ ਆ ਗਿਆ ਤੇ ਉਸਨੂੰ ਕਲਾਵੇ ਵਿਚ ਲੈਣ ਦੀ ਕੋਸ਼ਿਸ਼ ਕਰਨ ਲੱਗਾ…ਉਹ ਡਰ ਨਾਲ ਪਸੀਨੋੰ ਪਸੀਨੀ ਹੋ ਗਈ….

ਫੇਰ ਅਚਾਨਕ ਹੀ ਕਿਧਰੋਂ ਇੱਕ ਅਵਾਜ ਜਿਹੀ ਆਈ..”ਕੁੜੀਏ ਡਰੀਂ ਨਾ…ਸਗੋਂ ਇਸ ਡਰ ਦਾ ਮੁਕਾਬਲਾ ਕਰ..ਘਬਰਾ ਨਾ ਮੈਂ ਤੇਰੇ ਨਾਲ ਨਾਲ..ਹਿੰਮਤ ਕਰ…ਫੇਰ ਦੇਖੀਂ ਕੀ ਬਣਦਾ…ਇਸਨੂੰ ਦੌੜੇ ਜਾਂਦੇ ਨੂੰ ਰਾਹ ਨਹੀਂ ਲੱਭਣਾ”

ਏਨੀਂ ਗੱਲ ਸੁਣ ਉਸਨੇ ਬਿਨਾ ਦੇਰੀ ਕੀਤੀਆਂ ਹੱਥ ਵਿਚ ਫੜਿਆ ਪਰਸ ਘੁੰਮਾਂ ਕੇ ਉਸਦੇ ਮੂੰਹ ਤੇ ਦੇ ਮਾਰਿਆ..ਅਤੇ ਫੇਰ ਹੇਠਾਂ ਡਿੱਗੇ ਦੇ ਮੂੰਹ ਤੇ ਅੰਨੇਵਾਹ ਘਸੁੰਨ ਮੁੱਕੀਆਂ ਮਾਰਨੀਆਂ ਸ਼ੁਰੂ ਕਰ ਦਿੱਤੀਆਂ”
ਅਗਲੇ ਹੀ ਪਲ ਉਸਨੂੰ ਸਿਰਫ ਦੂਰ ਜਾਂਦੇ ਮੋਟਰ ਸਾਈਕਲ ਦੀ ਧੁੰਦਲੀ ਜਿਹੀ ਲਾਈਟ ਹੀ ਦਿਸ ਰਹੀ ਸੀ
ਉਹ ਛੇਤੀ ਨਾਲ ਸੰਭਲੀ ਤੇ ਫੇਰ ਜਿਧਰੋਂ ਅਵਾਜ ਆਈ ਸੀ ਓਧਰ ਨੂੰ ਦੇਖਣ ਲੱਗ ਪਈ…
ਸੜਕ ਦੇ ਦੂਜੇ ਪਾਸੇ ਬੈਠਾ ਹੋਇਆ ਇੱਕ ਅਪਾਹਜ ਮੰਗਤਾ ਉਸ ਵੱਲ ਦੇਖ ਮੁਸਕੁਰਾ ਰਿਹਾ ਸੀ..

ਤੇ ਫੇਰ ਉਸ ਦਿਨ ਮਗਰੋਂ ਉਸਨੂੰ ਫੇਰ ਕਦੀ ਵੀ ਹਨੇਰੇ ਤੋਂ ਡਰ ਨਹੀਂ ਲੱਗਾ…!
ਦੋਸਤੋ ਡਰ ਤੋਂ ਅੱਗੇ ਕਾਮਯਾਬੀ ਦਾ ਸਮੁੰਦਰ ਹੁੰਦਾ…ਪਰ ਬਹੁਤੇ ਇਸ ਡਰ ਕਾਰਨ ਬਿਨਾ ਟੁੱਬੀ ਲਾਏ ਹੀ ਆਪਣਾ ਰਾਹ ਬਦਲ ਲੈਂਦੇ ਨੇ..

ਗੋਰੀ ਬੱਚੀ

by Manpreet Singh December 31, 2018

ਦਿਨੇ ਗਿਆਰਾਂ ਕੂ ਵਜੇ ਸ਼ਹਿਰ ਦੇ ਇੱਕ ਪਿਛੜੇ ਇਲਾਕੇ ਵਿਚ ਕਿਸੇ ਨੂੰ ਘਰ ਦਿਖਾਉਣ ਮਗਰੋਂ ਅਜੇ ਵਾਪਿਸ ਗੱਡੀ ਵੱਲ ਨੂੰ ਤੁਰਿਆਂ ਹੀ ਆ ਰਿਹਾ ਸਾਂ ਕੇ ਮਗਰੋਂ ਕਿਸੇ ਦੀ ਅਵਾਜ ਪਈ…
ਪੰਜ ਸੱਤ ਸਾਲਾਂ ਦੀ ਗੋਰੀ ਬੱਚੀ…ਟੇਬਲ ਉੱਤੇ ਇੱਕ ਜੱਗ ਅਤੇ ਨਿੱਕੇ ਨਿੱਕੇ ਗਿਲਾਸ ਰੱਖ ਨਿੰਬੂ ਪਾਣੀ ਵੇਚ ਰਹੀ ਸੀ..
ਕੋਲ ਗਿਆ ਤਾਂ ਆਖਣ ਲੱਗੀ ਕੇ ਸਿਰਫ ਪੰਜਾਹਾਂ ਸੈਂਟਾਂ ਦਾ ਇੱਕ ਗਿਲਾਸ ਏ…ਖਰੀਦਣਾ ਚਾਹੇਂਗਾ?
ਮੈਂ ਆਖਿਆ ਕੇ ਪਹਿਲਾਂ ਇੱਕ ਗੱਲ ਦੱਸ..ਪੈਸੇ ਵੱਟ ਕੇ ਕਰੇਂਗੀ ਕੀ?
ਆਖਣ ਲੱਗੀ ਵੱਡੇ ਭਰਾ ਨੇ ਪੰਜ ਸਤੰਬਰ ਨੂੰ ਵਾਪਿਸ ਸਕੂਲ ਜਾਣਾ ਏ..ਮਾਂ ਸਿੰਗਲ ਮਦਰ ਏ..ਉਸ ਕੋਲ ਮੇਰੇ ਭਰਾ ਦੀ ਸਕੂਲ ਸਪਲਾਈ ਖਰੀਦਣ ਜੋਗੇ ਪੈਸੇ ਨਹੀਂ ਹਨ..ਨਿਮਬੂ ਪਾਣੀ ਵੇਚ ਉਸਦੀ ਮਦਤ ਕਰਨਾ ਚਾਹੁੰਦੀ ਹਾਂ..!

ਮੇਰੀ ਜਾਨ ਨਿੱਕਲ ਗਈ…ਭੱਜ ਕੇ ਵਾਪਿਸ ਟਰੱਕ ਕੋਲ ਆਇਆ…
ਸ਼ਾਪਿੰਗ ਕਾਰਟ ਵਿਚ ਪਾਉਣ ਜੋਗੀ ਇੱਕ ਲੂਣੀ ਅਕਸਰ ਹੀ ਖਾਨੇ ਜਿਹੇ ਵਿਚ ਰੱਖੀ ਹੁੰਦੀ ਏ…ਪਰ ਅੱਜ ਉਹ ਵੀ ਪਤਾ ਨਹੀਂ ਕਿਥੇ ਗਈ ਸੀ?
ਬਟੂਆ ਖੋਲਿਆ..ਸੋਂ ਡਾਲਰ ਦਾ ਇੱਕੋ ਨੋਟ ਸੀ…ਦੇਣ ਦਾ ਹੋਂਸਲਾ ਜਿਹਾ ਨਾ ਪਿਆ..
ਉਸ ਨੂੰ ਆਖਿਆ ਕੇ ਉਹ ਓਥੇ ਹੀ ਬੈਠੀ ਰਹੇ..ਮੈਂ ਹੁਣੇ ਆਉਂਦਾ ਹਾਂ ਮੁੜ ਕੇ…
ਤਕਰੀਬਨ ਕਿਲੋਮੀਟਰ ਦੂਰ ਇੱਕ ਸਟੋਰ ਤੇ ਜਾ ਸੋਂ ਦੇ ਟੁੱਟੇ ਪੈਸੇ ਮੰਗੇ..
ਅੱਗੋਂ ਆਖਣ ਲੱਗਾ ਕਿ ਕੋਈ ਚੀਜ ਮੁੱਲ ਲੈਣੀ ਪਵੇਗੀ..ਓਦਾਂ ਚੇਂਜ ਦੇਵੀਏ ਤਾਂ ਮਾਲਕ ਗੁੱਸਾ ਕਰਦਾ ਏ..
ਆਖਿਆ ਕੇ ਇੰਝ ਕਰ ਪੰਜਾਂ ਡਾਲਰਾਂ ਦੇ ਚੌਕਲੇਟ ਦੇ ਦੇ ਤੇ ਬਾਕੀ ਦਾ ਬਕਾਇਆ ਦਸਾਂ ਦਸਾਂ ਦੇ ਨੋਟਾਂ ਦੇ ਰੂਪ ਵਿਚ ਮੋੜ ਦੇਵੇ…
ਦਸਾਂ ਦਸਾਂ ਦੇ ਦੋ ਨੋਟ ਚੋਕਲੇਟਾਂ ਵਾਲੇ ਲਫਾਫੇ ਵਿਚ ਵੱਖਰੇ ਪਾ ਵਾਪਿਸ ਓਸੇ ਥਾਂ ਆਉਂਦਾ ਹੋਇਆ ਸੋਚ ਰਿਹਾ ਸਾਂ ਕੇ ਏਨਾ ਕੁਝ ਦੇਖ ਜਰੂਰ ਹੀ ਗੁਲਾਬ ਦੇ ਫੁਲ ਵਾਂਙ ਖਿੜ ਜਾਵੇਗੀ..!
ਦਸਾਂ ਕੂ ਮਿੰਟਾਂ ਮਗਰੋਂ ਜਦੋਂ ਮੁੜ ਓਸੇ ਥਾਂ ਤੇ ਆਇਆਂ ਤਾਂ ਬੱਚੀ ਓਥੇ ਨਹੀਂ ਸੀ ਤੇ ਨਾ ਹੀ ਉਸਦੇ ਸ਼ਿਕੰਜਵੀ ਵਾਲੇ ਗਲਾਸ ਹੀ ਦਿਸੇ…ਕੋਲ ਖੇਡਦੇ ਬੱਚਿਆਂ ਨੂੰ ਪੁੱਛਿਆ ਤਾਂ ਕੋਈ ਤਸੱਲੀਬਖਸ਼ ਉੱਤਰ ਨਾ ਮਿਲਿਆ…
ਇਸ ਸਬੰਦੀ ਹੋਰ ਬਹੁਤੀ ਪੁੱਛਗਿੱਛ ਕਰਨੀ ਇਸ ਲਈ ਵਾਜਿਬ ਨਾ ਸਮਝੀ ਕੇ ਕਨੇਡਾ ਦੇ ਬੱਚਿਆਂ ਸਬੰਧੀ ਕਨੂੰਨ..ਕਿਤੇ ਕੋਈ ਗਲਤ ਪਾਸੇ ਵੱਲ ਨੂੰ ਹੀ ਨਾ ਲੈ ਤੁਰੇ..!

ਖੈਰ ਸਾਰੀ ਦਿਹਾੜੀ ਜਦੋਂ ਵੀ ਮੌਕਾ ਮਿਲਦਾ ਇਹ ਸੋਚ ਟਰੱਕ ਓਧਰ ਨੂੰ ਪਾ ਲੈਂਦਾ ਕੇ ਸ਼ਾਇਦ ਉਹ ਮੁੜ ਨਜਰੀ ਪੈ ਜਾਵੇ ਪਰ ਨਿਰਾਸ਼ਾ ਹੀ ਪੱਲੇ ਪਈ…

ਨਾਲਦੀ ਸੀਟ ਤੇ ਪਏ ਲਫਾਫੇ ਵੱਲ ਨੂੰ ਦੇਖ ਸਾਰੀ ਦਿਹਾੜੀ ਮੈਨੂੰ ਇੰਝ ਮਹਿਸੂਸ ਹੁੰਦਾ ਰਿਹਾ ਜਿਦਾਂ ਸੌ ਡਾਲਰਾਂ ਦੀ ਦਵਾਈ ਖਾਤਿਰ ਕੋਈ ਮਾਸੂਮ ਮੇਰੀ ਝੋਲੀ ਵਿਚ ਹੀ ਦਮ ਤੋੜ ਗਿਆ ਹੋਵੇ!

ਨਵੀਂ ਲੈਕਚਰਰ

by Manpreet Singh December 29, 2018

ਸੀਮਾ ਗੁਪਤਾ ਸੀ ਸ਼ਾਇਦ ਉਸਦਾ ਨਾਮ..ਉਮਰ ਹੋਵੇਗੀ ਕੋਈ ਪੱਚੀ ਕੂ ਸਾਲ..
ਜਦੋਂ ਨਵੀਂ ਨਵੀਂ ਲੈਕਚਰਰ ਲਗੀ ਤਾਂ ਕਲਾਸ ਵਿਚਂ ਸ਼ਰਾਰਤਾਂ ਕਾਰਨ ਅਕਸਰ ਹੀ ਵਿਚਾਰੀ ਦੇ ਪਸੀਨੇ ਛੁੱਟ ਜਾਇਆ ਕਰਦੇ..ਬਥੇਰੀਆਂ ਬੇਨਤੀਆਂ ਕਰਿਆ ਕਰਦੀ ਕੇ ਨਵੀਂ ਹਾਂ ਪਲੀਜ ਥੋੜਾ ਸਹਿਯੋਗ ਦਿਓ…

ਸਹਿਯੋਗ ਤਾਂ ਕਾਹਦਾ ਦੇਣਾ ਸੀ ਸਗੋਂ ਇੱਕ ਦਿਨ ਗਰੁੱਪ ਦੇ ਮੁੰਡੇ ਨੇ ਨਿੱਕਾ ਜਿੰਨਾ ਕਤੂਰਾ ਚੁੱਕ ਲਿਆਂਦਾ ਅਤੇ ਕਲਾਸ ਅੰਦਰ ਪੜਾਉਂਦੀ ਦੇ ਉੱਤੇ ਦੇ ਮਾਰਿਆ…
ਚਊਂ-ਚਊਂ ਕਰਦੇ ਕਤੂਰੇ ਦੀਆਂ ਚੀਕਾਂ ਅਤੇ ਅਚਾਨਕ ਵਾਪਰੇ ਇਸ ਵਰਤਾਰੇ ਕਾਰਨ ਉਹ ਨੁੱਕਰ ਵਿਚ ਲੱਗ ਰੋਣ ਲੱਗ ਪਈ…
ਗੱਲ ਪ੍ਰਿੰਸੀਪਲ ਤੱਕ ਜਾ ਅੱਪੜੀ..ਤੇ ਉਸਨੂੰ ਇਸ ਅਧਾਰ ਤੇ ਨੌਕਰੀ ਤੋਂ ਫਾਰਗ ਕਰ ਦਿੱਤਾ ਗਿਆ ਕੇ ਸ਼ਾਇਦ ਕਲਾਸ ਨੂੰ ਕੰਟਰੋਲ ਕਰਨ ਦੀ ਸਮਰੱਥਾ ਨਹੀਂ ਸੀ…

ਮਗਰੋਂ ਪਤਾ ਲੱਗਾ ਕੇ ਬਿਨਾ ਬਾਪ ਦੇ ਤਿੰਨ ਨਿੱਕੇ ਭੈਣ ਭਰਾਵਾਂ ਦੇ ਪਾਲਣ ਪੋਸ਼ਣ ਦੀ ਜੁੰਮੇਵਾਰੀ ਉਸ ਤੇ ਸੀ..
ਫੇਰ ਇੱਕ ਦਿਨ ਜਦੋਂ ਉਸ ਨੂੰ ਕੋਲ ਹੀ ਪ੍ਰਾਈਵੇਟ ਸਕੂਲ ਵਿਚ ਸਾਈਕਲ ਤੇ ਨਿੱਕਲਦਿਆਂ ਦੇਖਿਆ ਤਾਂ ਬੜਾ ਅਫਸੋਸ ਹੋਇਆ..ਕੇ ਘਟੀਆ ਮਜਾਕ ਖਾਤਿਰ ਕਿਸੇ ਦੀ ਚੰਗੀ ਭਲੀ ਰੋਜੀ ਰੋਟੀ ਖੋਹ ਲਈ ਏ..ਪਰ ਸ਼ਾਇਦ ਉਸ ਵੇਲੇ ਤੱਕ ਕਾਫੀ ਦੇਰ ਹੋ ਚੁਕੀ ਸੀ..

ਕਾਫੀ ਵਰ੍ਹਿਆਂ ਮਗਰੋਂ 2005 ਨੂੰ ਕਨੇਡਾ ਆਣ ਪਹੁੰਚੇ.. ਜਦੋਂ ਕੰਮ ਨਾ ਮਿਲਿਆ ਤਾਂ ਇੱਕ ਪੀਜੇ ਤੇ ਜਾਣਾ ਸ਼ੁਰੂ ਕਰ ਦਿੱਤਾ..
ਨਵਾਂ ਸ਼ਹਿਰ..ਨਵੇਂ ਲੋਕ..ਨਵੀਆਂ ਸਟ੍ਰੀਟਾਂ..ਜਦੋਂ ਕੋਈ ਫੋਨ ਤੇ ਆਡਰ ਦਿਆ ਕਰਦਾ ਤਾਂ ਨਾ ਤੇ ਅਗਲੇ ਦੀ ਪੂਰੀ ਗੱਲ ਹੀ ਸਮਝ ਆਉਂਦੀ ਤੇ ਨਾ ਹੀ ਸਟ੍ਰੀਟ ਦਾ ਹੀ ਪਤਾ ਲੱਗਦਾ..
ਇੱਕ ਦੋ ਵਾਰ ਗਲਤ ਜਗਾ ਆਡਰ ਡਿਲਿਵਰ ਹੋ ਗਿਆ..ਨਾਲਦੇ ਮਖੌਲ ਬਣਾਇਆ ਕਰਨ..ਤੇ ਨਿੱਕੀ-ਨਿੱਕੀ ਗੱਲ ਅਗਾਂਹ ਤੱਕ ਅੱਪੜਨੀ ਸ਼ੁਰੂ ਹੋ ਗਈ…
ਖੈਰ ਕਿਸੇ ਤਰਾਂ ਕਰ ਕਰਾ ਕੇ ਵੀਹ ਕੂ ਦਿਨ ਲੰਘਾਏ…ਫੇਰ ਹਾਲਾਤ ਏਦਾਂ ਦੇ ਬਣ ਗਏ ਕੇ ਕੰਮ ਛੱਡਣਾ ਪਿਆ..ਜਾਂ ਆਖ ਲਵੋ ਕੰਮ ਤੋਂ ਫਾਰਗ ਕਰ ਦਿੱਤਾ ਗਿਆ…
ਆਪਣੇ ਬਣਦੇ ਪੈਸੇ ਮੰਗੇ ਤਾਂ ਅਗਲਾ ਮਜਾਕ ਜਿਹੇ ਨਾਲ ਆਖਣ ਲੱਗਾ ਕੇ ਕਾਹਦੇ ਪੈਸੇ ?..ਤੇਰੇ ਕਰਕੇ ਤਾਂ ਮੇਰੇ ਕਾਰੋਬਾਰ ਦਾ ਨੁਕਸਾਨ ਹੀ ਬਹੁਤ ਹੋਇਆ ਏ..”
ਤੁਰੇ ਆਉਂਦੇ ਨੂੰ ਸਮਝ ਆ ਗਈ ਕੇ ਢਿੱਡ ਤੇ ਲੱਤ ਵੱਜ ਚੁੱਕੀ ਸੀ..ਖੈਰ ਅੱਧੀ ਰਾਤ ਘਰ ਪਹੁੰਚਿਆ…ਸਾਰੇ ਗੂੜੀ ਨੀਂਦਰ ਸੁੱਤੇ ਪਏ ਸੀ…ਸਮਝ ਨਾ ਆਵੇ ਕੇ ਸਾਰੀ ਗੱਲ ਕਿੱਦਾਂ ਤੇ ਕਿਸਨੂੰ ਦੱਸਾਂ..
ਇਸੇ ਉਧੇੜ-ਬੁਣ ਵਿਚ ਹੀ ਸਾਂ ਕੇ ਬਾਹਰੋਂ ਕਿਸੇ ਪੀੜ ਨਾਲ ਕਰਾਹੁੰਦੇ ਹੋਏ ਕਤੂਰੇ ਦੀ ਅਵਾਜ ਨੇ ਮੇਰੇ ਲੂ ਕੰਢੇ ਖੜੇ ਕਰ ਦਿੱਤੇ ਅਤੇ ਨਾਲ ਹੀ ਇੰਝ ਲਗਿਆ ਜਿਦਾਂ ਓਹੋ ਵੀਹ ਸਾਲ ਪਹਿਲਾਂ ਵਾਲੀ ਸੀਮਾ ਗੁਪਤਾ ਕੰਧ ਨਾਲ ਲੱਗੀ ਮੇਰੇ ਵੱਲ ਤੱਕ ਰਹੀ ਹੋਵੇ..

ਤੱਕੜੀ

by Manpreet Singh December 27, 2018

ਨਿੱਕੇ ਜਿਹੇ ਕਸਬੇ ਦਾ ਨਿੱਕਾ ਜਿਹਾ ਹੋਟਲ…
ਮੁੰਡੇ ਕੁੜੀ ਦੇ ਮੰਗਣੇ ਦੀ ਗੱਲਬਾਤ ਦੌਰਾਨ ਦੋਹਾਂ ਨੂੰ ਇੱਕ ਕਮਰੇ ਵਿਚ ਛੱਡ ਦਿੱਤਾ ਗਿਆ…
ਕੁਝ ਪਲਾਂ ਦੀ ਖਾਮੋਸ਼ੀ ਮਗਰੋਂ..ਮੁੰਡੇ ਨੇ ਪਾਣੀ ਦਾ ਘੁੱਟ ਪੀਤਾ ਅਤੇ ਸ਼ੁਰੂਆਤ ਕਰ ਦਿੱਤੀ….
“ਮੇਰੇ ਲਈ ਮੇਰੇ ਪਰਿਵਾਰ ਤੋਂ ਵੱਧ ਕੇ ਹੋਰ ਕੁਝ ਨਹੀਂ ਏ…
ਮਾਂ ਨੂੰ ਸੰਸਕਾਰੀ ਜਿਹੀ ਨੂੰਹ ਚਾਹੀਦੀ ਏ…ਪੜੀ ਲਿਖੀ ਹੋਵੇ..ਸਬ ਦਾ ਖਿਆਲ ਰੱਖਣਾ ਜਾਣਦੀ ਹੋਵੇ 
ਸਹੁਰੇ ਘਰ ਨੂੰ ਆਪਣਾ ਘਰ ਸਮਝੇ..ਗੱਲ ਗੱਲ ਤੇ ਪੇਕਿਆਂ ਵੱਲ ਨੂੰ ਮੂੰਹ ਨਾ ਕਰੇ
ਘਰ ਵਾਲੇ ਦੇ ਕਦਮ ਨਾਲ ਕਦਮ ਮਿਲਾ ਕੇ ਚੱਲੇ..ਅਤੇ ਉਸਦੀ ਅੱਖ ਦਾ ਇਸ਼ਾਰਾ ਸਮਝੇ..ਫਜੂਲ ਦੀ ਬਹਿਸਬਾਜੀ ਵਿਚ ਹੀ ਨਾ ਉਲਝੀ ਰਹੇ…
ਪਰਿਵਾਰ ਪੂਰਾਣੇ ਖਿਆਲਾਂ ਦਾ ਤਾਂ ਨਹੀਂ ਏ ਪਰ ਫੇਰ ਵੀ ਪਰਿਵਾਰ ਦੇ ਰੀਤੀ ਰਿਵਾਜ ਬਿਨਾ ਕਿਸੇ ਕਿੰਤੂ-ਪ੍ਰੰਤੂ ਕੀਤਿਆਂ ਅੱਖਾਂ ਮੀਚ ਕੇ ਆਪਣਾ ਲਵੇ…
ਪਿੰਡ ਦਾ ਮਾਹੌਲ ਮੁਤਾਬਿਕ ਪਹਿਰਾਵਾ ਪਹਿਨਣਾ ਜਾਣਦੀ ਹੋਵੇ…
ਮੇਰੀ ਮਾਂ ਨੂੰ ਗੋਡਿਆਂ ਤੋਂ ਪਾਟੀ ਹੋਈ ਜੀਨ ਤੋਂ ਬੇਹੱਦ ਨਫਰਤ ਏ..ਲੰਮੇ ਵਾਲਾ ਵਾਲੀ ਹੋਵੇ ਤਾਂ ਮੈਨੂੰ ਖੁਸ਼ੀ ਹੋਵੇਗੀ..
ਡੈਡ ਦਾ ਅਫ਼ਸਰੀ ਅਤੇ ਰਾਜਨੈਤਿਕ ਸਰਕਲ..ਪੰਜ ਕੂ ਸੋ ਬਾਰਾਤ ਦਾ ਬੰਦੋਬਸਤ ਕਿਸੇ ਵੱਡੇ ਅਤੇ ਸ਼ਾਨਦਾਰ ਜਿਹੇ ਹੋਟਲ ਵਿਚ ਹੋ ਜਾਵੇ ਤਾਂ ਓਹਨਾ ਦੇ ਸਟੇਟਸ ਦੇ ਬ੍ਰੋਬਰੀ ਹੋ ਸਕਦੀ ਏ..
ਬਾਕੀ ਤਾਂ ਪਰਮਾਤਮਾ ਦਾ ਦਿੱਤਾ ਸਭ ਕੁਝ ਹੈ..ਜੇ ਤੁਸੀਂ ਕੁਝ ਕਹਿਣਾ ਚਾਹੁੰਦੇ ਹੋ ਤਾਂ ਨਿਸ਼ੰਗ ਹੋ ਕੇ ਆਖ ਸਕਦੇ ਹੋ

ਬਹੁਤ ਦੇਰ ਤੋਂ ਚੁੱਪ ਬੈਠੀ ਕੁੜੀ ਨੇ ਸੰਗ-ਲਾਜ ਵਾਲਾ ਘੁੰਡ ਲਾਹ ਪਾਸੇ ਰੱਖ ਦਿੱਤਾ ਅਤੇ ਸਵੈ-ਮਾਣ ਵਾਲੀ ਚੁੰਨੀਂ ਗਲ਼ ਵਿਚ ਪਾ ਲਈ…

ਉਸਨੇ ਵੀ ਸ਼ੁਰੂਆਤ ਕਰਨ ਤੋਂ ਪਹਿਲਾਂ ਪਾਣੀ ਦਾ ਘੁੱਟ ਪੀਤਾ..ਫੇਰ ਪੂਰੇ ਠਰੰਮੇ ਨਾਲ ਬੋਲਣਾ ਸ਼ੁਰੂ ਕਰ ਦਿੱਤਾ..
ਮਾਪਿਆਂ ਦੀ ਕੱਲੀ ਕੱਲੀ ਕੁੜੀ ਹਾਂ ਪਰ ਪਰਵਰਿਸ਼ ਮੁੰਡਿਆਂ ਵਰਗੀ ਹੀ ਹੋਈ ਏ
ਮੇਰਾ ਪਰਿਵਾਰ ਹੀ ਮੇਰੀ ਤਾਕਤ ਏ…ਡੈਡ ਮੋਮ ਨੂੰ ਜਵਾਈ ਦੀ ਰੂਪ ਵਿਚ ਇਕ ਐਸਾ ਪੁੱਤ ਚਾਹੀਦਾ ਜਿਹੜਾ ਹਰ ਮੁਸ਼ਕਿਲ ਵੇਲੇ ਬਿਨਾ ਦੇਰੀ ਕੀਤੀਆਂ ਓਹਨਾ ਦੇ ਸਿਰਹਾਣੇ ਆਣ ਖਲੋਵੇ..
ਓਹਨਾ ਦੀ ਧੀ ਦੇ ਨਾਲ ਕੰਮ ਵਿਚ ਪੂਰਾ ਪੂਰਾ ਹੱਥ ਵਟਾਵੇ..ਓਹਨਾ ਦੀ ਧੀ ਨੂੰ ਓਨਾ ਹੀ ਮਾਣ ਸਤਿਕਾਰ ਦੇਵੇ ਜਿੰਨਾ ਕੇ ਉਹ ਆਪਣੀ ਭੈਣ ਲਈ ਆਪਣੇ ਜੀਜੇ ਕੋਲੋਂ ਅਕਸਪੇਕਟ ਕਰਦਾ ਏ..ਮੇਰੀ ਮਾਂ ਸ਼ਰਤਾਂ ਤੇ ਕੀਤੀ ਗਈ ਮੁਹੱਬਤ ਨੂੰ ਵਿਓਪਾਰ ਮੰਨਦੀ ਏ
ਉਹ ਐਸਾ ਜਵਾਈ ਲੱਭਦੇ ਨੇ ਜਿਸਨੂੰ ਆਪਣੀ ਮਾਂ ਅਤੇ ਵਹੁਟੀ ਵਿਚ ਬੈਲੇਂਸ ਬਣਾਉਣਾ ਆਉਂਦਾ ਹੋਵੇ…ਥਾਲੀ ਦੇ ਬੈਂਗਣ ਤੋਂ ਓਹਨਾ ਨੂੰ ਬਹੁਤ ਐਲਰਜੀ ਏ…
ਪਹਿਰਾਵੇ ਵਿਚ ਜੀਨ ਬਹੁਤ ਪਸੰਦ ਕਰਦੀ ਹਾਂ..ਕਦੀ ਕਦੀ ਬਾਹਰ ਦਾ ਖਾਣਾ ਖਾ ਲੈਣ ਵਿਚ ਕੋਈ ਵੱਡੀ ਗੱਲ ਨਹੀਂ ਸਮਝੀ ਜਾਂਦੀ…
ਖਿਆਲ ਉਚੇ ਤੇ ਸੁਚੇ ਹੋਣੇ ਚਾਹੀਦੇ ਨੇ..ਬਾਹਰੀ ਦਿੱਖ ਨਾਲ ਮੈਨੂੰ ਕੋਈ ਏਨਾ ਫਰਕ ਨਹੀਂ ਪੈਂਦਾ..
ਰਹੀ ਗੱਲ ਵਿਆਹ ਅਤੇ ਬਾਰਾਤ ਦੀ…ਜਿਥੇ ਆਖੋਗੇ ਹੋ ਜਾਵੇਗਾ ਪਰ ਖਰਚਾ ਅੱਧਾ-ਅੱਧਾ ਵੰਡਿਆ ਜਾਊ
ਹਰ ਗੱਲ ਬਿਨਾ ਸੋਚੇ ਸਮਝੇ ਸਰ ਝੁਕਾ ਕੇ ਮੰਨ ਲੈਣ ਨੂੰ ਸਾਡੇ ਪਰਿਵਾਰ ਵਿਚ ਸੰਸਕਾਰਾਂ ਦਾ ਹਿੱਸਾ ਨਹੀਂ ਮੰਨਿਆ ਜਾਂਦਾ…ਹਰੇਕ ਗੱਲ ਤਰਕ ਦੀ ਕਸੌਟੀ ਤੇ ਪਰਖ ਕੇ ਹੀ ਮੰਨੀ ਜਾਂ ਇਨਕਾਰੀ ਜਾਂਦੀ ਏ…
ਦਾਦਾ ਜੀ ਅਕਸਰ ਆਖਦੇ ਨੇ ਕੇ ਲੜਾਈ ਵਿਚ ਪਹਿਲ ਕਦੀ ਵੀ ਨਹੀਂ ਕਰਨੀ ਪਰ ਧੱਕੇਸ਼ਾਹੀ ਸਹਿਣੀ ਜ਼ੁਲਮ ਕਰਨ ਨਾਲੋਂ ਵੀ ਮਾੜੀ ਮੰਨਦੇ ਨੇ…”
ਉਹ ਅਜੇ ਹੋਰ ਵੀ ਬੜਾ ਕੁਝ ਆਖਣਾ ਚਾਹੁੰਦੀ ਸੀ ਪਰ ਮੁੰਡੇ ਨੇ ਅਚਾਨਕ ਹੀ ਬਾਹਰ ਖਲੋਤੇ ਬਹਿਰੇ ਨੂੰ ਇਸ਼ਾਰੇ ਨਾਲ ਅੰਦਰ ਬੁਲਾਇਆ..
ਸ਼ਾਇਦ ਨਵੰਬਰ ਮਹੀਨੇ ਦੀ ਠੰਡ ਵਿਚ ਮੱਥੇ ਤੇ ਆ ਗਈ ਵੱਡੀ ਸਾਰੀ ਤਰੇਲੀ ਪੂੰਝਣ ਲਈ ਨੈਪਕਿਨ ਮੰਗ ਰਿਹਾ ਸੀ!
ਇਸਤੋਂ ਪਹਿਲਾਂ ਕੇ ਉਹ ਲੈ ਕੇ ਅੰਦਰ ਆਉਂਦਾ..ਕੁੜੀ ਕਮਰਾ ਛੱਡ ਚੁਕੀ ਸੀ ਅਤੇ ਚਾਰੇ ਪਾਸੇ ਅਜੀਬ ਜਿਹਾ ਸੱਨਾਟਾ ਪਸਰ ਗਿਆ ਸੀ…

ਦੂਰ ਕਿਤੇ ਨੀਲੇ ਆਸਮਾਨ ਵਿਚ ਸਭਿਅਤਾ ਨਾਮ ਦੀ ਤੱਕੜੀ ਨਿੰਮਾਂ-ਨਿੰਮਾਂ ਮੁਸਕੁਰਾ ਰਹੀ ਸੀ…ਅੱਜ ਏਨੇ ਵਰ੍ਹਿਆਂ ਮਗਰੋਂ ਦੋਵੇਂ ਪੱਲੜੇ ਜੂ ਬਰੋਬਰ ਆ ਗਏ ਸਨ

ਕਾਸ਼ ਉਹ ਮੇਰੀ “ਧੀ” ਹੁੰਦੀ

by Manpreet Singh December 27, 2018

ਪੰਚਕੂਲੇ ਬਦਲੀ ਹੋ ਗਈ…ਸਮਾਨ ਸਿਫਟ ਕਰ ਇਹਨਾਂ ਨੂੰ ਦੋ ਮਹੀਨੇ ਦੀ ਟਰੇਨਿੰਗ ਲਈ ਬੰਗਲੌਰ ਨਿੱਕਲਣਾ ਪਿਆ..!
ਨਵਾਂ ਸ਼ਹਿਰ..ਇਲਾਕਾ ਤੇ ਨਵੇਂ ਲੋਕ..ਸਾਰਾ ਕੁਝ ਵੱਖਰਾ ਜਿਹਾ ਲੱਗਦਾ ਸੀ
ਇੱਕ ਦਿਨ ਬੂਹੇ ਤੇ ਦਸਤਕ ਹੋਈ..ਵੀਹਾਂ ਬਾਈਆਂ ਸਾਲਾਂ ਦੀ ਕੁੜੀ ਸੀ..ਟਾਈਟ ਜੀਨ…ਵਾਲਾਂ ਵਿਚ ਲਾਲ ਰੰਗ..ਕੰਨਾਂ ਵਿਚ ਈਅਰ ਪਲੱਗ…ਨੱਕ ਵਿਚ ਨੱਥ….ਸਾਰਾ ਕੁਝ ਬੜਾ ਹੀ ਅਜੀਬ ਜਿਹਾ ਲੱਗ ਰਿਹਾ ਸੀ…!

“ਹੈਲੋ” ਆਖ ਅੰਦਰ ਲੰਘ ਆਈ ਤੇ ਆਖਣ ਲੱਗੀ ਕੇ “ਨਾਲ ਹੀ ਤੀਜੀ ਮੰਜਿਲ ਵਾਲੇ ਫਲੈਟ ਵਿਚ ਰਹਿੰਦੀ ਹਾਂ..ਮੇਰਾ ਪਾਰਸਲ ਆਉਣਾ ਕੱਲ ਨੂੰ…ਜੇ ਮਾਈਂਡ ਨਾ ਕਰੋ ਤਾਂ ਲੈ ਕੇ ਰੱਖ ਲਿਓ…ਪੈਸੇ ਦੇ ਦਿਆਂਗੀ ਬਾਅਦ ਵਿਚ…ਨਾਲ ਹੀ ਆਪਣਾ ਨੰਬਰ ਲਿਖ ਟੇਬਲ ਤੇ ਰੱਖ ਦਿੱਤਾ ਤੇ ਬਾਹਰ ਨੂੰ ਨਿੱਕਲ ਗਈ!

“ਅਜੀਬ ਕੁੜੀ ਹੈ..ਨਾ ਜਾਣ ਤੇ ਨਾ ਪਹਿਚਾਣ…ਪਤਾ ਨੀ ਪਾਰਸਲ ਵਿਚ ਕੀ ਹੋਵੇਗਾ?..ਨਸ਼ੇ ਹੰਢਾਉਂਦੀ ਅੱਜਕੱਲ ਦੀ ਇਹ ਨਵੀਂ ਪੀੜੀ…ਨਿਰੀ ਸਿਰਦਰਦੀ ਦਾ ਘਰ…ਚੰਗਾ ਹੋਇਆ ਮੇਰੀ ਕੋਈ ਕੁੜੀ ਨਹੀਂ ਏ..ਨਹੀਂ ਤੇ ਪਤਾ ਨਹੀਂ ਕੀ ਕੀ?

ਉਸ ਦਿਨ ਮਗਰੋਂ ਮੇਰਾ ਧਿਆਨ ਆਪਮੁਹਾਰੇ ਹੀ ਨਾਲਦੇ ਫਲੈਟ ਵੱਲ ਚਲਾ ਜਾਂਦਾ.. ਦੇਰ ਰਾਤ ਤੱਕ ਚੱਲਦਾ ਮਹਿਫ਼ਿਲਾਂ ਦਾ ਦੌਰ..ਗੀਤ ਸੰਗੀਤ…ਖਾਣ ਪੀਣ…ਡਾਂਸ ਤੇ ਰੌਣਕ ਮੇਲਾ..ਅਤੇ ਹੋਰ ਵੀ ਪਤਾ ਨਹੀਂ ਕੀ ਕੀ..

ਅਕਸਰ ਹੀ ਸੋਚਦੀ ਰਹਿੰਦੀ ਕੇ “ਪਤਾ ਨਹੀਂ ਇਹ ਕੁੜੀ ਸੌਂਦੀ ਕਿਹੜੇ ਵੇਲੇ ਹੋਵੇਗੀ ਅਤੇ ਕੰਮ ਕੀ ਕਰਦੀ ਹੋਵੇਗੀ”?

ਫੇਰ ਅਗਲੀ ਸੁਵੇਰ ਮੈਨੂੰ ਮਹਿਸੂਸ ਹੋ ਗਿਆ ਕੇ ਸਾਰਾ ਸਰੀਰ ਸਰਵਾਈਕਲ ਦੇ ਵੱਡੇ ਅਟੈਕ ਨਾਲ ਜਕੜਿਆਂ ਪਿਆ ਸੀ…
ਚਾਹ ਦੀ ਪਤੀਲੀ ਧਰੀ ਹੀ ਸੀ ਕੇ ਇੰਝ ਲੱਗਾ ਕੇ ਹੁਣੇ ਹੀ ਮਰ ਜਾਵਾਂਗੀ…ਨਵਾਂ ਇਲਾਕਾ ਨਵੇਂ ਲੋਕ ਹੁਣ ਕਿਸ ਨੂੰ ਬੁਲਾਵਾਂ.?
ਧਿਆਨ ਅਚਾਨਕ ਫੋਨ ਲਾਗੇ ਪਈ ਓਸੇ ਪਰਚੀ ਤੇ ਜਾ ਪਿਆ..ਛੇਤੀ ਨਾਲ ਨੰਬਰ ਘੁਮਾ ਦਿੱਤਾ ਤੇ ਫੇਰ ਐਸਾ ਚੱਕਰ ਆਇਆ ਕੇ ਕੰਨੀ ਪੈਂਦੀ ‘ਹੈਲੋ-ਹੈਲੋ’ ਦੀ ਹਲਕੀ ਜਿਹੀ ਅਵਾਜ ਦੇ ਜੁਆਬ ਦੇਣ ਦੀ ਹਿੰਮਤ ਤੱਕ ਵੀ ਨਾ ਰਹੀ…ਤੇ ਮੁੜ ਮੈਨੂੰ ਕੋਈ ਹੋਸ਼ ਨਾ ਰਿਹਾ!

ਜਦੋਂ ਹੋਸ਼ ਆਇਆ ਤਾਂ ਓਹੀ ਕੁੜੀ ਸਿਰਹਾਣੇ ਬੈਠੀ ਮੇਰੇ ਵਾਲਾਂ ਵਿਚ ਹਲਕਾ ਹਲਕਾ ਜਿਹਾ ਹੱਥ ਫੇਰ ਰਹੀ ਸੀ…
ਨਰਸ ਦੱਸਣ ਲੱਗੀ ਕੇ ਇਹੋ ਹੀ ਤਿੰਨ ਮੰਜਿਲਾਂ ਉਚੀ ਬਿਨਾ ਕੰਢੇ ਵਾਲੀ ਬਾਲਕੋਨੀ ਟੱਪ ਅੰਦਰ ਆ ਮੈਨੂੰ ਹਸਪਤਾਲ ਲੈ ਕੇ ਆਈ ਸੀ ਤੇ ਪਿਛਲੇ ਤਿੰਨ ਤੋਂ ਇਹ ਤੇ ਇਸਦੇ ਸਾਥੀ ਦਿਨ ਰਾਤ ਤੁਹਾਡੀ ਦੇਖਭਾਲ ਵਿਚ ਲੱਗੇ ਹੋਏ ਹਨ!
ਮੁੜ ਉਹ ਹੀ ਹਸਪਤਾਲ ਦੇ ਬਿੱਲ ਦੀ ਪੇਮੰਟ ਕਰ ਮੈਨੂੰ ਆਪਣੇ ਘਰ ਲੈ ਕੇ ਆਈ..ਉਸਦੇ ਘਰ ਵਿਚ ਏਨੀ ਸਫਾਈ ਕੇ ਬਸ ਪੁਛੋ ਨਾ…ਉਸਨੇ ਮੈਨੂੰ ਅੰਦਰ ਮੰਜੇ ਤੇ ਪਈ ਅਧਰੰਗ ਨਾਲ ਪੀੜਤ ਆਪਣੀ ਮਾਂ ਨਾਲ ਵੀ ਮਿਲਾਇਆ..!

ਮਾਂ ਨੇ ਦਸਿਆ ਕੇ ਨੌਕਰੀ ਦੇ ਨਾਲ ਨਾਲ ਕਾਲਜ ਵੇਲੇ ਦੇ ਦੋਸਤਾਂ ਨਾਲ ਮਿਲ ਕੇ ਇੱਕ ਗਰੁੱਪ ਬਣਾਇਆ ਹੋਇਆ ਹੈ ਜਿਹੜਾ ਲਾਗੇ ਚਾਗੇ ਝੁੱਗੀ-ਝੋਂਪੜੀ ਵਾਲੇ ਗਰੀਬ ਬੱਚਿਆਂ ਨੂੰ ਮੁਫ਼ਤ ਟਿਊਸ਼ਨ ਪੜਾਉਂਦਾ ਹੈ ਤੇ ਓਹਨਾ ਦੇ ਸਕੂਲ ਦੀ ਫੀਸ ਦਾ ਬੰਦੋਬਸਤ ਵੀ ਕਰਦਾ ਏ…!

ਸੋਚਣ ਲੱਗੀ ਕੇ ਨਵੇਂ ਜਮਾਨੇ ਦੇ ਤੌਰ ਤਰੀਕਿਆਂ ਨਾਲ ਵਿੱਚਰਦੇ ਹੋਏ ਇਹ ਅਨੇਕਾਂ ਸਾਫ ਦਿਲ ਰੱਬ…ਸ਼ਾਇਦ ਓਹਨਾ ਲੰਮੇ ਚੋਲਿਆਂ ਵਾਲੇ ਹਜਾਰਾਂ ਪਾਖੰਡੀਆਂ ਤੋਂ ਕਈ ਗੁਣਾਂ ਚੰਗੇ ਨੇ ਜਿਹੜੇ ਅਨੇਕਾਂ ਭਰਮ ਭੁਲੇਖੇ ਪੈਦਾ ਕਰਦੇ ਪਏ ਨੇ

ਅੱਜ ਕਿੰਨੇ ਦਿਨਾਂ ਮਗਰੋਂ ਆਪਣੇ ਘਰ ਫੇਰ ਵਾਪਸੀ ਹੋਈ ਹੈ ਪਰ ਸੱਚੀ-ਪੁਛੋ ਆਪਣਾ ਦਿਲ ਓਥੇ ਹੀ ਛੱਡ ਆਈ ਹਾਂ…ਜਦੋਂ ਦੀ ਆਈ ਬਸ ਇਹੋ ਹੀ ਸੋਚੀ ਜਾ ਰਹੀ ਹਾਂ ਕੇ ਕਾਸ਼ ਉਹ ਮੇਰੀ “ਧੀ” ਹੁੰਦੀ..

ਵੱਡੇ ਘਰ

by Manpreet Singh December 26, 2018

ਵੱਡੇ ਘਰਾਂ ਦੀਆਂ ਵੱਡੀਆਂ ਗੱਲਾਂ ਹੁੰਦੀਆਂ । ਅੱਜ ਤੋਂ ਕੋਈ ਵੀਹ ਪੱਚੀ ਸਾਲ ਪਹਿਲਾਂ ਦੀ ਗੱਲ ਹੋਣੀ ਹੈ ਕਿ ਮੈ ਆਪਣੇ ਪੰਜਾਬੀ ਪ੍ਰਾਪਰਟੀ ਵੇਚਣ ਵਾਲੇ ਏਜੰਟ ਨਾਲ ਜ਼ਮੀਨ ਦੇਖ ਰਿਹਾ ਸੀ ਤਾਂ ਉਹ ਮੈਨੂੰ ਕਹਿੰਦਾ ਆਹ ਤੈਨੂੰ ਇਕ ਘਰ ਦਿਖਾਵਾਂ ਜੋ ਆਪਣਾ ਪੰਜਾਬੀ ਮੁੰਡਾ ਪਾ ਰਿਹਾ ਤੇ ਉਹਨੇ ਕਾਰ ਇਕ ਘਰ ਕੋਲ ਲਿਜਾ ਕੇ ਲਾ ਦਿੱਤੀ । ਮੈ ਕਿਹਾ ਆਹ ਕਿਹੜੀ ਵੱਡੀ ਗੱਲ ਹੈ ? ਥੋੜਾ ਵੱਡਾ ਹੈ ਪਰ ਆਮ ਘਰਾਂ ਵਰਗਾ ਹੀ ਘਰ ਹੈ । ਉਹ ਹੱਸਣ ਲੱਗ ਪਿਆ ਕਹਿੰਦਾ ਇਹ ਤਾਂ ਕਾਰਾਂ ਪਾਰਕ ਕਰਨ ਲਈ ਗੈਰਾਜ ਹੈ ਘਰ ਤਾਂ ਹੌਅ ਬਣਦਾ । ਇਹ ਘਰ ਦਸ ਏਕੜ ਜ਼ਮੀਨ ਵਿੱਚ ਬਣ ਰਿਹਾ ਸੀ । ਜਦੋਂ ਮੈ ਅੰਦਰ ਵੜ ਕੇ ਛੱਤ ਵੱਲ ਮੂੰਹ ਕੀਤਾ ਤਾਂ ਪੱਗ ਲਹਿਣ ਵਾਲੀ ਹੋ ਗਈ । ਅੰਦਰ ਵੜ ਕੇ ਸੁਰਤੀ ਭੌਂਅ ਗਈ । ਏਡਾ ਵੱਡਾ ਘਰ ? ਓ ਮੇਰੇ ਰੱਬਾ । ਸਾਡੇ ਇੱਥੇ ਘਰ ਲੱਕੜ ਦੇ ਬਣਦੇ ਹਨ ਤੇ ਉਹਦੀ ਹਾਲੇ ਫਰੇਮਿੰਗ ਹੋ ਰਹੀ ਸੀ । ਮਤਲਬ ਛੱਤ ਪੈ ਗੀ ਸੀ ਪਰ ਅੰਦਰੋਂ ਕੰਧਾਂ ਤੇ ਪੌੜੀਆਂ ਹੋਰ ਸਾਰਾ ਕੰਮ ਪਿਆ ਸੀ ।
ਖ਼ੈਰ ਮੇਰੇ ਕੋਲ ਸਾਰਾ ਘਰ ਦੇਖਣ ਦੀ ਹਿੰਮਤ ਨਹੀਂ ਪਈ । ਮੈ ਕਿਹਾ ਛੱਡ ਯਾਰ । ਇਹੋ ਜਹੇ ਘਰ ਦੀ ਮਨੁੱਖ ਨੂੰ ਕੀ ਲੋੜ ਹੈ ? ਅੰਦਰ ਕਿਹੜਾ ਹਾਥੀ ਬੰਨ੍ਹਣੇ ਹਨ ? ਉਹ ਨੌਜਵਾਨ ਮੁੰਡੇ ਦਾ ਵਾਹਵਾ ਕੰਮ ਚੱਲਦਾ ਸੀ ਤੇ ਬਹੁਤ ਸਾਰੇ ਘਰ ਤੇ ਪਲਾਟ ਵੇਚ ਚੁੱਕਾ ਸੀ । ਇਕ ਬਾਹਰ ਕੰਪਨੀ ਠੇਕੇ ਲੈਂਦੀ ਸੀ । ਤੇ ਅੰਨਾਂ ਪੈਸਾ ਸੀ ਕੋਲ ।
ਉਹ ਘਰ ਕਈ ਸਾਲ ਬਣਦਾ ਰਿਹਾ ਤੇ ਉਹ ਸਿਟੀ ਤੋਂ ਪਾਸ ਨਹੀਂ ਕਰਾ ਸਕਿਆ । ਗਲਤੀ ਉੱਪਰ ਗਲਤੀ ਹੋ ਰਹੀ ਸੀ । ਅਖੀਰ ਉਹ ਉਵੇ ਹੀ ਖਾਲ਼ੀ ਅੱਧ ਬਣਿਆ ਘਰ ਗੋਰੇ ਨੂੰ ਵੇਚ ਗਿਆ । ਕੰਪਨੀ ਚ ਘਾਟੇ ਪੈਣੇ ਸ਼ੁਰੂ ਹੋ ਗਏ ਸੀ ਤੇ ਅਖੀਰ ਨੂੰ ਉਹ ਬੈਂਕਰਪਟ ਹੋ ਗਿਆ ।
ਇਹ ਘਰ ਗੋਰੇ ਨੇ ਪੂਰਾ ਕੀਤਾ ਤੇ ਪਿਛਲੇ ਤਿੰਨ ਕੁ ਸਾਲ ਪਹਿਲਾਂ ਉੱਥੇ ਵਾਲੀ ਜ਼ਮੀਨ ਦੇ ਲਾਗੇ ਛੋਟੇ ਛੋਟੇ ਘਰ ਪੈਣ ਲੱਗ ਪਏ ਤੇ ਇਹ ਜ਼ਮੀਨ ਦੀ ਕੀਮਤ ਕਈ ਗੁਣਾ ਵੱਧ ਗਈ । ਗੋਰੇ ਨੇ ਉਹ ਜ਼ਮੀਨ ਤੇ ਘਰ ਅੱਗੇ ਕਿਸੇ ਕੰਪਨੀ ਨੂੰ ਵੇਚ ਦਿੱਤਾ ਤੇ ਉਹ ਘਰ ਢਾਅ ਦਿੱਤਾ ਗਿਆ । ਮੈਨੂੰ ਬੜਾ ਦੁੱਖ ਮਹਿਸੂਸ ਹੋਇਆ ਤੇ ਹੈਰਾਨੀ ਵੀ ਕਿ ਬੰਦਾ ਇਕ ਘਰ ਪਿੱਛੇ ਕਿੰਨੇ ਕਿੰਨੇ ਦੁੱਖ ਝੱਲਦਾ ਤੇ ਕੀ ਕੀ ਪਾਪੜ ਵੇਲਦਾ । ਸਾਡੇ ਇੱਥੇ ਘਰਾਂ ਦੀ ਮੁਨਿਆਦ ਕੋਈ 100 ਕੁ ਸਾਲ ਹੁੰਦੀ ਹੈ ਪਰ ਇਸ ਵੱਡੇ ਘਰ ਨੂੰ ਵੀਹ ਸਾਲ ਵੀ ਦੇਖਣੇ ਨਸੀਬ ਨਹੀਂ ਹੋਏ ਜਿਵੇਂ ਕਿਸੇ ਰਾਜੇ ਦੇ ਮਹਿਲਾਂ ਤੇ ਕਿਸੇ ਨੇ ਹਮਲਾ ਕਰ ਕੇ ਉਹਦਾ ਮਹਿਲ ਉਜਾੜ ਦਿੱਤਾ ਹੋਵੇ । ਇਕ ਰਾਤ ਸੌਣ ਦੀ ਖਾਤਿਰ ਬੰਦਾ ਸਾਰਾ ਦਿਨ ਪਸ਼ੂ ਹੋਇਆ ਰਹਿੰਦਾ ਤੇ ਸੁੱਤੇ ਪਏ ਮਨੁੱਖ ਨੂੰ ਆਪਦੇ ਘਰ ਦੀ ਖ਼ਬਰ ਨਹੀਂ ਹੁੰਦੀ ਕਿ ਕੁਲੀ ਵਿੱਚ ਸੁੱਤਾ ਪਿਆ ਕਿ ਮਹਿਲ ਵਿੱਚ । ਬਾਣ ਦੀ ਮੰਜੀ ਤੇ ਸੁੱਤਾ ਪਿਆ ਕਿ ਗੁਦੇਲੇ ਤੇ ।
ਦੁਨੀਆਂ ਦੀ ਸੱਭ ਤੋਂ ਹੁਸੀਨ ਔਰਤ ਨਾਲ ਪਈ ਹੈ ਕਿ ਨਾਲ ਦੇ ਕਮਰੇ ਵਿੱਚ ਆਪ ਦੇ ਬਚਿਆਂ ਦੀ ਮਾਂ ਪੁੱਤ ਨੂੰ ਨਾਲ ਲਈ ਪਈ ਹੈ ?

  • 1
  • 2
  • 3

Punjabi Status

  • Ajj Da Vichar
  • Attitude Status in Punjabi
  • Funny punjabi status
  • Motivational Status Punjabi
  • Punjabi Dharmik Status
  • Punjabi Love status
  • Punjabi Song Status
  • Punjabi Status for Boys
  • Punjabi Status for Girls
  • Punjabi Status Sardari
  • Punjabi Status Yaari

Punjabi Boliyan

  • Punjabi Boliyan
  • Bari Barsi Boliyan
  • Bhangra Boliyan
  • Dadka Mail
  • Deor Bharjayii
  • Desi Boliyan
  • Funny Punjabi Boliyan
  • Giddha Boliyan
  • Jeeja Saali
  • Jeth Bhabhi
  • Kudi Vallo Boliyan
  • Maa Dhee
  • Munde Vallo Boliyan
  • Nanaan Bharjayi
  • Nanka Mail
  • Nooh Sass
  • Punjabi Tappe

Punjabi Stories

  • Funny Punjabi Stories
  • Sad Stories
  • General
  • Kids Stories
  • Long Stories
  • Mix
  • Moments
  • Motivational
  • Punjabi Virsa
  • Religious
  • Short Stories
  • Social Evils
  • Spirtual

Wallpapers

  • Ajj Da Vichar
  • Attitude Status in Punjabi
  • Funny punjabi status
  • Motivational Status Punjabi
  • Punjabi Dharmik Status
  • Punjabi Love status
  • Punjabi Song Status
  • Punjabi Status for Boys
  • Punjabi Status for Girls
  • Punjabi Status Sardari
  • Punjabi Status Yaari

About Us

Punjabi stories is providing hand picked and unique punjabi stories for the users all around the world. We also publish stories send by our users related to different categories such as motivational, religious, spirtual, emotional, love and of general.

Download Application

download punjabi stories app

download punjabi stories app
  • Facebook
  • Instagram
  • Pinterest
  • Youtube
  • Quiz
  • Sachian Gallan
  • Punjabi Status
  • Punjabi Kids Stories
  • Punjabi Motivational Kahanian
  • Punjabi Short Stories
  • Shop
  • Punjabi Wallpapers
  • Refund and Cancellation Policy
  • Terms and conditions
  • Refund policy
  • About
  • Contact Us
  • Privacy Policy

@2021 - All Right Reserved. Designed and Developed by PunjabiStories

Punjabi Stories
  • All Kahaniyan
    • General
    • Religious
    • Motivational
    • Sad Stories
    • Funny Punjabi Stories
    • Kids Stories
    • Long Stories
    • Love Stories
    • Punjabi Virsa
    • Mix
  • Punjabi Status
    • Attitude Status in Punjabi
    • Motivational Status Punjabi
    • Wallpapers – Image Status
    • Punjabi Love status
    • Punjabi Love Shayari
    • Punjabi Whatsapp Status
    • Punjabi Status for Boys
    • Punjabi Status for Girls
    • Punjabi Status Yaari
    • Ajj Da Vichar
    • Sad Status Punjabi
    • Punjabi Song Status
    • Sachian Gallan
    • Punjabi Dharmik Status
    • Shayari
    • Punjabi Status Sardari
    • Funny punjabi status
  • Blog
  • Punjabi Boliyan
    • Bhangra Boliyan
    • Desi Boliyan
    • Dadka Mail
    • Nanka Mail
    • Munde Vallo Boliyan
    • Bari Barsi Boliyan
    • Kudi Vallo Boliyan
    • Jeeja Saali
    • Jeth Bhabhi
    • Maa Dhee
    • Nanaan Bharjayi
    • Nooh Sass
    • Punjabi Tappe
    • Deor Bharjayii
    • Funny Punjabi Boliyan
    • Giddha Boliyan
    • Munde Vallo Boliyan
  • Wishes
    • Birthday Wishes
      • Birthday Wishes for Brother
      • Birthday Wishes for Sister
      • Birthday Wishes for Friend
      • Birthday Wishes for Father
      • Birthday Wishes for Mother
      • Birthday Wishes for Wife
      • Birthday Wishes for Husband
      • Birthday Wishes for Son
      • Birthday Wishes for Daughter
    • Festival Wishes
      • Baisakhi Wishes
  • Wallpapers
    • Sad Status Images
    • Love Status Images
    • Motivational Status Images
    • Gurbani Status Images
    • Sachian Gallan Status
    • Funny Status Images
    • Ajj Da Vichar
    • Image Status
  • Punjabi Shayari

Shopping Cart

Close

No products in the cart.

Close