ਬਲਬੀਰੋ 20 ਸਾਲ ਦੀ ਉਮਰ ‘ਚ ਉਸਦਾ ਵਿਆਹ ਹੋਇਆ ਸੀ | ਨੌਂ ਮਹੀਨਿਆਂ ਮਗਰੋਂ ਬਲਬੀਰੋ ਦੀ ਕੁੱਖ ਨੂੰ ਭਾਗ ਲੱਗ ਗਏ | ਘਰ ਵਿੱਚ ਪੂਰਾ ਖੁਸ਼ੀਆਂ ਦਾ ਮਾਹੌਲ ਸੀ | ਮੁੰਡੇ ਦੇ ਪੰਜ ਕੁ ਮਹੀਨਿਆਂ ਮਗਰੋਂ ਬਲਬੀਰੋ ਦੇ ਘਰਵਾਲੇ ਦੀ ਮੌਤ ਹੋ ਗਈ | ਬਲਬੀਰੋ 21 ਕੁ ਸਾਲ ਦੀ ਨਿੱਕੀ ਜਿਹੀ ਉਮਰੇ ਹੀ ਵਿਧਵਾ ਹੋ ਬੈਠੀ ਸੀ | ਗੋਦੀ ਪਏ ਛੋਟੇ ਜਿਹੇ ਮਲੂਕ ਨਾਲ ਬਲਬੀਰੋ ਪੇਕੇ ਘਰੇ ਬੈਠੀ ਦਿਨ ਕੱਟ ਰਹੀ ਸੀ | ਬੱਚਾ ਗੋਦੀ ਹੋਣ ਕਰਕੇ ਉਸਨੂੰ ਦੁਬਾਰਾ ਅਪਨਾਉਣ ਲਈ ਕੋਈ ਵੀ ਤਿਆਰ ਨਹੀਂ ਸੀ | ਰੱਬ ਦਾ ਭਾਣਾ ਮੰਨ ਕੇ ਉਸਨੇ ਆਪਣੇ ਬੱਚੇ ਨਾਲ ਹੀ ਜਿੰਦਗੀ ਗੁਜਾਰਨਾ ਆਪਣਾ ਭਵਿੱਖ ਮੰਨ ਲਿਆ ਸੀ | ਬੀ.ਏ.(B.A) ਤੱਕ ਪੜੀ ਹੋਣ ਕਰਕੇ ਉਸਨੇ ਆਪਣੇ ਗੁਜਾਰੇ ਲਈ ੲਇੱਕ ਨੌਕਰੀ ਲੱਭ ਲਈ ਸੀ | ਨਿਆਣੀ ਉਮਰੇ ਵਿਆਹੀ ਜਾਣ ਕਰਕੇ ਉਹ ਵਿਆਹੀ ਜਾਂ ਵਿਧਵਾ ਨਹੀਂ ਸੀ ਲੱਗਦੀ | ਇਸੇ ਕਰਕੇ ਉਸਦੇ ਦਫਤਰ ਵਿੱਚ ਕੰਮ ਕਰ ਰਹੇ ਮੁੰਡੇ ਨੇ ਉਸਨੂੰ ਪਸੰਦ ਕਰਨ ਦਾ ਦਾਅਵਾ ਕਰਦੇ ਹੋਏ , ਉਸ ਨਾਲ ਵਿਆਹ ਕਰਵਾਉਣ ਲਈ ਆਖ ਦਿੱਤਾ ਸੀ| ਪਰ ਬਲਬੀਰੋ ਨੇ ਉਸਨੂੰ ਨਜ਼ਰ ਅੰਦਾਜ ਕਰ ਦਿੱਤਾ | ਜਦੋਂ ਉਹ ਮੁੰਡਾ ਕਈ ਦਿਨਾਂ ਤੱਕ ਵਿਆਹ ਲਈ ਵਾਰ ਵਾਰ ਕਹਿੰਦਾ ਰਿਹਾ ਤਾਂ ਇੱਕ ਦਿਨ ਬਲਬੀਰੋ ਨੇ ਹਾਰ ਕੇ ਉਸਨੂੰ ਆਪਣੇ ਵਾਰੇ ਸਭ ਕੁਝ ਸੱਚ ਦੱਸ ਦਿੱਤਾ | ਇਹ ਸਭ ਸੁਣ ਕੇ ਮੁੰਡੇ ਦੇ ਮੂੰਹੋਂ ਮਸਾਂ ਹੀ ਬੋਲ ਨਿਕਲੇ ਕਹਿੰਦਾ , “ਉਹ ਹੋ ! ਤੁਸੀਂ ਵਿਧਵਾ ਹੋਂ ” ਬਲਬੀਰੋ ਬੋਲੀ ਕਿਉਂ ਹੁਣ ਤੁਸੀਂ ਮੈਨੂੰ ਅਪਨਾ ਸਕਦੇ ਹੋਂ ?
ਮੁੰਡਾ ਬੋਲਿਆ, ਵਿਆਹ ਉਹ ਵੀ ਵਿਧਵਾ ਨਾਲ ਨਹੀਂ ਕਦੇ ਵੀ ਨਹੀਂ | ਮੇਰਾ ਪਰਿਵਾਰ ਤਾਂ ਉੱਚੀ ਸ਼ਾਨ ਵਾਲਾ ਕਹਿੰਦਾ ਕਹਾਂਉਦਾ ਪਰਿਵਾਰ ਐ , ਉਹ ਇੱਕ ਵਿਧਵਾ ਨਾਲ ਵਿਆਹ ਕਰਨ ਨੂੰ ਕਦੇ ਨਹੀਂ ਰਾਜੀ ਹੋਏਗਾ | ਵਿਧਵਾ ਉਹ ਵੀ ਇੱਕ ਬੱਚੇ ਦੀ ਮਾਂ , ਮਾਫ ਕਰਨਾ ਜੀ ਮੇਰੀ ਹੀ ਗਲਤੀ ਸੀ ਜੋ ਮੈਂ ਤੁਹਾਨੂੰ ਵਿਆਹ ਲਈ ਕਿਹਾ | ਬਲਬੀਰੋ ਅੰਦਰੋਂ ਅੰਦਰੀਂ ਜਿਵੇਂ ਇੱਕ ਵਾਰ ਫਿਰ ਟੁੱਟ ਗਈ ਹੋਵੇ , ਉਸਦੀਆਂ ਅੱਖਾਂ ‘ਚੋਂ ਵਰ੍ਹਿਆਂ ਦਾ ਸੈਲਾਬ ਨਿੱਕਲ ਆਇਆ ਸੀ , ਤੇ ਓਹਦਿਆਂ ਕੰਨਾਂ ‘ਚ ਇੱਕੋ ਹੀ ਆਵਾਜ ਗੂੰਜ ਰਹੀ ਸੀ , “ਉਹ ਹੋ ! ਤੁਸੀਂ ਵਿਧਵਾ ਹੋਂ ”
ਦੋਸਤੋ ਸਾਡੇ ਸਮਾਜ ਨੂੰ ਵਿਧਵਾ ਨੂੰ ਵੀ ਦੁਬਾਰਾ ਜਿੰਦਗੀ ਜੀਉਣ ਦਾ ਮੌਕਾ ਦੇਣਾ ਚਾਹੀਦਾ ਹੈ , ਤਾਂ ਜੋ ਵਿਧਵਾ ਨਾਂ ਦਾ ਸ਼ਬਦ ਅਔਰਤ ਦੀ ਜਿੰਦਗੀ ਤੋਂ ਖਤਮ ਹੋ ਸਕੇ,ਤੇ ਉਹ ਔਰਤ ਵੀ ਨਵੇਂ ਸਿਰੇ ਤੋਂ ਆਪਣੀ ਜਿੰਦਗੀ ਸ਼ੁਰੂ ਕਰ ਸਕੇ |
ਲੇਖਕ -( ਅਗਿਆਤ )
Unknown
