viah diyan boliyan Message #tags

“ਲਾੜ੍ਹਿਆ ਕੱਲੜਾ ਕਿਉਂ ਆਇਆ ਵੇ ਅੱਜ ਦੀ ਘੜੀ
ਨਾਲ ਬੇਬੇ ਕਿਉਂ ਨਾ ਲਿਆਇਆ ਵੇ ਅੱਜ ਦੀ ਘੜੀ”

ਚੀਰਿਆਂ ਵਾਲੇ ਮੇਰੇ ਬੀਰਨ ਆਏ
ਕਲਗੀਆਂ ਆਏ ਸਜਾਏ
ਪੰਜੇ ਬੀਰਨ ਆਏ ਛੱਕਾਂ ਪੂਰਨ
ਨਿੱਗਰ ਭਾਤ ਲਿਆਏ
ਪੰਜ ਤੇਵਰ ਮੇਰੀ ਸੱਸ ਰਾਣੀ ਦੇ
ਦਰਾਣੇ ਜਠਾਣੇ ਵੀ ਨਾਲ ਮਨਾਏ
ਨਣਦੀ ਦਾ ਤਾਂ ਘੂੰਮ ਘਾਗਰਾ
ਲਾਗਣਾਂ ਨੂੰ ਕੁੜਤੀ ਝੋਨੇ ਆਏ (ਦੁਪੱਟੇ)
ਮੈਨੂੰ ਤਾਂ ਨੌਂ ਲੱਖਾਂ ਹਾਰ ਨੀ
ਕੰਤ ਜੀ ਨੂੰ ਕੈਂਠਾ ਘੜਵਾਏ
ਗੱਡਾ ਤਾਂ ਆਇਆ ਭਾਤ ਦਾ ਭਰਿਆ
ਵੀਰਨ ਮਾਂ ਜਾਏ ਆਏ………

ਕਰਤਾਰੋ ਪਰਾਂਦੀਆਂ ਤਣ ਲੈ ਨੀ
ਡੋਰਾਂ ਬੱਟ ਕੇ ਸੁੱਚੀਆਂ
ਨੀ ਆਹ ਤੇਰੀਆਂ ਭਾਬੀਆਂ ਨੀ
ਅਸਲੋਂ ਨੰਗੀਆਂ ਤੇ ਬੁੱਚੀਆਂ
ਸ਼ਰਾਰਤ ਕਰਦੀਆਂ ਨੀ
ਨੀ ਇਹ ਸਿਰੇ ਦੀਆਂ ਲੁੱਚੀਆਂ

ਇਹਨਾਂ ਨਾਨਕੀਆਂ ਨੇ ਮਣ ਮਣ ਖਾਣੇ ਮੰਡੇ
ਇਹਨਾਂ ਨਾਨਕੀਆਂ ਦੇ ਧਰੋ ਮੌਰਾਂ ਤੇ ਡੰਡੇ
ਇਹਨਾ ਨਾਨਕੀਆਂ ਨੇ ਮਣ ਮਣ ਖਾਣੇ ਛੋਲੇ
ਇਹਨਾਂ ਨਾਨਕੀਆਂ ਦੀ ਰੜੇ ਭੰਬੀਰੀ ਬੋਲੇ

ਸੰਨ੍ਹੀ ਤਾਂ ਰਲਾ ਦਿਓ ਗਾਈਆਂ ਨੂੰ
ਖਲ ਕੁੱਟ ਦੋ ਨਾਨਕੀਆਂ ਆਈਆਂ ਨੂੰ
ਕਣਕ ਤੁਲਾ ਦਿਓ ਬਾਣੀਆਂ ਨੂੰ
ਨਾਲੇ ਨਾਨਕੀਆਂ ਮੰਨੋ ਦੇ ਜਾਣੀਆਂ ਨੂੰ

ਬਚੋਲਿਆ ਡੰਡੀ ਮਾਰ ਗਿਆ
ਕਰ ਗਿਆ ਧੋਖਾ ਸਾਡੇ ਨਾਲ
ਲਾੜੇ ਬੇਬੇ ਬੱਦਣੀ ਨਿਕਲੀ
ਭੱਜੀ ਫਿਰਦੀ ਛੜਿਆਂ ਨਾਲ

ਉਠ ਨੀ ਬੀਬੀ ਸੁੱਤੀਏ ਨੀ ਬੀਰੇ ਤੇਰੜੇ ਆਏ
ਨਾਲ ਸੋਂਹਦੀਆਂ ਭਾਬੀਆਂ ਬੀਰੇ ਅੰਮੜੀ ਜਾਏ
ਤੇਰੇ ਮੋਹ ਦੇ ਬੱਧੇ ਨੀ ਵਾਟਾਂ ਝਾਗ ਕੇ ਆਏ
ਸ਼ਗਨ ਮਨਾ ਬੀਬੀ ਨੀ ਭਲੇ ਕਾਰਜ ਆਏ

ਬਲਬੀਰ ਕੁਰ ਨਖਰੋ
ਬੂਹੇ ਉੱਤੇ ਤੇਲ ਚੁਆ ਬੀਬੀ
ਇਹਨਾਂ ਪੇਕਿਆਂ ਦੇ ਸ਼ਗਨ ਮਨਾ ਬੀਬੀ
ਮਾਮੀਆਂ ਨੂੰ ਪੱਲਾ ਪੁੜੀ ਪਾ ਬੀਬੀ
ਭਤੀਜਿਆਂ ਨੂੰ ਗਲ ਨਾਲ ਲਾ ਬੀਬੀ
ਅੰਮਾਂ ਜਾਇਆਂ ਦੇ ਸ਼ਗਨ ਮਨਾ ਬੀਬੀ

ਨੰਦ ਕੁਰ ਕੁੜੀਏ ਕੰਮ ਤਾਂ ਹੁੰਦੇ ਰਹਿਣਗੇ ਆਪੇ
ਨੀ ਆ ਜਾ ਧੀਏ ਸਰਦਲ ਤੇ
ਤੇਲ ਚੋਅ ਨੀ ਆਏ ਨੇ ਕੇਰੇ ਮਾਪੇ

ਨਾਨਕੀਆਂ ਨੂੰ ਖਲ ਕੁੱਟ ਦਿਓ ਜੀ
ਜੀਹਨਾਂ ਧੌਣ ਪੱਚੀ ਸਰ ਖਾਣਾ (ਸੇਰ)
ਸਾਨੂੰ ਪੂਰੀਆਂ ਜੀ
ਜੀਹਨਾਂ ਮੁਸ਼ਕ ਲਿਆਂ ਰੱਜ ਜਾਣਾ

ਖਸਮ ਬਿਨਾ ਰੋਟੀ ਨਹੀਂ
ਬਚੋਲੇ ਬਿਨਾ ਵੋਟ੍ਹੀ ਨਹੀਂ

ਬਚੋਲਿਆ ਕਪਟ ਕਮਾਇਆ ਬੇ
ਊਠ ਮਗਰ ਛੇਲਾ ਲਾਇਆ ਬੇ
ਸਾਡੀ ਤਾਂ ਮਜਬੂਰੀ ਦਾ
ਤੈਂ ਪੂਰਾ ਫੈਦਾ ‘ਠਾਇਆ ਬੇ
ਸਾਡੀ ਬੀਬੀ ਨਿਰੀ ਮੁਸਕਣ ਬੂਟੀ
ਬੇ ਤੈਂ ਘੋਰੀ ਪੱਲੇ ਪਾਇਆ ਬੇ
ਸਾਡੀ ਕੰਨਿਆ ਬਾਰਾਂ ਬਰਸੀ ਨੂੰ
ਤੈਂ ਬੁੱਢੜਾ ਸਾਕ ਕਰਾਇਆ ਬੇ