punjabi sithniyan collection

ਲਾੜਾ ਪੜ੍ਹਿਆ ਸੁਣੀਂਦਾ ਗੁੜ੍ਹਿਆ ਸੁਣੀਂਦਾ
ਮੇਰੀ ਸਿੱਠਣੀ ਵਾਚ ਜਾ ਆਕੇ
ਨੀ ਝੂਠਾ ਜਾਰਨੀ ਦਾ ਗੱਪ ਮਾਰਨੀ ਦਾ
ਬੈਠਾ ਬਿੱਲ ਬਤੋਰੀ ਮੰਗਣਾਂ ਝਾਕੇ

ਸਈਓ ਨੀ ਮੇਰੀ ਰੁਕਮਣ ਕੁੰਡੀ
ਉਹ ਬੀ ਧਰ ‘ਤੀ ਠੇਕੇ
ਲਾੜਾ ਤਾਂ ਭੈਣੋ ਬੜਾ ਬਗਲੋਲ
ਗੁਹਾਰਿਆਂ ਨੂੰ ਮੱਥਾ ਟੇਕੇ

ਇੱਟਾਂ ਦਾ ਭਰਦੀ ਟੋਕਰਾ ਜੀਜਾ
ਵੇ ਕੋਈ ਰੋੜਿਆਂ ਦਾ ਭਰਦੀ ਖੂਹ
ਤੇਰੇ ਨਾਲ ਦੋਹਾ ਕੀ ਲਾਮਾਂ
ਵੇ ਤੇਰਾ ਬਾਂਦਰ ਵਰਗਾ
ਵੇ ਅਨਪੜ੍ਹ ਮੂਰਖਾ ਵੇ-ਮੂੰਹ

ਦਾਹੜੀ ਦਾ ਭਰ ਲਿਆ ਟੋਕਰਾ ਜੀਜਾ
ਵੇ ਕੋਈ ਮੁੱਛਾਂ ਦਾ ਭਰ ਲਿਆ ਛੱਜ
ਅੱਠ ਜਮਾਤਾਂ ਪੜ੍ਹ ਗਿਆ
ਤੈਨੂੰ ਅਜੇ ਨਾ ਬੋਲਣ ਦਾ
ਵੇ ਜੀਜਾ ਬੌਰੀਆ ਵੇ-ਚੱਜ

ਹਰਾ ਹਰਾ ਤੋਤਾ ਉਹਦੀ ਚੁੰਜ ਲਾਲ
ਨੀ ਪਿੰਜਰੇ ਵਿਚ ਬੋਲੇ
ਨੀ ਏਹ ਲਾੜਾ ਬੜਾ ਲੜਾਕੇਦਾਰ
ਨੀ ਇਹ ਤਾਂ ਬੜ ਬੜ ਬੋਲੇ

ਲਾੜਾ ਪੁੱਤ ਜਲਾਹੇ ਦਾ
ਜੁਲਾਹਾ ਨਲੀਆਂ ਨਾਲ ਤਾਣਾ ਤਣਦਾ
ਲਾੜਾ ਬੜਾ ਲੜਾਕੇਦਾਰ
ਮਾਂ ਦਾ ਖਸਮ ਅੜੀਓ
ਮੋਹਰੀ ਪੈਂਚਾਂ ਦਾ ਬਣਦਾ

ਨੌਕੜਾ ਵੀ ਬੁਣਦੀ ਮੰਜਾ ਲਾੜਿਆ
ਕੋਈ ਮੁੰਜ ਦੀ ਰੱਸੀ ਦਾ ਬਾਣ
ਤੂੰ ਸੰਘੇ ਗਿਣ ਜਾ ਮੰਜੇ ਦੇ
ਤੇਰੇ ਗਿਆਨ ਦੀ ਹੋ ਜੂ
ਵੇ ਜੀਜਾ ਗਿਆਨੀਆਂ ਬੇ-ਪਛਾਣ

ਕੰਧਾਂ ਚਿੱਤਮ ਚਿੱਤੀਆਂ ਲਾੜਿਆ
ਵੇ ਕੋਈ ਉੱਤੇ ਘੁੱਗੀਆਂ ਬੇ ਮੋਰ
ਤੂੰ ਤਾਂ ਸਹੁਰੀ ਢੁੱਕ ਗਿਆ
ਪਿੱਛੋਂ ਮਾਂ ਨੂੰ ਲੈ ਗੇ
ਬੇ ਸਿਰੇ ਦਿਆ ਮੂਰਖਾ ਬੇ-ਚੋਰ

ਮੇਰੀ ਗੁਆਚੀ ਆਰਸੀ ਜੀਜਾ
ਕੋਈ ਤੇਰੀ ਗੁਆਚੀ ਮਾਂ
ਚਲ ਆਪਾਂ ਦੋਮੇਂ ਭਾਲੀਏ
ਤੂੰ ਕਰ ਛਤਰੀ ਦੀ
ਵੇ ਜੀਜਾ ਆਂਡਲ੍ਹਾ ਵੇ-ਛਾਂ