punjabi desi sithniyan

ਛੰਨ ਪੱਕੀਆਂ ਛੰਨ ਪੱਕੀਆਂ ਛੰਨ ਪੱਕੀਆਂ ਕੁੱਤੀਆਂ
ਤੇਰਾ ਆਗਾ ਭਾਰੀ ਪਾਛਾ ਭਾਰੀ ਟਾਂਗਾਂ ਸੁੱਕਮ ਸੁੱਕੀਆਂ

ਛੰਦ ਸੁਣਾ ਰੈ ਬਟੇਊ (ਜਮਾਈ) ਊਤਣੀ ਕੇ
ਨਹੀਂ ਤੋਂ ਉਲਟਾ ਲਟਕਾਉਂ ਭੂਤਣੀ ਕੇ

ਛੰਨ ਪਕਾਈਆਂ ਛੰਨ ਪਕਾਈਆਂ ਛੰਨ ਪਕਾਈਆਂ ਝੋਲ
ਸਾਂਢੂ ਤਾਂ ਮੇਰਾ ਸੁੱਕਿਆ ਟਾਂਡਾ ਸਾਲੀ ਗੋਲ ਮਟੋਲ

ਜੀਜਾ ਪੱਗ ਨਾ ਬੰਨ੍ਹੀ ਬੇ
ਤੂੰ ਲਾਲ ਰੰਗ ਦੀ
ਤੇਰੀ ਮਾਂ ਲਾੜਿਆ ਬੇ
ਸਾਡੇ ਨਾਈ ਜਿਹਾ ਯਾਰ ਮੰਗਦੀ
ਨਾਈ ਦੇ ਗਿਆ ਜਵਾਬ
ਕਹਿੰਦਾ ਮਾਈ ਮੇਰੇ ਨਾ ਪਸੰਦ ਦੀ
ਉਹਨੂੰ ਕਹੀਂ ਲਾੜਿਆ ਵੇ
ਘੱਗਰੀ ਪਾ ਕੇ ਰੱਖੇ ਢੰਗ ਦੀ

ਜਲ ਮੁਰਗੀ ਨੀ ਭੈਣੋ ਜਲ ਮੁਰਗੀ
ਕੁੜਮਾ ਜੋਰੋ ਪਾ ਕੇ ਘੱਗਰੀ
ਪਿੰਡ ਦੇ ਮਰਾਸੀ ਨਾਲ ਤੁਰ ’ਗੀ

ਲਾੜਾ ਝੂਰੇ ਨੀ ਝੂਰੇ ਕਿਹੜੀ ਗੱਲੋਂ
ਉਹਨੂੰ ਮਾਂ ਦੇ ਪਛੋਕੇ ਦਾ ਹੁੰਦੇਸਾ
ਲਾੜਾ ਝੂਰੇ ਨੀ ਝੂਰੇ ਕਿਹੜੀ ਗੱਲੋਂ
ਉਹਦੇ ਘਰੋਂ ਤਾਂ ਆਇਆ ਸੰਦੇਸਾ
ਲਾੜਾ ਝੂਰੇ ਨੀ ਝੂਰੇ ਕਿਹੜੀ ਗੱਲੋਂ
ਬੋਬੋ ਨੇ ਪੁੱਤ ਜੰਮਿਆ ਪਲੇਠਾ

ਲਾੜੇ ਭੈਣਾਂ ਕੰਜ ਕਮਾਰੀ, ਬੜੀ ਪਿਆਰੀ
ਇਕ ਰਪੱਈਆ ਸਿੱਟ ਅੜਿਆ
ਰਾਤੀਂ ਬੱਦਣੀ ਦੇ ਮੰਜੇ ’ਤੇ, ਪਲੰਗੇ ਤੇ
ਕਾਲੇ ਰੰਗ ਦਾ ਰਿੱਛ ਚੜ੍ਹਿਆ
ਰਿੱਛ ਦੇ ਕੱਕੇ ਕੱਕੇ ਬਾਲ, ਅੱਖਾਂ ਲਾਲ
ਉਹਦੇ ਭਾਣੇ ਸਿੱਖ ਚੜ੍ਹਿਆ

ਲਾੜਿਆ ਭੈਣਾਂ ਜਾਰਨੀ ਬੇ
ਸੱਥ ਵਿਚ ਪੀਲ੍ਹ ਪਲਾਂਘੜਾ ਖੇਲੇ
ਭੱਜ ’ਗੀ ਬੇ ਜੱਧਣੀ ਗਿੰਦਰ ਨੂੰ ਲੈ ਕੇ
ਉਹ ਤਾਂ ਚੜ੍ਹ ’ਗੀ ਬਠਿੰਡੇ ਆਲੀ ਰੇਲੇ

ਛੜੇ ਲੁੱਟਣ ਦੀ ਮਾਰੀ
ਕੁੜਮਾ ਜੋਰੋ ਦਾਤਣ ਚੱਬਦੀ
ਛੜਿਆਂ ਨੇ ਕਰ ‘ਤੀ ਨਾਹ
ਦੇਖੋ ਕੁਦਰਤ ਰੱਬ ਦੀ
ਤੇਰਾ ਝੁਗਮ ਝੁੰਗਾ ਮੱਥਾ
ਸਕਲ ਭੋਰਾ ਨਾ ਚੱਜ ਦੀ

ਕਾਲੇ ‘ਜੇ ਤੰਬੇ ਵਾਲਿਆ
ਤੇਰੇ ਤੰਬੇ ਤੋਂ ਡਰ ਲਗਦਾ
ਤੰਬਾ ਤਾਂ ਦਿਆਂ ਉਤਾਰ
ਬਾਪ ਦੇ ਡੰਡੇ ਤੋਂ ਡਰ ਲਗਦਾ

ਸਭ ਤੋਂ ਮੂਹਰੇ ਆਉਂਦਿਆਂ ਬੇ
ਤੇਰੀ ਬਾਂਦਰ ਬਰਗੀ ਬੂਥੀ
ਨਾਸਾਂ ਤਾਂ ਮਿੱਡੀਆਂ ਫਿੱਡੀਆਂ ਵੇ
ਮੱਥਾ ਭੱਜੀ ਹੋਈ ਠੂਠੀ
ਟੰਗਾਂ ਤਾਂ ਬਿੰਗ ਤੜਿੰਗੀਆਂ ਵੇ
ਧਰਮ ਨਾਲ ਗੱਲ ਰਤਾ ਨਾ ਝੂਠੀ