punjabi desi sithniyan

ਜਨੇਤੀਆਂ ਜੋਰੋ ਬੜੀ ਸਮਝਾਈ ਬਿੱਲੇ ਨਾਲ ਦੋਸਤੀ ਨਾ ਲਾਈਂ
ਬਿੱਲਾ ਤੇਰਾ ਧਗੜਾ ਲਾਊ ਰਗੜਾ ਖਾਊ ਦੁੱਧ ਮਲਾਈ
ਨਾ ਦੇਹ ਝਿੜਕਾਂ ਰੱਖੂ ਬਿੜਕਾਂ ਬਿੱਲਾ ਬਾਪ ਦਾ ਜਮਾਈ
ਉਹਨੇ ਬੱਦਣੀ ਨੇ ਛੜਿਆਂ ਸੱਦਣੀ ਨੇ ਵਗ੍ਹਾਮੀਂ ਡਾਂਗ ਚਲਾਈ
ਬਿੱਲਾ ਹੋ ਗਿਆ ਲੰਗਾ ਪੈ ਗਿਆ ਪੰਗਾ ਠਾਣੇ ਪਰਚੀ ਵੇ ਪਾਈ

“ਬੇ ਸੁਣਦਿਆਂ ਕੰਨ ਕਰੀਂ”
“ਬੇ ਲਾੜਿਆ ਧਿਆਨ ਧਰੀਂ ”
“ ਬੇ ਮੁਰਖਾਂ ਲੜ ਬੰਨ੍ਹੀਂ”
“ ਬੇਅਕਲਾ ਸਮਝ ਕਰੀਂ”

ਪਰਮੋ ਬੀਬੀ ਚੁੱਕ ਲਿਆ ਸੜਕ ਤੋਂ ਛਾਪੇ
ਨੀ ਆ ਜਾ ਧੀਏ ਸਰਦਲ ਤੇ
ਬਾਹਰ ਖੜ੍ਹੇ ਨੀ ਸੁਭਾਗਣੇ ਤੇਰੇ ਮਾਪੇ ਨੀ

ਮਾਮੀਏ ਬੇਅਕਲੇ ਨੀ ਤੇਰੇ ਪੱਲੇ ਨਾ ਪੈਣੀ
ਗਿਆਨੀ ਨੂੰ ਤਾਂ ਸਮਝ ਲਈਏ ਨੀ
ਰਸਤੇ ਪਾ ਲਈਏ ਨੀ
ਤੈਨੂੰ ਮੂਰਖ ਨੂੰ ਕੀ ਸੁਣਨੀ ਕੀ ਕੈਹਣੀ (ਕਹਿਣੀ)

ਪੱਗ ਵੀ ਲਿਆਇਆ ਜੀਜਾ ਮਾਂਗਮੀ
ਬੇ ਕੋਈ ਜੁੱਤੀ ਵੀ ਲਿਆਇਆ ਬੇ ਚੁਰਾ
ਮਾਂ ਭੈਣ ਨੂੰ ਬੇਚ ਕੇ ਵੇ ਤੈਂ ਠਾਠ ਤਾਂ ਲਈ
ਬੇ ਜੀਜਾ ਕੰਨ ਕਰੀਂ…..ਬੇ ਬਣਾ

ਅਸੀਂ ਤਾਂ ਭੈਣੋਂ ਝਿਲਮਿਲ ਝਿਲਮਿਲ
ਦਾਦਕੀਆਂ ਬਦਰੰਗ ਫਿੱਕੇ ਰੰਗ
ਇਹਨਾਂ ਨਾਲ ਕੀ ਮਿੱਕਣਾ
ਏਹ ਤਾਂ ਸਿਰੇ ਦੀਆਂ ਨੰਗ ਮਨੰਗ
ਇਹਨਾਂ ਨਾਲ ਕੀ ਬੋਲਣਾ
ਇਹਨਾਂ ਨੰਗੀਆਂ ਨੂੰ ਭੋਰਾ ਨਾ ਸੰਗ

ਦਿਲ ਮੰਗਦਾ-ਦਿਲ ਮੰਗਦਾ
ਦਹੀ ਖਰੋਟ ਕੁੜੇ
ਮਾਮਾ ਤਾਂ ਸੁੱਕ ਕੇ ਲੱਕੜੀ ਹੋਇਆ
ਮਾਮੀ ਹੋ ਗਈ ਤੋਪ ਕੁੜੇ

ਅੰਦਰੋਂ ਨਿਕਲ ਕਰਤਾਰੋ ਨੀ
ਵੀਰੇ ਤੇਰੜੇ ਆਏ
ਭਾਬੀਆਂ ਟੀਰਮ ਟੀਰੀਆਂ
ਵੀਰੇ ਸੈਂਸੀਆਂ ਦੇ ਜਾਏ
ਅੰਦਰੋਂ ਨਿਕਲ ਵਿਆਂਦੜ੍ਹੇ ਨੀ
ਆਏ ਤੇਰੜੇ ਮਾਮੇ
ਝੱਗਿਆਂ ਦੇ ਖੀਸੇ ਬਾਹਰ ਨੂੰ
ਨੀ ਪੁੱਠੇ ਪਾਏ ਪਜਾਮੇ

ਮੇਹਰ ਕੁਰ ਭੈਣੇ ਨੀ ਤੂੰ ਸੁੱਖਾਂ ਲੱਧੀ ਜਾਈ
ਨੀ ਆ ਜਾ ਭੈਣੇ ਸਰਦਲ ਤੇ
ਨਾਨਕੀ ਛੱਕ ਤਾਂ ਲਿਆਏ ਤੇਰੇ ਭਾਈ ਨੀ

ਹੁਕਮ ਚੰਦ ਜਾ ਰਿਆ ਸੈ ਢਾਕੇ ਬਾਡਰ ਪੈ
ਪਾਛੈ ਜੋਰੋ ਨੇ ਜਾਮਿਆ ਰਾਮ ਰਤਨ
ਤੰਨੈ ਖੇਲਣੇ ਨੈ ਖਿਲੌਣਾ ਪਾ ਗਿਆ
ਤਾਏ ਗੈਲਿਆਂ ਮਿਲੈ ਸੈ ਇਸਕੀ ਸਕਲ

ਜਿਲ੍ਹੇ ਸਿੰਘ ਭਾਈ ਖਾਟਣ ਨੈ ਗਿਆ ਥਾ
ਪਾਛੇ ਤੇ ਲੋਗਾਈ ਨੈ ਕਰਿਆ ਚਾਲਾ
ਜੌੜੇ ਜਾਮ ਧਰੇ ਰੀ ਮੇਰੀਆ ਸਖੀਆ
ਇਕ ਕਤੀ ਗੋਰਾ ਦੂਆ ਜਮ੍ਹਾ ਈ ਕਾਲਾ
ਏਕ ਤੋ ਜਮੀਓ ਚਾਚੇ ਜੈਸਾ
ਦੂਸਰਾ ਭੈਂਗੀ ਸੀ ਆਂਖਾਂ ਆਲਾ

ਭੂਰਾ ਭਰਤੀ ਹੋ ਗਿਆ ਨੀ
ਉਹਨੂੰ ਬਾਡਰ ਮਿਲਿਆ ਢਾਕਾ
ਵਰ੍ਹੇ ਦਿਨਾਂ ਪਿਛੋਂ ਆਇਆ ਨੀ
ਦਰ ਵਿਚ ਖੇਹਲੇ ਕਾਕਾ
ਜੋਰੋ ਨੂੰ ਜਾ ਕੇ ਪੁੱਛਦਾ ਨੀ
ਸਾਲੀਏ ਆਹ ਕੀ ਹੋਇਆ ਬਾਕਾ
ਜੋਰੋ ਨੇ ਦੱਸਿਆ ਸੀ
ਬਿਨ ਬੱਦਲਾਂ ਤੋਂ ਪਿਆ ਛੜਾਕਾ
ਹੱਸ ਹੱਸ ਦੱਸਦੀ ਐ
ਛੋਲਿਆਂ ਨੂੰ ਪਿਆ ਪਟਾਕਾ
ਸਾਲੀ ਦੇ ਮਾਰ ਖਿੱਚ ਕੇ
ਬੱਟ ਕੇ ਮਾਰ ਚਟਾਕਾ
ਕਹਿੰਦਾ ਚੱਲ ਛੱਡ ਗੁੱਸਾਂ
ਮੁਖਤੀ ਮਿਲ ਗਿਆ ਕਾਕਾ