Punjabi Bolian

ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਪਾਵੇ।
ਸਹੁਰੀਂ ਤੁਰ ਜਾਂਦੀ,
ਸੱਲ੍ਹ ਮਿੱਤਰਾਂ ਦਾ ਖਾਵੇ।
ਦਰਦੀ ਯਾਰ ਬਿਨਾਂ,
ਰੋਂਦੀ ਕੌਣ ਵਰਾਵੇ।
ਪਿੰਡ ਦੀ ਨਖਰੋ ਨੂੰ……..,
ਬੰਤਾ ਬੋਕ ਵਿਰਾਵੇ |

ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਰਾਵਾਂ।
ਮਿੱਤਰਾਂ ਦੇਹ ਮੁੰਦਰੀ, .
ਤੈਨੂੰ ਆਪਣਾ ਰੁਮਾਲ ਫੜਾਵਾਂ।
ਤੇਰੀ ਸੱਜਰੀ ਪੈੜ ਦਾ ਰੇਤਾ,
ਚੱਕ ਚੱਕ ਹਿੱਕ ਨੂੰ ਲਾਵਾਂ।
ਮੱਚਦੇ ਮੱਚ ਲੈਣ ਦੇ……..,
ਦਿਲ ਤੇ ਲਿਖ ਲਿਆ ਨਾਵਾਂ।

ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਰਾਈਆਂ।
ਵਗਦੇ ਰਾਹ ਤੇ,
ਜੱਟ ਨੇ ਬੈਠਕਾਂ ਪਾਈਆਂ।
ਸੋਹਣੀ ਦੇ ਭਾਈਆਂ ਨੇ,
ਰਫਲਾਂ ਲਸੰਸ ਕਰਾਈਆਂ।
ਡਾਂਗਾਂ ਖੜਕਦੀਆਂ..
ਸੱਥ ਵਿੱਚ ਹੋਣ ਲੜਾਈਆਂ।