ਤੀਆਂ ਦੇ ਵਿੱਚ ਨੱਚੀ ਜੱਟੀ,
ਨੱਚੀ ਲਲਕਾਰ ਕੇ,
ਚੜਦੀ ਜਵਾਨੀ,ਨੱਚੀ
ਅੱਡੀ ਮਾਰ ਮਾਰ ਕੇ,
ਚੜਦੀ ……..,
ਕਾਨਾ-ਕਾਨਾ-ਕਾਨਾ
ਪਤਲੇ ਜਵਾਈ ਵਾਲੀਏ
ਤੇਰਾ ਗੱਡ ਦਿਆਂ ਖੇਤ ਵਿੱਚ ਡਰਨਾ
ਘਰ ਦੀ ਕਣਕ ਬਚੂ
ਨਾਲ ਡਰਦਾ ਮਿਰਗ ਨਾ ਵੜਨਾ
ਟੇਸ਼ਨ ਜੈਤੋ ਦਾ
ਜਿੱਥੇ ਡਾਕ ਗੱਡੀ ਨੇ ਖੜ੍ਹਨਾ
ਪਰ੍ਹੇ ਹੋ ਜਾ ਵੇ ਬਾਬੂ
ਅਸੀਂ ਯਾਰ ਗੁੱਸੇ ਨਹੀਂ ਕਰਨਾ
ਰੰਗ ਦੇ ਕਾਲੇ ਦੇ
ਨਾਲ ਕਦੇ ਨੀ ਚਨਾ।
ਛੜੇ ਲੁੱਟਣ ਦੀ ਮਾਰੀ
ਮਾਮੀ ਦਾਤਣ ਚੱਬਦੀ
ਛੜਿਆਂ ਨੇ ਕਰਤੀ ਨਾਂਹ
ਦੇਖੋ ਕੁਦਰਤ ਰੱਬ ਦੀ
ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਭਾਰਾ।
ਰੋਹੀ ਵਾਲਾ, ਜੰਡ ਵੱਢ ਕੇ,
ਪਾ ਕੇ ਦਊਂ ਚੁਬਾਰਾ।
ਰਾਈਓਂ ਰੇਤ ਵੰਡਾਵਾਂ ਨੀ,
ਅੱਧਾ ਵਿੱਚੋਂ ਚੁਬਾਰਾ।
ਆਪਣੇ ਪ੍ਰੇਮੀ ਨੂੰ ……..,
ਲਾ ਨਾ ਅੜੀਏ ਲਾਰਾ।
ਤੇਲੀਆਂ ਦੇ ਘਰ ਚੋਰੀ ਹੋ ਗਈ,
ਚੋਰੀ ਹੋ ਗਈ ਤੂੰ,
ਵੇ ਜਾਏ ਵੱਢੀ ਦਿਆ,
ਵਿੱਚੇ ਸੁਣੀਦਾ ਤੂੰ,
ਵੇ ਜਾਏ …..,
ਲੈ ਨੀ ਸਾਲੀਏ ਕੁੜਤੀ ਲਿਆਂਦੀ
ਦਰਜੀ ਤੋਂ ਸਮਾ ਲੈ
ਉੱਤੋਂ ਚੌੜੀ ਹੇਠਾਂ ਚੌੜੀ
ਲੱਕ ਕੋਲ ਛਾਂਟ ਪਵਾ ਲੈ
ਕੁੜਤੀ ਜੀਜੇ ਦੀ
ਰੀਝਾਂ ਨਾਲ ਹੰਢਾ ਲੈ।
ਮਾਮੀ ਨਖਰੋ ਦੇ ਚੁੰਨ ਮਚੁੰਨੇ ਦੀਦੇ
ਫਿੱਡਾ ਨੱਕ ਕੁੜੀਓ
ਮਾਮਾ ਹੋਰ ਲਿਆਉਣ ਨੂੰ ਫਿਰਦਾ
ਫੱਟੇ ਚੱਕ ਕੁੜੀਓ
ਮਾਮੀ ਨਖਰੋ ਦਾ ਟੇਢਾ ਮੇਢਾ ਪਿੰਡਾ
ਮੀਣਾ ਮੱਥਾ ਕੁੜੀਓ
ਮਾਮਾ ਹੋਰ ਲਿਆਉਣ ਨੂੰ ਫਿਰਦਾ
ਮਾਮੀ ਤੋਂ ਮਨ ਲੱਥਾ ਕੁੜੀਓ
ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਛੀਨਾ।
ਤੁੜੀ ਖਾਂਦੇ, ਬਲਦ ਹਾਰਗੇ,
ਵਾਹੁਣੋਂ ਰਹੇ ਜ਼ਮੀਨਾਂ।
ਮੁੰਡੇ ਖੁੰਡੇ ਫੈਸ਼ਨ ਕਰਦੇ,
ਬੁਢੜੇ ਖਾਂਦੇ ਫੀਮਾ।
ਛਤਰੀ ਤਾਣ ਕੁੜੀਏ …….
ਆਉਂਦੈ ਕਬੂਤਰ ਚੀਨਾ।
ਤੱਤਾ ਪਾਣੀ ਕਰਦੇ ਗੋਰੀਏ,
ਧਰ ਦੇ ਬਾਲਟੀ ਭਰ ਕੇ,
ਅਟਣ ਬਟਨ ਦਾ ਸਾਬਣ ਧਰ ਦੇ,
ਧਰ ਦੇ ਤੇਲ ਦੀ ਸ਼ੀਸ਼ੀ,
ਨੀ ਹੁਣ ਤੂੰ ਹੋ ਤੱਕੜੀ,
ਦਾਰੂ ਭੌਰ ਨੇ ਪੀਤੀ,
ਨੀ ਹੁਣ …….,
ਤਾਵੇ-ਤਾਵੇ-ਤਾਵੇ
ਲੁੱਦੇਆਣੇ ਟੇਸ਼ਨ ਤੇ
ਮੇਲ ਘੁਮਿਆਰਾਂ ਦਾ ਜਾਵੇ
ਗਧੇ ਤੋਂ ਘੁਮਿਆਰੀ ਡਿੱਗ ਪਈ
ਮੇਰਾ ਹਾਸਾ ਨਿੱਕਲਦਾ ਜਾਵੇ
ਕੁੜਤੀ ਸਵਾ ਦੇ ਮੁੰਡਿਆ
ਜਿਹੜੀ ਸੌ ਦੀ ਸਵਾ ਗਜ਼ ਆਵੇ
ਡੰਡੀਆਂ ਕਰਾ ਦੇ ਮੁੰਡਿਆ
ਜੀਹਦੇ ਵਿੱਚੋਂ ਦੀ ਮੁਲਕ ਲੰਘ ਜਾਵੇ
ਸੋਨੇ ਦਾ ਭਾਅ ਸੁਣਕੇ
ਮੁੰਡਾ ਅਗਲੇ ਅੰਦਰ ਨੂੰ ਜਾਵੇ
ਅੰਦਰੋਂ ਮੈਂ ਝਿੜਕਿਆ
ਮੁੰਡਾ ਅੱਖੀਆਂ ਪੂੰਝਦਾ ਆਵੇ
ਆਵਦੀ ਨਾਰ ਬਿਨਾਂ
ਦਰੀਆਂ ਕੌਣ ਵਿਛਾਵੇ।
ਮਾਮੀ ਮੰਗਦੀ ਐ
ਮੰਗਦੀ ਐ ਅੜੀਓ ਮਸਤ ਕਲੰਦਰ
ਅਸੀਂ ਘੁੰਮ ਲਿਆ ਨੀ
ਘੁੰਮ ਲਿਆ ਬੀਬੀ ਸਾਰਾ ਜਲੰਧਰ
ਸਾਨੂੰ ਮਿਲਿਆ ਈ ਨਾ
ਮਿਲਿਆ ਨਾ ਬੀਬੀ ਮਸਤ ਕਲੰਦਰ
ਪਿੰਡਾਂ ਵਿੱਚੋ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਦੀਨਾ।
ਬਲਦ ਤਾਂ ਹੁਣ ਦਿਸਣੋ ਹਟਗੇ,
ਆਈਆਂ ਪਿੰਡ ਮਸ਼ੀਨਾ।
ਵਾਹੀ ਕਰਨੋ ਗੱਭਰੂ ਹਟ ਗੇ,
ਉਲਟਾ ਲਗ ਗੇ ਫੀਮਾ।
ਆ ਕੇ ਛਤਰੀ ਤੇ,
ਬਹਿ ਗਿਆ ਕਬੂਤਰ ਚੀਨਾ।