ਗਿੱਧਾ ਪਾਇਆ ਵੀ ਵਥੇਰਾ,
ਨਾਲੇ ਗਾਇਆ ਵੀ ਵਥੇਰਾ,
ਹੁਣ ਗਿੱਧੇ ਵਿੱਚ ਦੇ ਦੇ ਗੇੜਾ ਨੀ ਮੇਲਣੇ,
ਨੱਚ ਨੱਚ ਪੱਟ ਦੇ ਵੇਹੜਾ ਨੀ ਮੇਲਣੇ,
ਨੱਚ ਨੱਚ …….,
ਵਿਹੜਾ ਵਿਹੜਾ ਵਿਹੜਾ
ਪੂਣੀਆਂ ਮੈਂ ਦੋ ਕੱਤੀਆਂ
ਟੁੱਟ ਪੈਣੇ ਦਾ ਬਾਰ੍ਹਵਾਂ ਗੇੜਾ
ਦੇਹਲੀ ਵਿੱਚ ਕੱਤਾਂ ਚਰਖਾ
ਘਰ ਦਾ ਮਹਿਕ ਗਿਆ ਵਿਹੜਾ
ਲੰਘਦੀ ਏ ਨੱਕ ਵੱਟ ਕੇ
ਤੈਨੂੰ ਮਾਣ ਨੀ ਚੰਦਰੀਏ ਕਿਹੜਾ
ਲੱਕ ਦੀ ਪਤਲੋ ਨੂੰ
ਨਾਗਾਂ ਪਾ ਲਿਆ ਘੇਰਾ।
ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਝਾਵਾਂ।
ਨ੍ਹੇਰਾ ਹੋ ਗਿਆ ਵੇ,
ਤੱਕਦੀ ਤੇਰੀਆਂ ਰਾਹਵਾਂ।
ਮਿੱਤਰਾਂ ਦੀ ਜਾਗਟ ਤੇ,
ਘੁੰਡ ਕੱਢ ਕੇ, ਬੂਟੀਆਂ ਪਾਵਾਂ।
ਸੋਹਣੇ ਯਾਰਾਂ ਦੇ………,
ਨਿੱਤ ਮੁਕਲਾਵੇ ਜਾਵਾਂ।
ਗੱਭਰੂ ਜੱਟਾਂ ਦਾ ਪੁੱਤ ਸ਼ੈਲ ਸ਼ਬੀਲਾ,
ਕੋਲੋ ਦੀ ਲੰਘ ਗਿਆ ਚੁੱਪ ਕਰ ਕੇ,
ਨੀ ਉਹ ਲੈ ਗਿਆ ਕਾਲਜਾ ਰੁੱਗ ਭਰਕੇ,
ਨੀ ਓਹ …….
ਦਾਣਾ-ਦਾਣਾ-ਦਾਣਾ
ਮੁੰਦਰੀ ਨਿਸ਼ਾਨੀ ਲੈ ਗਿਆ
ਛੱਲਾ ਦੇ ਗਿਆ ਖਸਮ ਨੂੰ ਖਾਣਾ
ਕੋਠੇ ਕੋਠੇ ਆ ਜਾਵੀਂ
ਮੰਜਾ ਸਾਹਮਣੇ ਚੁਬਾਰੇ ਡਾਹਣਾ ।
ਕਿਹੜਾ ਸਾਲਾ ਧੌਣ ਚੁੱਕਦਾ
ਅੱਗ ਲਾ ਕੇ ਫੂਕ ਦੂ ਲਾਣਾ ,
ਬੀਹੀ ਵਿੱਚ ਯਾਰ ਘੇਰਿਆ
ਮੈਂ ਵੀ ਨਾਲ ਮਰ ਜਾਣਾ।
ਮਿੰਦਿਆ ਮੈਂ ਤੈਨੂੰ ਵਰਜ ਰਹੀ ਨਾ ਬੀਜੀਂ ਤਿੱਲੜੀ ਜਮਾਰ ਬੇ
ਭੈਣਾਂ ਤਾਂ ਤੇਰੀ ਮੰਗਦੀ ਐ ਬਿਨਾ ਪੌਂਹਚਿਆਂ ਵਾਲੀ ਸਲਵਾਰ ਬੇ
ਉਹਨੇ ਕਰ ਲਿਆ ਬੇ ਸਦਰ ਠਾਣੇ ਦਾ ਠਾਣੇਦਾਰ ਬੇ
ਉਹ ਤਾਂ ਬਣ ਗਈ ਬੇ ਉਹਦੀ ਬਿਨ ਲਾਵਾਂ ਤੋਂ ਨਾਰ ਬੇ
ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਘਾਰੇ।
ਬਚਪਨ ਦੇ ਵਿਚ ਖੇਡਾਂ ਈ ਖੇਡਾਂ,
ਜੁਆਨੀ ਵਿੱਚ ਪਿਆਰੇ।
ਕਰਮਾਂ ਬਾਝ ਨਾ ਮਿਲਣ ਕਿਸੇ ਨੂੰ,
ਰੱਬ ਤੋਂ ਯਾਰ ਪਿਆਰੇ।
ਜੇਠ ਮੇਰਾ ਬੜਾ ਦਰਦੀ.
ਸੁੱਤੀ ਪਈ ਨੂੰ,
ਪੱਖੇ ਦੀ ਝੱਲ ਮਾਰੇ।
ਗੀਜੇ ਅੰਦਰ ਗੀਜਾ,
ਉਹਨੂੰ ਦਿਨ ਰਾਤ ਫੋਲਦਾ,
ਦਿੱਤੀਆਂ ਨਿਸ਼ਾਨੀਆਂ ਨੂੰ,
ਪੈਰਾਂ ਵਿੱਚ ਰੋਲਦਾ,
ਗੁੱਝੀ ਲਾ ਲੀ ਯਾਰੀ,
ਨੀ ਬੁਲਾਇਆਂ ਵੀ ਨਹੀਂ ਬੋਲਦਾ,
ਗੁੱਝੀ ਲਾ……..,
ਆਰੀ-ਆਰੀ-ਆਰੀ
ਸਿਖਰ ਚੁਬਾਰੇ ਤੇ, ਦਾਤਣ ਕਰੇ ਕਵਾਰੀ
ਲੱਕੀ ਕੁੜੀ ਤੂਤ ਦੀ ਛਟੀ
ਲੱਕ ਪਤਲਾ ਪੱਟਾਂ ਦੀ ਭਾਰੀ
ਨੰਦ ਲਾਲ ਪਲਟਣੀਏਂ
ਅੱਖ ਛੱਬੀਆਂ ਕੋਹਾਂ ਤੋਂ ਮਾਰੀ
ਗੋਲੀ ਦੇ ਨਿਸ਼ਾਨਚੀ ਨੇ
ਘੁੱਗੀ ਫੁੱਡ ਲਈ ਚੁਬਾਰੇ ਵਾਲੀ
ਅੱਖ ਨਾਲ ਅੱਖ ਲੜਗੀ
ਪੱਕੀ ਲੱਗ ਗੀ ਦੋਹਾਂ ਦੀ ਯਾਰੀ
ਲੱਗੀਆਂ ਦਾ ਚਾਅ ਨਾ ਲੱਥਾ
ਛੁੱਟੀ ਮੁੱਕਗੀ ਮਿੱਤਰ ਦੀ ਸਾਰੀ
ਭੁੱਲ ਕੇ ਨਾ ਲਾਇਓ
ਫੌਜੀ ਮੁੰਡੇ ਨਾਲ ਯਾਰੀ।
ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਜੱਲੀ।
ਕੰਤ ਨੂੰ ਨਾ ਮਾਰ ਕਿਸੇ ਦੀ,
ਰਹਿੰਦਾ ਹਰ ਦਮ ਟੱਲੀ।
ਦਿਓਰ ਮੇਰਾ ਬੜਾ ਨਿਆਣਾ,
ਰੱਖੇ ਸਰਾਣਾ ਮੱਲੀ।
ਡੋਰੀਆ ਗੰਢੇ ਦੀ ਛਿੱਲ ਵਰਗਾ.
ਰੋਟੀ ਲੈ ਕੇ ਜੇਠ ਦੀ ਚੱਲੀ।
ਗੋਰੀਆਂ ਬਾਂਹਾ ਚ ਮੇਰੇ ਕੱਚ ਦੀਆਂ ਚੂੜੀਆਂ,
ਪੈਰਾਂ ਦੇ ਵਿੱਚ ਵੇ ਪੰਜੇਬ ਛਣਕੇ,
ਅੱਜ ਨੱਚਣਾ ਮੈ ਗਿੱਧੇ ਚ ਪਟੋਲਾ ਬਣ ਕੇ,
ਅੱਜ …….
,
ਆ ਵਣਜਾਰਿਆ ਜਾਹ ਵਣਜਾਰਿਆ
ਇਸ਼ਕ ਦਾ ਭਾਂਬੜ ਭੜਕੇ
ਮਾਹੀ ਮੇਰਾ ਗਿਆ ਨੌਕਰੀ
ਸੱਸ ਵੀ ਤੁਰ ਗਈ ਲੜ ਕੇ
ਵੰਗਾਂ ਚੜ੍ਹਦੇ ਵੇ
ਨਰਮ ਕਲਾਈ ਫੜ ਕੇ।