ਚੁਗ ਚੁਗ ਪੀਲ੍ਹੜੀਆਂ ਨੀ ਸਈਓ
ਅਸੀਂ ਬਾਰਾਂਦਰੀ ਨੂੰ ਲਾਈਏ
ਲਾੜ੍ਹਾ ਕੱਢੇ ਲੇਲ੍ਹੜੀਆਂ ਨੀ ਸਈਓ
ਕਹਿੰਦਾ ਮੇਰੀ ਬੇਬੇ ਨੂੰ ਬਲਾਈਏ
ਬੇਬੇ ਤਾਂ ਜੀਜਾ ਉਧਲ ਗਈ
ਬੇ ਬਾਪੂ ਨਵੇਂ ਥਾਂ ਬਿਆੲ੍ਹੀਏ
ਪਹਿਲੀ ਤਾਂ ਬੇਬੇ ਟੀਰਮ ਟੀਰੀ
ਬੇ ਹੁਣ ਸੰਨਾਖੀ ਲਿਆਈਏ (ਸੰਜਾਖੀ)
ਪਹਿਲੀ ਤਾਂ ਬੇਬੇ ਕਾਲਮ ਕਾਲੀ
ਬੇ ਹੁਣ ਮੇਮ ਲਿਆਈਏ
ਪਹਿਲੀ ਤਾਂ ਬੇਬੇ ਲੰਗੜੀ ਡੁੱਡੀ
ਬੇ ਹੁਣ ਚਪੈਰੀ ਬੇ ਲਿਆਈਏ (ਚਾਰ ਪੈਰਾਂ ਵਾਲੀ)
ਪਹਿਲੀ ਤਾਂ ਬੇਬੇ ਉੱਲੂ ਬਾਟੀ
ਬੇ ਹੁਣ ਉਡਣੀ ਲਿਆਈਏ
ਪਹਿਲੀ ਤਾਂ ਬੇਬੇ ਤੋਕੜ ਸੀ
ਬੇ ਹੁਣ ਲਵੇਰੀ ਲਿਆਈਏ
ਪਹਿਲੀ ਤਾਂ ਬੇਬੇ ਫੰਡਰ ਸੀ
ਬੇ ਹੁਣ ਗੱਭਣ ਲਿਆਈਏ
ਪਿੰਡਾਂ ਵਿੱਚੋ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ ਜਗੇੜਾ।
ਸਾਊਆਂ ਦੀ ਜੋ ਹੋਵੇ ਪਰਿਆ,
ਕੀ ਝਗੜਾ, ਕੀ ਝੇੜਾ।
ਦੋ ਘੁੱਟ ਲਾ ਲਾ ਕੱਢਦੈ ਮੱਘੇ,
ਦੇ ਗੇੜੇ ਤੇ ਗੇੜਾ।
ਛੜਿਓ ਮਰ ਜੋ ਵੇ………,
ਰੰਨਾਂ ਦਾ ਭਰਿਆ ਵਿਹੜਾ…….।
ਝਾਵਾ ਝਾਂਵਾ ਝਾਂਵਾ,
ਉਡੀਕਾ ਵੀਰ ਦੀਆਂ,
ਦੁੱਧ ਨੂੰ ਜਾਗ ਨਾ ਲਾਵਾ,
ਉਡੀਕਾ ਵੀਰ …….
ਸਹੁਰਾ ਮੇਰਾ ਬੜਾ ਸ਼ੁਕੀਨੀ
ਸਾਗ ਸਰ੍ਹੋਂ ਦਾ ਲਿਆਵੇ
ਵੱਡੀ ਨੂੰ ਕਹਿੰਦਾ ਚੀਰੀਂ ਨੂੰਹੇ
ਛੋਟੀ ਤੋਂ ਹਲਦੀ ਪਵਾਵੇ
ਬੱਕਰੀ ਚੱਕ ਸੁੱਟੀ
ਨੂੰਹ ਦਾ ਮੰਜਾ ਨਾ ਥਿਆਵੇ।
“ਫਲਾਣਾ (ਲਾਲ ਸਿੰਘ) ਜੋਰੋ ਦਾ ਗੁਲਾਮ ਵੇ ਜੋਰੋ ਖਸਮ ਬਣੀ
ਪਿੱਛੇ ਤਾਂ ਲਾਇਆ ਯਾਰ ਨੀ ਆਪ ਮੂਹਰੇ ਚਲੀ
ਰਾਹ ਵਿਚ ਆਇਆ ਮੁਲਤਾਨ ਨੀ ਖਸਮਾ ਛੋੜ ਚਲੀ”
ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਰਾਈਂ।
ਜੇ ਤੈਂ ਮੇਲੇ ਜਾਣੈਂ ਮੁੰਡਿਆ,
ਸਹੁਰਿਆਂ ਵਿੱਚ ਦੀ ਜਾਈਂ।
ਪਰਿਆਂ ਵਿੱਚ ਤੇਰਾ ਸਹੁਰਾ ਹੋਉ,
ਗੱਜ ਕੇ ਫਤਹਿ ਗਜਾਈਂ।
ਭੁੱਲ ਕੇ ਲੋਭਾਂ ਨੂੰ ……….,
ਸ਼ੋਭਾ ਖੱਟ ਕੇ ਆਈਂ।
ਝਿਉਰਾਂ ਦੀ ਕੁੜੀ ਦੇ ਨਾਲ ਤੇਰੀ ਲੱਗੀ ਵੇ ਦੋਸਤੀ,
ਆਉਦਾ ਜਾਂਦਾ ਚੱਬ ਛੱਲੀਆਂ,
ਵੇ ਬਸ਼ਰਮਾ ਤੈਨੂੰ ਛੱਡ ਚੱਲੀਆਂ,
ਵੇ ਬਸ਼ਰਮਾ ……….,
ਨੀ ਦੋ ਕਿੱਕਰ ਦੇ ਡੰਡੇ
ਨੀ ਦੋ ਬੇਰੀ ਦੇ ਡੰਡੇ
ਕਿੱਧਰ ਗਏ ਨੀ ਸੱਸੇ
ਆਪਣੇ ਰੌਣਕੀ ਬੰਦੇ
ਨੌਕਰ ਉੱਠਗੇ ਨੀ ਨੂੰਹੇਂ
ਆਪਣੇ ਰੌਣਕੀ ਬੰਦੇ
ਜਾਂ
ਕਦੋਂ ਆਉਣਗੇ ਸੱਸੇ
ਆਪਣੇ ਰੌਣਕੀ ਬੰਦੇ
ਜਾਂ
ਛੁੱਟੀ ਆਉਣਗੇ ਨੂੰਹੇਂ
ਆਪਣੇ ਰੌਣਕੀ ਬੰਦੇ।
“ਭੁੱਲ ਜਾਈਂ ਵੇ ਲਾੜ੍ਹਿਆ ਸਿੱਠਣੀਆਂ ਦੇ ਬੋਲ
ਤੂੰ ਸਾਨੂੰ ਮਹਿੰਗਾ ਵੇ-ਦਈਏ ਸੋਨੇ ਬਰੋਬਰ ਤੋਲ
ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ, ਕਟਾਣੀ।
ਭੈਣੀ ਸਾਹਿਬ ਦੇ ਚਿੱਟੇ ਬਾਟੇ,
ਘੁੱਟਵੀਂ ਪਜਾਮੀ ਜਾਣੀ।
ਇੱਕ ਰੁਪੈ ਨਾਲ ਵਿਆਹ ਕਰ ਦਿੰਦੇ,
ਕਿੰਨੀ ਰੀਤ ਸਿਆਣੀ।
ਬਾਝੋਂ ਅਕਲਾਂ ਦੇ ………,
ਖੂਹ ਵੀ ਖਾਲੀ ਜਾਣੀ।