ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ ਬੁਟਾਹਰੀ।
ਰੁੱਖਾਂ ਦੀਆਂ ਦੁਪਾਸੀ ਲੜੀਆਂ,
ਨਹਿਰ ਸਰਹੰਦ ਪਿਆਰੀ।
ਦੂਰੋਂ ਫੁੱਲ ਇਓਂ ਲਗਦੇ ਨੇ,
ਰੰਗੇ ਰੱਬ ਲਲਾਰੀ।
ਮਹਿਕ ਮਿੱਟੀ ਦੀ……..,
ਸੱਚੀ ਅਤੇ ਪਿਆਰੀ।
ਤੇਰੇ ਜਿਹੇ ਨੂੰ ਵੇ ਮੈ ਟਿੱਚ ਨਾ ਜਾਣਦੀ,
ਤੇਰਾ ਮੇਰਾ ਨਾ ਕੋਈ ਮੇਚ ਮੁੰਡਿਆਂ,
ਤੇਨੂੰ ਮੋਗੇ ਦੀ ਮੰਡੀ ਚ ਆਵਾ ਵੇਚ ਮੁੰਡਿਆਂ,
ਤੈਨੂੰ ਮੋਗੇ ……..,
ਕਾਨਾ-ਕਾਨਾ-ਕਾਨਾ
ਕੁੜੀਏ ਨਾਈਆਂ ਦੀਏ
ਤੇਰਾ ਬਹੁਤ ਕੀਮਤੀ ਬਾਣਾ
ਚਾਂਦੀ ਦਾ ਤੇਰਾ ਪਲੰਘ ਜੁ ਕੁੜੀਏ
ਸੋਨੇ ਦਾ ਸਿਰ੍ਹਾਣਾ
ਲੈਂਦੀ ਲੋਟਣੀਆਂ
ਕੰਤ ਕਬੂਤਰ ਨਿਆਣਾ।
ਕੁੜਮਾ ਤੇਰਾ ਢਿੱਡ ਬੜਾ ਚਟਕੂਣਾ
ਤੂੰ ਤਾਂ ਖਾਂਦਾ ਗਧੇ ਤੋਂ ਬੀ ਦੂਣਾ
ਪਿੰਡਾਂ ਵਿੱਚੋਂ ਪਿੰਡ ਸੁਣੀਂਦਾ,
ਪਿੰਡ ਸੁਣੀਂਦਾ ਕਟਾਹਰੀ।
ਨਹਿਰ ਦੁਆਲੇ ਰੁੱਖਾਂ ਵਿੱਚ ਰਾੜਾ ਸਾਹਿਬ,
ਝਾਕੀ ਬੜੀ ਪਿਆਰੀ।
ਜੋ ਜੋ ਗੁਰੂ ਵਾਲਾ ਨੀ ਬਣਦਾ,
ਝੱਲਣੀ ਪਵੇ ਖੁਆਰੀ।
ਗੁਰੂ ਸ਼ਬਦ ਦੀ………,ਚਾਰੇ ਪਹਿਰ ਖੁਮਾਰੀ।
ਡੋਈ ਕੁੜੀਉ,
ਨੀ ਮੈ ਉਤਲੇ ਚੁਬਾਰੇ
ਅੱਡ ਹੋਈ ਕੁੜੀਓ,
ਨੀ ਮੈ …….,
ਹਰੀਆਂ ਮਿਰਚਾਂ ਗੁੱਛਾ ਸੁਨਹਿਰੀ
ਡੁੰਗ ਲੰਮੀਏ ਮੁਟਿਆਰੇ
ਕਿਹੜੀ ਗੱਲੋਂ ਖਾ ਗਈ ਗੁੱਸਾ
ਕੀ ਦਿਨ ਆ ਗਏ ਮਾੜੇ
ਦੁਖੀਏ ਆਸ਼ਕ ਨੂੰ
ਨਾ ਝਿੜਕੀਂ ਮੁਟਿਆਰੇ।
ਅੰਬਰ ਦੇ ਤਾਰੇ ਗਿਣ ਦਈਂ
ਬੇ ਨਾਲੇ ਗਿਣਦੀਂ ਭੇਡ ਦੇ ਬਾਲ
ਪੰਜ ਦਿਨ ਬਰਸਿਆ ਮੇਘਲਾ
ਬੇ ਤੂੰ ਕਣੀਆਂ ਗਿਣ ਦੀਂ
ਬੇ ਮਾਂ ਦਿਆਂ ਢੱਕਣਾ ਬੇ-ਨਾਲ
ਵਾ ਵਾ ਕਿ ਗਊਆਂ ਰੰਭਦੀਆਂ
ਮਾਮੇ ਤਾਂ ਸੌਂ ਗਏ ਚੜ੍ਹ ਕੇ ਚੁਬਾਰੇ
ਮਾਮੀਆਂ ਬਹਾਨੇ ਨਾਲ ਖੰਘਦੀਆਂ
ਪਿੰਡਾਂ ਵਿੱਚੋਂ, ਪਿੰਡ ਸੁਣੀਂਦੇ,
ਪਿੰਡ ਸੁਣੀਂਦੇ ਖਾਰੇ।
ਬੱਦਲੀ ਉਡਦੀ ਉੱਚੇ ਅੰਬਰੀਂ,
ਮੋਰ ਝਾਤੀਆ ਮਾਰੇ।
ਚਾਰ ਚੁਫੇਰੇ ਲਾਈ ਛਹਿਬਰ,
ਡੁੱਬਦੀ ਨੂੰ ਰੱਬ ਤਾਰੇ।
ਕਿਧਰੇ ਸੋਕਾ, ਕਿਧਰੇ ਡੋਬਾ …
ਦੇਖ ਓਸਦੇ ਕਾਰੇ
ਕਿਸ ਦੇ ਨੇ ਏਹ ਕਾਰੇ ??