ਗੱਲ ਏਹ ਨੀ

by Jasmeet Kaur

ਗੱਲ ਏਹ ਨੀ…ਬੀ ਤੁਸੀਂ ਤੜਕੇ ਕਿੰਨੇ ਵਜੇ ਉੱਠੇ…ਜਾਂ ਨਹਾ ਕੇ ਤਿੰਨ ਤੋਂ ਛੇ ਤੱਕ ਰੱਬ ਦਾ ਨੌਂ ਲਿਆ…ਗੱਲ ਏਹ ਆ ਬੀ ਛੇ ਵਜੇ ਤੋਂ ਰਾਤ ਦੇ ਨੌਂ ਵਜੇ ਤੱਕ ਤੂੰ ਕਿਮੇ ਸੀ..ਕੀ ਕੀਤਾ…??ਮਸਲਾ ਏਹਨੇ ਨਬੇੜਨਾ…ਗੱਲ ਏਹ ਨੀ…ਤੂੰ ਗੁਰੂਦੁਆਰੇ ਜਾਂ ਮੰਦਰ ਜਾ ਕੇ ਕਿੰਨਾ ਮਿੱਠਾ ਬੋਲਦਾ ਏਂ…ਕਿੰਨਾ ਜੀ ਜੀ ਕਰਦਾ ਏਂ…ਗੱਲ ਏਹ ਆ ਬੀ ਕਿਸੇ ਆਪ ਤੋਂ ਮਾੜੇ ਗਰੀਬ ਤੇ ਮੈਲ਼ੇ ਕੱਪੜਿਆਂ ਆਲ਼ੇ ਨਾਲ਼ ਤੇਰੀ ਬੋਲਚਾਲ ਕਿਮੇ ਆ….???..ਗੱਲ ਏਹ ਨੀ…ਕਿ ਤੂੰ ਗੋਲਕ ਚ ਕਿੱਡਾ ਨੋਟ ਪਾਇਆ ਏ…ਗੱਲ ਏਹ ਆ ਬੀ ਗੁਰੂਦੁਆਰੇ ਆਉਣ ਲੱਗੇ…ਜਿਹੜਾ ਰਿਕਸ਼ੇ ਆਲ਼ਾ ਤੈਨੂੰ ਲੈਕੇ ਆਇਆ…ਓਹਨੇ ਤੀਹ ਮੰਗੇ ਸੀ…ਤੂੰ ਵੀਹ ਦੇਣ ਲੱਗੇ ਬੀ ਕਿੰਨਾ ਕੁਜ ਸਣਾਇਆ ਓਹਨੂੰ….

ਗੱਲ ਏਹ ਨੀ ਕਿ ਤੂੰ ਕਮਾਈ ਕਿੰਨੀ ਕੀਤੀ…ਗੱਲ ਏਹ ਆ..ਤੈਨੂੰ ਪਿਆਰ ਕਿੰਨੇ ਕਰਦੇ ਨੇ…ਕਿੰਨਿਆਂ ਦਾ ਤੈਨੂੰ ਮਿਲਣ ਨੂੰ..ਤੇਰੀਆਂ ਗੱਲਾਂ ਸੁਣਨ ਨੂੰ ਜੀਅ ਕਰਦੈ…ਕਿੰਨੇ ਬੂਹੇ ਤੇਰੀ ਉਡੀਕ ਚ ਖੁੱਲੇ ਨੇ…???…ਗੱਲ ਏਹ ਨੀ ਕਿ ਤੇਰੇ ਕੋਲ਼ ਗੱਡੀ ਕਿੱਡੀ ਐ…ਗੱਲ ਏਹ ਆ…ਕਿਤੇ ਮੀਂਹ ਪੈਂਦੇ ਚ..ਕਿਸੇ ਭਿੱਜਦੇ ਨੂੰ ਤੂੰ ਗੱਡੀ ਚ ਬਹਾਕੇ ਮੰਜਲ ਤੇ ਛੱਡਿਐ…??…ਗੱਲ ਏਹ ਨੀ…ਕਿ ਤੇਰੀ ਗੱਡੀ ਭੱਜਦੀ ਕਿੰਨੀ ਐ…ਗੱਲ ਏਹ ਆ..ਕਿ ਕਿਤੇ ਪਾਣੀ ਕੋਲ਼ੋਂ ਲੰਘਦੇ ਟੈਮ…ਸਾਮਣੇ ਸੈਕਲ ਤੇ ਕਿਸੇ ਬੇਬਸ ਬੰਦੇ ਨੂੰ ਆਉਂਦੇ ਦੇਖ ਕੇ ਤੂੰ ਗੱਡੀ ਹੌਲ਼ੀ ਕਿੰਨੀ ਲੰਘਾਈ…ਬੀ ਕਿਤੇ ਛਿੱਟੇ ਨਾਂ ਪੈ ਜਾਣ ਬਾਈ ਤੇ….!!…ਗੱਲ ਏਹ ਨੀ…ਕਿ ਤੂੰ ਮਾਸ ਜਾਂ ਮੀਟ ਖਾਨਾ ਕਿ ਨਹੀਂ ਖਾਂਦਾ…ਗੱਲ ਏਹ ਆ…ਤੂੰ ਖੂਨ ਕਿੰਨੇ ਲੋਕਾਂ ਦਾ ਪੀਨੈ ਰੋਜ….

ਗੱਲ ਏਹ ਨੀ…ਕਿ ਥੋਡੇ ਪਿੰਡ ਧਾਰਮਕ ਸਥਾਨ ਕਿੰਨੀ ਜਮੀਨ ਚ ਬਣਿਐ..ਜਾਂ ਓਥੇ ਸਵੇਰੇ ਚਿੱਟੇ ਕੁੜਤੇ ਪਜਾਮੇ ਪਾਕੇ ਕਿੰਨੇ ਜਾਣੇ ਆਉਂਦੇ ਨੇ…ਗੱਲ ਏਹ ਆ ਕਿ ਉਨਾਂ ਆਉਣ ਆਲ਼ਿਆਂ ਚੋਂ ਸ਼ਾਮਲਾਤ ਦੀ ਜਮੀਨ ਕਿੰਨਿਆਂ ਨੇ ਦੱਬੀ ਐ…ਉਹ ਕਿੰਨੇ ਨੇ ਜਿਨਾਂ ਸਾਂਝੀ ਪਹੀ ਭੋਰਾ ਭੋਰਾ ਕਰ ਵਾਹ ਕੇ ਆਪਣੇ ਖੇਤ ਚ ਰਲ਼ਾ ਲੀ…ਗੱਲ ਏਹ ਨੀ ਕਿ ਤੇਰੇ ਡੌਲ਼ਿਆਂ ਚ ਜਾਨ ਕਿੰਨੀ ਐ…ਗੱਲ ਏਹ ਆ ਕਿ ਕਦੇ ਕਿਸੇ ਗਰੀਬ ਦੇ ਹੱਕ ਲਈ..ਕਿਸੇ ਤਾਕਤਵਰ ਦੇ ਵਿਰੁੱਧ ਆਪਣਾ ਦਮ ਦਿਖਾਇਐ..???….ਗੱਲ ਏਹ ਨੀ ਕਿ ਤੂੰ ਹਫਤੇ ਬਾਦ ਕੇਹੜੇ ਵੱਡੇ ਹੋਟਲ ਚ ਚੈੱਕ ਇੰਨ ਪਾਕੇ ਲੰਚ ਕਰਦੈਂ….ਗੱਲ ਏਹ ਆ ਬੀ ਪਿੰਡ ਸੈਕਲ ਤੇ ਗਰਮੀ ਚ ਪੰਦਰਾਂ ਰਪਈਏ ਕਿੱਲੋ ਸਬਜੀ ਵੇਚਣ ਆਲ਼ੇ ਨੂੰ ਤੂੰ ਅੱਖਾਂ ਦਖਾ ਕੇ ਵੀਹ ਦੀ ਦੋ ਕਿੱਲੋ ਕਿਮੇ ਪਵੌਨੈਂ…!!!

ਗੱਲ ਏਹ ਨੀ ਕਿ ਤੂੰ ਪੈਸੇ ਕਿੰਨੇ ਕਮਾਏ…ਗੱਲ ਏਹ ਆ ਕਿ ਤੂੰ ਰਿਸ਼ਤੇ ਕਿਮੇ ਨਿਭਾਏ…??..ਗੱਲ ਏਹ ਨੀ…ਤੂੰ ਕੇਹੜੇ ਮੁਲਕ ਚ “ਸੈਟਲ” ਹੋਗਿਆ…ਗੱਲ ਏਹ ਆ..ਜੇਹੜੀ ਮਿੱਟੀ ਚ ਤੂੰ ਜੰਮਿਆ ਪਲ਼ਿਆ ਓਹਦੇ ਲਈ ਤੂੰ ਕੀ ਕੀਤਾ…??…ਗੱਲ ਏਹ ਨੀ ਕਿ ਤੇਰੀ ਕੋਠੀ ਦੇ ਹਰੇਕ ਕਮਰੇ ਚ ਅਲੱਗ ਰੰਗ ਨੇ…ਗੱਲ ਏਹ ਆ..ਕਿ ਕੀ ਤੂੰ ਕਦੇ ਕੁਦਰਤ ਦੇ ਰੰਗਾਂ ਨੂੰ ਮਾਣਿਐ…ਮੁਹੱਬਤਾਂ ਕੀਤੀਆਂ…ਫੁੱਲਾਂ ਨਾਲ਼ ਹੱਸਿਐਂ ਕਦੇ…??? ਗੱਲ ਏਹ ਨੀ ਕਿ ਤੇਰੀ ਉਮਰ ਕਿੰਨੀ ਐ…ਸਵਾਲ ਤੇ ਏਹ ਆ…ਬੀ ਤੂੰ ਕਦੇ ਜੀਅ ਕੇ ਦੇਖਿਐ…??????

ਬਾਗੀ ਸੁਖਦੀਪ

Baghi Sukhdeep

You may also like