ਏਕੇ ਵਿੱਚ ਬਰਕਤ

ਸਿਆਣੇ ਕਹਿੰਦੇ ਏਕੇ ਵਿੱਚ ਬਰਕਤ ਹੁੰਦੀ ਹੈ ।ਏਕੇ ਵਿੱਚ ਬਰਕਤ ਹੀ ਨਹੀਂ ਤਾਕਤ ਵੀ ਹੁੰਦੀ ਹੈ । ਸੂਰਜ ਦੀਆਂ ਕਿਰਨਾਂ ਜੇ ਇਕ ਥਾਂ ਕੱਠੀਆਂ ਹੋ ਜਾਣ ਤਾਂ ਅੱਗ ਲਾ ਦਿੰਦੀਆਂ । ਪਾਣੀ ਦੀਆਂ ਬੂੰਦਾਂ ਦਰਿਆ ਬਣ ਕੇ ਵਗ ਉਠਦੀਆਂ ਕਿਤੇ ਸਮੁੰਦਰ ਵਿੱਚ ਲੱਖਾਂ ਬੇੜਿਆਂ ਨੂੰ ਚੁੱਕੀ ਫਿਰਦੀਆਂ । ਇਕ ਵੋਟ ਦੀ ਕੀਮਤ ਕੀ ਹੁੰਦੀ ਹੈ ? ਇਹਦਾ ਪਤਾ ਉਦੋਂ ਲਗਦਾ ਜਦੋਂ ਸਾਰੀਆਂ ਰਲ ਜਾਣ ਤੇ ਰਾਜ-ਭਾਗ ਪਲਟ ਦਿੰਦੀ ਹੈ । ਇਕ ਪੈਸਾ ਕੁਝ ਅਰਥ ਨਹੀਂ ਰੱਖਦਾ ਪਰ ਜਦੋਂ ਪੈਸਾ ਪੈਸਾ ਜੁੜ ਜਾਵੇ ਤਾਂ ਕੋਹਿਨੂਰ ਵੀ ਖਰੀਦ ਸਕਦਾ ।
ਜੇ ਫੌਜਾਂ ਦੀ ਗੱਲ ਕਰੀਏ ਤਾਂ ਫੌਜ ਦੀ ਤਾਕਤ ਹੀ ਏਕੇ ਵਿੱਚ ਬਣਦੀ ਹੈ ਕਿਉਂਕਿ ਉਨਾਂ ਦਾ ਕਮਾਂਡਰ ਇਕ ਹੁੰਦਾ ਤੇ ਇੱਕੋ ਹੁਕਮ ਥੱਲੇ ਉਹ ਲੜਦੇ ਹਨ । ਜੇ ਅਸੀਂ ਹਿੰਦੁਸਤਾਨ ਦਾ ਇਤਿਹਾਸ ਪੜੀਏ ਤਾਂ ਇੰਨਾ ਚਿਰ ਗੁਲਾਮ ਰਹਿਣ ਦਾ ਕਾਰਨ ਆਪਸ ਵਿੱਚ ਫੁੱਟ ਤੇ ਆਪਸੀ ਲੜਾਈ ਸੀ । ਗੁਰੁ ਸਾਹਿਬਾਨ ਨੇ ਫੇਰ ਲੋਕਾਂ ਨੂੰ ਜਗਾਇਆ ਤੇ ਇਕ ਸੇਧ ਦਿਤੀ ਇਕ ਕੀਤਾ ਤੇ ਜੇ ਮੁੜ ਆਪਣੇ ਇਤਿਹਾਸ ਵੱਲ ਨਿਗਾਹ ਮਾਰੀਏ ਤਾਂ ਜਦੋਂ ਜਦੋਂ ਵੀ ਸਾਡੇ ਬਜ਼ੁਰਗ ਇਕ ਹੋ ਕੇ ਲੜੇ ਤਾੰ ਹਰ ਮੈਦਾਨ ਫਤਹਿ ਹੋਈ । ਰਾਜਭਾਗ ਦੇ ਮਾਲਕ ਬਣੇ ਤੇ ਮੁੜ ਫੇਰ ਉਸੇ ਫੁਟ ਤੇ ਭਰਾ ਮਾਰੂ ਜੰਗ ਨੇ ਸਾਰਾ ਕੁਝ ਤਬਾਹ ਕਰ ਦਿਤਾ ।
ਮੈ ਕਈ ਵਾਰ ਸੋਚਦਾਂ ਕਿ ਜੇ ਦੁਨੀਆਂ ਵਿਚ ਸੱਭ ਤੋ ਛੋਟੀ ਫੌਜ ਹੋਈ ਹੈ ਤਾਂ ਉਹ ਸੀ ਬਾਬਾ ਗਰਜਾ ਸਿੰਘ ਤੇ ਬਾਬਾ ਬੋਤਾ ਸਿੰਘ
ਉਨਾਂ ਦੀ ਲੜਨ ਦੀ ਤਕਨੀਕ ਨੂੰ ਅਸੀਂ ਕਦੀ ਨਹੀਂ ਵਿਚਾਰਿਆ । ਉਹ ਦੋਨੋ ਇੱਕੋ ਪਾਸੇ ਮੂੰਹ ਕਰਕੇ ਨਹੀਂ ਸੀ ਲੜੇ । ਉਨਾਂ ਨੇ ਪਿੱਠ ਨਾਲ ਪਿੱਠ ਜੋੜੀ ਸੀ । ਮਤਲਬ ਉਹ ਦੋਨੋ ਇਕ ਦੂਜੇ ਨੂੰ ਬਚਾ ਵੀ ਰਹੇ ਸੀ ਤੇ ਲੜ ਵੀ ਰਹੇ ਸੀ । ਇਉੰ ਉਨਾਂ ਦੀ ਪਿੱਠ ਤੇ ਕੋਈ ਖੜਾ ਸੀ । ਇਹ ਇਕ ਬਹੁਤ ਵੱਡੀ ਸੋਚ ਤੇ ਤਾਕਤ ਸੀ ।
ਦੂਜਾ ਦੁਨੀਆਂ ਵਿੱਚ ਕੋਈ ਵੀ ਫੌਜ ਜਿੱਤ ਨਹੀਂ ਸਕਦੀ ਜੋ ਬਹੁਤੇ ਫਰੰਟ ਖੋਲ ਦੇਵੇ । ਕਦੀ ਉਧਰ ਨੂੰ ਲੜਨ ਦੌੜ ਪਏ ਤੇ ਕਦੀ ਉਧਰ ਨੂੰ
ਇਉਂ ਸਾਰੀ ਫੌਜ ਦੀ ਤਾਕਤ ਖਿੱਲਰ ਜਾਂਦੀ ਹੈ ਤੇ ਉਹਨੂੰ ਹਰਾਉਣਾ ਵੱਡੀ ਗੱਲ ਨਹੀਂ । ਸ਼ੇਰ ਵੱਡੇ ਵੱਡੇ ਸਿੰਗਾਂ ਵਾਲ਼ਿਆਂ ਨੂੰ ਪਹਿਲਾਂ ਭਜਾ ਲੈਦਾਂ ਤੇ ਇਕ ਇਕ ਨੂੰ ਪਾਸੇ ਕੱਢ ਕੇ ਮਾਰ ਲ਼ੈਂਦਾ
ਤੁਸੀ ਦੇਖਿਆ ਹੋਣਾ ਕਦੀ ਕਦੀ ਝੋਟੇ ਕੱਠੇ ਹੋ ਕੇ ਸ਼ੇਰ ਵੀ ਮਾਰ ਸਕਦੇ ਹਨ । ਇਹ ਹੁੰਦੀ ਏਕੇ ਦੀ ਤਾਕਤ ।
ਸਾਡੀ ਬਦਕਿਸਮਤੀ ਕਹਿ ਲਉ ਬੇਅਕਲੀ ਕਹਿ ਲਉ ਅਸੀਂ ਦੋਨੋ ਪਾਸਿਆਂ ਤੋਂ ਮਾਰ ਖਾ ਰਹੇ ਹਾਂ । ਇਕ ਤਾਂ ਅਸੀਂ ਬਾਬਾ ਬੋਤਾ ਸਿੰਘ ਬਾਬਾ ਗਰਜਾ ਸਿੰਘ ਵਾੰਗ ਇਕ ਦੂਜੇ ਦੀ ਪਿੱਠ ਪਿੱਛੇ ਨਹੀਂ ਖੜਦੇ । ਦੂਜਾ ਸਾਰੀ ਕੌਮ ਧੜਿਆਂ ਵਿੱਚ ਵੰਡ ਹੋ ਕੇ ਫੌਜ ਦੇ ਖਿੱਲਰਨ ਵਾਂਗ ਕੋਈ ਪ੍ਰਾਪਤੀ ਨਹੀਂ ਕਰ ਰਹੀ
ਤੀਜਾ ਅਸੀਂ ਇੰਨੇ ਵਿਸ਼ਿਆਂ ਤੇ ਲੜ ਰਹੇ ਹਾਂ ਜਿਵੇਂ ਅਸੀਂ ਹੀ ਸਾਰੀ ਦੁਨੀਆਂ ਦਾ ਸੁਧਾਰ ਕਰਨਾ ਹੋਵੇ । ਕੌਮ ਨੂੰ ਲੋੜ ਹੈ ਇਕ ਇਕ ਕਰਕੇ ਮਿਸ਼ਨ ਮਿਥਣ ਦੀ ਜਿਸ ਦੀ ਸਾਰੀ ਕੌਮ ਨੂੰ ਲੋੜ ਹੈ । ਉਹਦੇ ਤੇ ਸਾਰੇ ਇਕੱਠੇ ਹੋ ਕੇ ਤੁਰਨ ਤੇ ਫੇਰ ਜਦੋਂ ਉਹ ਮੋਰਚਾ ਫਤਹਿ ਹੋਵੇ ਫੇਰ ਦੂਜੇ ਲਈ ਤੁਰਨਾ ਪਊ । ਨਹੀਂ ਭਾਵੇਂ ਅਸੀਂ ਹਜ਼ਾਰਾਂ ਸਾਲ ਲੜੀ ਚਲੀਏ ਕੋਈ ਵੀ ਜਿੱਤ ਸਾਡੀ ਝੋਲੀ ਨਹੀਂ ਪਵੇਗੀ ।
ਏਕਾ ਕਰਨ ਲਈ ਸਭ ਤੋਂ ਜ਼ਰੂਰੀ , ਪਹਿਲੀ ਤੇ ਅਖੀਰੀ ਸ਼ਰਤ ਇਹੀ ਹੁੰਦੀ ਹੈ ਕਿ ਇਕ ਦੂਜੇ ਨਾਲ ਵਿਚਾਰਾਂ ਦਾ ਲੱਖ ਵੱਖਰੇਵਾ ਹੋਵੇ ਪਰ ਉਹਦਾ ਸਿੱਖ ਹੋਣ ਨਾਤੇ ਸਤਿਕਾਰ ਕਰੀਏ

Categories General
Tags
Share on Whatsapp